اككاد بيلەۋشىسى سارگون – مەسوپوتامدىق قالا-مەملەكەتتەردى باعىندىرىپ تاريحتاعى العاشقى يمپەريا قۇرعان تۇلعالاردىڭ ءبىرى. ونىڭ قىزى ەنحەدۋاننا قۇداي-انا عيباداتحاناسىنىڭ جوعارعى قىزمەتكەرى بولدى. ەنحەدۋاننانىڭ جىرلارى اكەسىنىڭ ءدال بيلىك قۇرىپ تۇرعان كەزىندە تاسقا باسىلدى. وندا ءمىناجات جىرلارى مەن عيباداتحانا گيمندەرى قاشالىپ جازىلعان كورىنەدى. ءبىر قىزىعى, ارحەولوگتەر شىعارمانىڭ سوڭىندا اۆتورلىق قولتاڭبا قويۋ ءداستۇرىن دە وسى ەنحەدۋاننا باستاعان دەپ توپشىلايدى.ءدال وسى داۋىردە قۇدايلار مەن قاسيەت يەلەرىنىڭ سۋرەتتەرى كەڭىنەن بەينەلەنە باستاعان. البەتتە ەنحەدۋاننانىڭ دا ديدارى تاسقا تۇسپەۋى مۇمكىن ەمەس. الەباسترلىق ديسكىگە قاشالعان العاشقى اقىن ايەلدىڭ بەينەسىن عالىمدار جادىگەرلەردىڭ ەڭ عاجاپ ۇلگىسىنە بالايدى.
سونىمەن ەنحەدۋاننانىڭ شىعارماشىلىعىنا توقتالايىق. ونىڭ ولەڭىندە اقسۇيەكتەرگە ءتان تاكاپپارلىق تا ايەلگە ءتان نازىكتىك تە جوق ەمەس. اقىننىڭ تومەندەگى ەركىن تۇردە اۋدارىلعان ءبىر ولەڭىنە نازار اۋدارىپ كورەيىكشى.
ء«زۇبارجاتتىڭ جارقىن ساۋلەسىنە نازارىن بۇرعان,
كەز كەلگەن دۇنيەلىك قام قارەكەتتەردە كەڭەسىن بەرگەن,
اسپاننىڭ استى, جەرۇستىنە داڭقى جايىلعان,
دانالىق دارىعان حاس بەگىم نيسابەگە ماداق!»,
دەيدى ەنحەدۋاننا عىلىم مەن ولەڭ ءپىرى نيسابەنى ۇلىقتاپ. ول جاي عانا كوڭىل كورىنىستەرىن بەينەلەيتىن جىرلار عانا ەمەس, زامانىنىڭ ساياسي كەلبەتىن دە سۋرەتتەيتىن شىعارمالاردى دا جازىپ قالدىرعان. ونىڭ «نين-مە-سارا» گيمنى اقىن ولىمىنەن كەيىن بەس ءجۇز جىل بويى قاسيەتتى ءماتىن ەسەبىندە وقىلىپ كەلگەن. مامانداردىڭ ايتۋىنشا, گيمننىڭ وتە كوپ كوشىرىلگەن نۇسقاسى ونىڭ حالىق اراسىندا وتە تانىمال بولعانىن بىلدىرەدى. ەنحەدۋاننا جىردى كورشىلەس ۋر پاتشاسىنىڭ شابۋىلداپ, قۋدالاۋى كەزىندە جازعان. ەلىنىڭ ازاتتىعىن قايتارۋعا جانىن سالعان اقىن ايەل ءوزىنىڭ پوەزياسىن قارسى تاراپقا قارۋ ەسەبىندە قولداندى. اقىر اياعىندا اكەسى سارگوننىڭ نەمەرەسى نارام-سۋەن اككادتىقتاردى جەڭىسكە جەتكىزەدى. اتالىپ وتىرعان «نين-مە-سارا» گيمنىنىڭ وقيعا جەلىسى مەملەكەتتىڭ ۇزاق كۇرەستەن كەيىن قايتا قالپىنا كەلۋىمەن اياقتالادى.
كەيبىر عالىمدار ەنحەدۋاننانى شۋمەر ادەبيەتىنىڭ شەكسپيرى دەپ اتايدى. ۇلىق يناننانىڭ قۇرمەتىنە جازىلعان گيمنىندە ونىڭ قۇداي-انا اراسىنداعى كوڭىل تولقىنىستارى اشىق كورىنەدى. «مەن سەندىكپىن. سولاي بولىپ قالا دا بەرەدى» دەپ ءجيى قايتالاناتىن تارماقتار راسىندا اقىن جانىنىڭ سەزىمتالدىعىن كورسەتىپ تۇرعانداي:
«قايعى, قاسىرەت...
قايىر, قوش...
ۋا, مەنىڭ پاتشايىمىم!
مەن سەندىكپىن!
سولاي بولىپ قالا دا بەرەدى.
ماعان بەيىلىڭ بۇرىلىپ, جۇرەگىڭ جۇمسارسىنشى!
بۇل جىرىم سەنىڭ جولىڭا شالعان قۇرباندىعىم بولسىنشى!
سەنىڭ قۇدىرەتىڭ جەر-جاھاندى نۇرلاندىرىپ تۇر!
مەنىڭ جانىم سەنىڭ ۇلىق جازاڭدى قابىلدادى...
قايعى...ۇيقىسىزدىق... قاسىرەت...»
كەزىندە ەسەنعالي راۋشانوۆتىڭ «ايەلدەن اقىن شىقپايدى, ءبيشى نە كۇيشى بولماسا» دەگەن شۋماعى ءبىراز اقىن قىزداردى ءدۇدامال ويعا قالدىرعان ەدى. ارينە, اقىننىڭ بۇل شورت كەسىمىنىڭ ءمان-مازمۇنى وزىنە عانا ماع ۇلىم. الايدا تاريحتىڭ جارقىن تۇلعاسى ەنحەدۋاننامەن تانىسقاننان كەيىن, اقىننان ايەل شىقپاق تۇگىل, العاشقى اقىننىڭ ءوزى ايەل بولعان با دەپ ويلانىپ قالۋىڭىز ابدەن مۇمكىن.
