شونجى اۋىلىنداعى بىرىنشىلىكتە كوكپاردان ەرەسەكتەر سىنعا تۇسسە, اۋدارىسپاق, تەڭگە ءىلۋ, جامبى اتۋدان 2004-2006 جىلعى تاقىمى مىقتى جاستار جارىستى.
ات جالىنداعى باسەكەلى جارىس قورىتىندىسى بويىنشا جامبى اتۋدا تۇرىك ءستيلى بويىنشا جارىلقاسىن بەكارىس, كورەي ستيلىندە شارىنباي ماديار, قازاق ستيلىندە قازبەك اسىلبەك جەڭىمپاز اتاندى.
جامبى اتۋدان جالپى كوماندالىق ەسەپتە قاراساي اۋدانىنىڭ سپورتشىلارى 1-ورىندى يەمدەنسە, 2-ورىن قوناەۆ قالاسىنىڭ, ال جۇلدەلى 3-ورىن ەڭبەكشىقازاق اۋدانىنىڭ ەنشىسىنە ءتيدى.
اۋدارىسپاقتا دا 55 پەن 95 كگ اراسىنداعى ءارتۇرلى سالماق دارەجەلەرى بويىنشا كىل مىقتىلار انىقتالدى.
«قوس قۇلاش», «بەس بەلەس» جانە «جەتى قۇت» ءستيلى بويىنشا تەڭگە ىلۋدەن سىنعا تۇسكەن سپورتشىلاردىڭ جارىسى چەمپيوناتتىڭ كورىگىن قىزدىرىپ, كورەرمەننىڭ قوشەمەتىنە بولەندى.
كوكسەركەنى تاقىمداپ, قارا جەردىڭ شاڭىن شىعارعان كوكپار جارىسىندا جامبىل اۋدانىنىڭ سپورتشىلارى الدىنا قارا سالماي, جەڭىمپاز اتانسا, 2 جانە 3-ورىنداردى كەگەن مەن رايىمبەك اۋدانىنىڭ كوماندالارى ءوزارا ءبولىستى.
جەكەلەگەن اتالىمدار بويىنشا رايىمبەك اۋدانىنان كەلگەن كوكپارشى اباي ماعجان – «ەڭ ۇزدىك سالىمشى», جامبىل اۋدانىنىڭ سپورتشىسى نوعايبەك دۋلات – «ەڭ ۇزدىك قورعاۋشى», ال كەگەندىك سەرىكجان باقداۋلەت «ەڭ ۇزدىك ويىنشى» اتالىمىن ەنشىلەدى.
ۇلتىمىزدىڭ رۋحىن اسقاقتاتقان ات سپورتى جارىسىندا تاۋلى ءوڭىردىڭ تۇلەكتەرى تەڭدەسسىز ويىن ورنەگىن كورسەتە ءبىلدى. جالپى كوماندالىق ەسەپ بويىنشا رايىمبەك اۋدانى 1-ورىن السا, 2-ورىنعا كەگەن اۋدانىنىڭ سپورتشىلارى تابان تىرەدى. ال 3-ورىندى قوناەۆ قالاسىنىڭ كومانداسى يەلەندى. جارىس جەڭىمپازدارى مەن جۇلدەگەرلەرگە ارنايى مەدالدار مەن گراموتالار, اقشالاي سەرتيفيكاتتار تابىس ەتىلدى.
الماتى وبلىسى
