فوتو: ۇكىمەتتىڭ ءباسپاسوز قىزمەتى
شىڭعىستاۋ ابديەۆ — 36 جىل بويى اقتوبە سۋ قويماسىندا تەحنيك-مەحانيك ماماندىعى بويىنشا كران تاسىمالداۋشى بولىپ جۇمىس ىستەگەن. وتكەن جىلدىڭ جەلتوقسان ايىندا زەينەتكە شىققان. ايماقتا سۋ تاسقىنى باستالعان كەزدە ونىڭ كاسىبيلىگى مەن تاجىريبەسى توتەنشە جاعدايدى شەشۋگە جانە قالانى سۋ تاسقىنىنان قۇتقارۋعا كومەكتەستى.
بۇعان دەيىن سۋ تاسقىنى كەزىندە «قازسۋشاردىڭ» ماماندارى بوگەتتە ءبىر عانا شليۋز اشىپ كەلگەن. بوگەتتە ارقايسىسى سەكۋندىنا 600 تەكشە مەتر سۋ وتكىزە الاتىن بەس شليۋز بار. ال 28 ناۋرىزدا سەكۋندىنا 1000 تەكشە مەترگە دەيىن سۋ جىبەرۋ تۋرالى شەشىم قابىلدانىپ, ەكىنشى ءشليۋزدى اشۋ كەرەك بولدى. ول ءۇشىن پورتالدى كراندى جىلجىتۋ قاجەتتىگى تۋىندادى. سالماعى 126 توننا كراننىڭ تارتاتىن كران رەلستەرمەن قوزعالادى.
«بۇرىن-سوڭدى بۇل كراندى قولدانباعاندىقتان, ماماندار ونى جۇرگىزە باستاعاندا تەجەگىشى دۇرىس ىستەمەي, رەلستەرگە كەپتەتىلىپ قالدى. ءبىز ءۇشىن ءار مينۋت قىمبات بولدى, سەبەبى سۋ مولشەرى ساعات سايىن ارتىپ بارا جاتتى, ال ءبىز كراندى ىسكە قوسا الماي جاتىرمىز. وسى كەزدە بۇرىن كراندى ۇزاق جۇرگىزگەن, بىزگە كومەكتەسە الاتىن مامان ىزدەدىك. وسىلايشا شىڭعىستاۋ قيباش ۇلىنا وتىنىشپەن شىقتىق. بىردەن كەلىسكەن شىڭعىستاۋ قيباش ۇلى كەلىپ, جارتى ساعاتتىڭ ىشىندە ماسەلەنى شەشىپ بەردى. كرانعا ءوزى وتىرىپ, ەكىنشى ءشليۋزدى اشتى. سونىڭ ارقاسىندا ۋاقىتىندا سۋدىڭ قاجەتتى مولشەرىن جىبەرىپ, اقتوبە سۋ قويماسىنىڭ تاسىپ كەتۋىنىڭ الدىن الدىق», دەدى اقتوبە وبلىسى بويىنشا «قازسۋشار» باسشىسى رينات شاۋەنوۆ.
اقتوبە وبلىسى بويىنشا «قازسۋشار» باسشىلىعى شىڭعىستاۋ قيباش ۇلىن قايتادان جۇمىسقا قوسىلۋىن ۇسىندى. وسىلايشا ول 29 ناۋرىزدان باستاپ قايتادان كران ءماشينيسى قىزمەتىنە كىرىستى. تاجىريبەلى مامان جاستارعا جاۋاپتى جۇمىستىڭ قىر-سىرىن ۇيرەتىپ, تاجىريبەسىمەن بولىسپەك. بۇگىندە شىڭعىستاۋ قيباش ۇلىنىڭ ءۇش ۇلىنىڭ ءبىرى سۋ شارۋاشىلىعى سالاسىندا جۇمىس ىستەيدى.
