فوتو: ن.بايبۋلين
كەزدەسۋدە ماۋلەن اشىمباەۆ قازاقستان ەقىۇ-نى قاۋىپسىزدىك پەن ىنتىماقتاستىققا قاتىستى ىرگەلى ماسەلەلەر بويىنشا شەشىمدەر قابىلداۋ ءۇشىن ءتيىمدى كوپجاقتى الاڭ رەتىندە قاراستىراتىنىن ايتتى.
«قازىرگى ۋاقىتتا ەقىۇ ۇيىم العاش قۇرىلعان كەزدەگىدەي شىعىس پەن باتىس اراسىنداعى «كوپىر» رەتىندە ماڭىزدى ميسسيا اتقارىپ وتىر. ءبىز ەۋروپالىق كەڭىستىكتەگى نەگىزگى ساياسي سەرىكتەستەرىمىزدىڭ ءبىرى – ەقىۇ پارلامەنتتىك اسسامبلەياسىمەن كونسترۋكتيۆتى ىنتىماقتاستىقتى ودان ءارى نىعايتۋعا مۇددەلىمىز. قازاقستان پارلامەنتىنىڭ دەپۋتاتتارى ەقىۇ پارلامەنتتىك اسسامبلەياسىنىڭ سەسسيالارىنا, ونىڭ كوميتەتتەرىنىڭ جۇمىسىنا جانە بايقاۋ ميسسيالارىنىڭ قۇرامىنداعى مىندەتتەرگە بەلسەندى قاتىسىپ كەلەدى», دەدى ماۋلەن اشىمباەۆ.
سونداي-اق سەنات سپيكەرى بۇگىندە ورتالىق ازيا مەملەكەتتەرى اراسىنداعى قارىم-قاتىناستار ستراتەگيالىق ارىپتەستىك پەن وداقتاستىققا تابان تىرەي وتىرىپ, دايەكتى تۇردە دامىپ كەلە جاتقانىنا نازار اۋداردى. اتالعان ماسەلەگە مەملەكەت باسشىسى ەرەكشە كوڭىل ءبولىپ كەلەدى. تاراپتار وڭىردەگى ىنتىماقتاستىقتىڭ جوعارى دەڭگەيىن پارلامەنتتەر ارقىلى دا قولداپ وتىر.
«وڭىرلىك جاقىنداسۋ ۇردىستەرى ءبىزدىڭ ەلدەرىمىزدىڭ ۇلتتىق مۇددەلەرىنە ساي كەلەدى. سونداي-اق ورتالىق ازيانىڭ زور ەكونوميكالىق جانە مادەني الەۋەتىن ىسكە اسىرۋعا ىقپال ەتەدى. مەملەكەت باسشىلارى 2022 جىلى ورتالىق ازيانى ءححى عاسىردا دامىتۋدىڭ دوستىق, تاتۋ كورشىلىك جانە ىنتىماقتاستىق تۋرالى شارتىنا قول قويدى. ءبىز وزبەكستانمەن, قىرعىزستانمەن جانە تاجىكستانمەن ىنتىماقتاستىق جونىندەگى ەكىجاقتى پارلامەنتارالىق كوميسسيالار اياسىندا بەلسەندى جۇمىس ىستەپ كەلەمىز. سونىمەن قاتار جاڭا الاڭ – ورتالىق ازيا مەملەكەتتەرىنىڭ پارلامەنتارالىق فورۋمىن قۇردىق. فورۋمنىڭ العاشقى وتىرىسى بىلتىر قازاقستاندا ءوتتى», دەدى پالاتا توراعاسى.
ماۋلەن اشىمباەۆ ەقىۇ پا وكىلدەرىنە مەملەكەت باسشىسىنىڭ باستاماسىمەن قازاقستاندا جۇرگىزىلىپ جاتقان رەفورمالاردىڭ ىسكە اسىرىلۋ بارىسى تۋرالى دا ايتىپ بەردى.
سونىمەن قاتار ورتالىق ازيا ەلدەرىندەگى ەكولوگيانىڭ جاي-كۇيىنە, كليماتتىڭ وزگەرۋىنە, ترانسشەكارالىق وزەندەرگە, سۋارۋ, سۋ رەسۋرستارىن ۇنەمدى پايدالانۋ جانە باسقا دا سالالارعا قاتىستى وزەكتى پروبلەمالار تالقىلاندى. اتاپ ايتقاندا, تاراپتار ارال تەڭىزىنىڭ ەكوجۇيەسىن قالپىنا كەلتىرۋ جونىندەگى بىرلەسكەن جوبالارعا جانە پالاتانىڭ وسى باعىتتاعى زاڭنامالىق جۇمىسىنا ەرەكشە نازار اۋداردى.
ءوز كەزەگىندە ەقىۇ پا وكىلدەرى قازاقستاندا جۇرگىزىلىپ جاتقان ساياسي جانە الەۋمەتتىك-ەكونوميكالىق وزگەرىستەردىڭ ماڭىزىنا توقتالىپ, ولاردىڭ ناتيجەلەرىن جوعارى باعالادى. سونداي-اق الداعى ۋاقىتتا پارلامەنتارالىق ىنتىماقتاستىق ودان ءارى نىعايا تۇسەتىنىنە سەنىم ءبىلدىردى.
