جايىق بويىنداعى ۇيلەر مەن ساياجايلاردا تۇراتىن حالىق وزەننىڭ ارناسىنان شىعۋىنا بايلانىستى ەۆاكۋاتسيالانادى.
بۇل تۋرالى كەزەكتى اۋەدەن بارلاۋدان كەيىن وبلىستا جۇرگەن پرەمەر-ءمينيستردىڭ ورىنباسارى نۇرلان بايبازاروۆ مالىمدەدى.
«2024 جىلعى 8 ساۋىردەگى جاعداي بويىنشا وزەندەگى سۋ دەڭگەيى 703 سم-گە جەتتى جانە ءالى دە كوتەرىلىپ جاتىر. بىلتىر ماكسيمۋم 557 سم بولعان. سۋ رەسەي فەدەراتسياسى تاراپىنان تاسقىنعا بايلانىستى يريكلا مەن پريۋزەن سۋ قويمالارىنان قارقىنمەن جىبەرىلىپ جاتىر. ەۆاكۋاتسيالىق پۋنكتتەر ازاماتتاردى قابىلداۋعا دايىن», دەدى نۇرلان بايبازاروۆ.
جايىق وزەنىنىڭ جاعالاۋىن نىعايتۋ جانە ورال قالاسى مەن وبلىستىڭ ءتورت اۋدانىندا دامبالار سالۋ جۇمىستارى جالعاسىپ جاتىر. اتاپ ايتقاندا, دارينسك, بايقوڭىس, وزەرنىي, ۆولودار, يانۆارتسەۆو, اقسۋ, رۋبەجينسكوە جانە ت. ب. اۋىلداردىڭ ماڭىندا ۋاقىتشا دامبالار سالىنادى.
قالا باسشىلىعى تۇرعىنداردان اكىمدىك وكىلدەرى مەن ەرىكتىلەردىڭ نۇسقاۋلارىن ورىنداۋدى سۇرايدى. تولىق ەۆاكۋاتسيادان كەيىن قاجەت بولعان جاعدايدا گاز, سۋ جانە ەلەكتر قۋاتى وشىرىلەدى. ەۆاكۋاتسيالانعان اۋداندارداعى قۇقىقتىق ءتارتىپتى جەرگىلىكتى پوليتسيا قىزمەتى مەن تجد قامتاماسىز ەتەدى.
