فوتو: mtrk.kz
كەڭەس بارىسىندا رومان سكليار بيزنەس وكىلدەرىنىڭ نازارىن اۋىل تۇرعىندارىنىڭ ومىرىنە, وڭىردەگى الەۋمەتتىك جانە ستراتەگيالىق نىساندارعا تونگەن قاۋىپتىڭ الدىن الۋ ماقساتىندا سۋ تاسقىنىنا قارسى جۇمىستاردى ۇيىمداستىرۋ ءۇشىن شۇعىل تۇردە بىرلەسە ارەكەت ەتىپ, قولدا بار بارلىق كۇش پەن ارنايى تەحنيكانى جۇمىلدىرۋ قاجەت ەكەنىن اتاپ ءوتتى.
سولتۇستىك قازاقستان وبلىسى اكىمىنىڭ ءبىرىنشى ورىنباسارى مارات تاسماعانبەتوۆتىڭ مالىمەتىنشە, وبلىس اكىمدىگى تۇرعىن ۇيلەر مەن الەۋمەتتىك-مادەني نىساندار سالىپ جاتقان وڭىرلىك جول جانە قۇرىلىس كومپانيالارىن سۋ تاسقىنىنا قارسى جۇمىستارعا تارتتى. ونىڭ سوزىنشە, كاسىپكەرلەر تەحنيكادان بولەك, قاجەت بولعان جاعدايدا ارنايى تەحنيكانى رەزەرۆتەگى ججم-مەن قامتاماسىز ەتۋگە نيەت بىلدىرگەن.
رومان سكليار كومپانيا باسشىلارىنا تەحنيكا مەن ادام كۇشتەرىن تارتۋدان بولەك, وزدەرىنىڭ دە وبەكتىلەردەگى باقىلاۋ جانە ۇيلەستىرۋ جۇمىستارىنىڭ باسى-قاسىندا بولۋىن تاپسىردى.
كەڭەس قورىتىندىسىندا ۆيتسە-پرەمەر ۇكىمەت باسشىسى مەن ونىڭ ورىنباسارلارى سۋ تاسقىنىنا قارسى شارالاردى ۇيلەستىرۋ ءۇشىن وڭىرلەردە جۇرگەنىن جانە جاعدايدى پرەزيدەنت جەكە باقىلاۋىندا ۇستاپ وتىرعانىن ەسكە سالدى.
«قازىر قالانى قورعاۋ كەرەك. الداعى كۇندەرى وسى مىندەتتى ويداعىداي اتقارعاننان كەيىن, كومەك قاجەت بولىپ جاتقان وڭىرلەرگە, اۋداندارعا اۋىسامىز. سول سەبەپتى ءبارىمىز جۇمىلىپ, سۋ تاسقىنىنا قارسى جۇمىستارعا دەرەۋ كىرىسۋىمىز قاجەت. باياۋ جانە رەتسىز جۇمىس ىستەۋگە بولمايدى. بارلىق جۇمىستى ورىنداۋعا ءۇش كۇنىمىز عانا بار», دەدى ر.سكليار.
سونىمەن قاتار پرەمەر-ءمينيستردىڭ ءبىرىنشى ورىنباسارى وڭىردەگى ينجەنەرلىك ينفراقۇرىلىمنىڭ سۋ تاسقىنىنا دايىندىعىن تەكسەرۋ ماقساتىندا پەتروپاۆل قالاسىنىڭ ماڭىنداعى بىرنەشە اۋىلداردى تەكسەرۋ ءۇشىن تۇنگى رەيد جۇرگىزدى. رەيد بارىسىندا تەپليچنوە, پريبرەجنوە اۋىلدارى مەن ۋششەۆا كوشەسى بويىنداعى بوگەتتەردى نىعايتۋ جۇمىستارىنىڭ بارىسى تەكسەرىلدى.
رومان سكليار مەردىگەر كومپانيالارعا بوگەتتەردى نىعايتۋ ءۇشىن تەحنيكا كولەمىن ارتتىرۋدى تاپسىرىپ, ۋاقىت تىعىز ەكەنىن ەسكە سالدى.
«ساناۋلى كۇن قالدى, بەلسەندى جۇمىس ىستەۋ كەرەك. نىسانداردا جۇك ماشينالارى مەن باسقا دا تەحنيكالار جەتكىلىكسىز, تيەگىشتەردىڭ سانىن ەكى ەسەگە ارتتىرۋ قاجەت. سۋدىڭ كوتەرىلۋ كەزەڭىندە ءبىز اعىمداعى جاعدايعا جاۋاپ بەرەتىن ءموبيلدى توپتار قۇرامىز», دەدى پرەمەر-ءمينيستردىڭ ءبىرىنشى ورىنباسارى.
