فوتو: primeminister.kz
تاسقىننان زارداپ شەككەن ازاماتتاردىڭ نەسيەسى شەگەرىلە مە؟
اكىمدىك تىزىمدەرى بويىنشا سۋ تاسقىنىنان زارداپ شەككەندەر ساناتىنا جاتقىزىلعان بارلىق ازاماتتارعا 3 ايعا نەسيە تولەمدەرىن اۆتوماتتى تۇردە كەيىنگە شەگەرۋ مۇمكىندىگى بەرىلەدى, سونىمەن قاتار تولەمدەردى كەشىكتىرگەنى ءۇشىن ايىپپۇلدار مەن ءوسىمپۇلدار سالىنبايدى.
اتالعان ساناتتاعى ازاماتتارعا بىررەتتىك تولەم قاراستىرىلعان با؟
سۋ تاسقىنىنان زارداپ شەككەن جانە قيىن جاعدايعا تاپ بولعان تۇرعىندار اكىمدىككە ءتيىستى وتىنىشپەن جۇگىنۋ ارقىلى ءبىر رەتتىك تولەم الا الادى.
زالالدى كىم انىقتايدى؟
زالالدىڭ الدىن الا مولشەرىن جەرگىلىكتى اتقارۋشى ورگاندار, ونەركاسىپ جانە قۇرىلىس, سونداي-اق توتەنشە جاعدايلار مينيسترلىكتەرى ايقىندايدى. قوسىمشا قاجەتتىلىك تۋىنداعان جاعدايدا قارجىلاندىرۋ ۇكىمەت رەزەرۆىنەن قاراستىرىلادى.
ءىس-ارەكەت الگوريتمى قالاي بولماق؟
- شىعىندى وتەۋ كوميسسياسى جۇمىس ىستەيدى. ماتەريالدىق شىعىنداردى وتەۋ تۋرالى وتىنىشتەر اتالعان كوميسسياعا كەلىپ تۇسەدى, توتەنشە جاعداي تۋىنداعان كۇننەن باستاپ كۇنتىزبەلىك 30 كۇن ىشىندە جەرگىلىكتى اتقارۋشى ورگاندارعا ماتەريالدىق زالالدى وتەۋ تۋرالى ءوتىنىش بەرەدى.
- جەرگىلىكتى اتقارۋشى ورگان ءوتىنىش تىركەلگەن كۇننەن باستاپ 10 جۇمىس كۇنى ىشىندە كەلتىرىلگەن زالالدىڭ مولشەرىن باعالايدى.
- تۇرعىن ءۇيى قاۋىپتى دەپ تانىلعان زارداپ شەككەن ازاماتتاردىڭ ءتىزىمىن جەرگىلىكتى اكىمدىكتەر جاسايدى.
ايتا كەتسەك كوميسسيا وكىلدەرى سۋ تاسقىنىنان قانشا ادامنىڭ زارداپ شەككەنىن, قانشا ءۇي مەن نىسانعا زاقىم كەلگەنىن, بارلىق شىعىن كولەمىن ەسەپتەپ, شەشىم شىعارادى.
سونىمەن قاتار «قازاقستان حالقىنا» قورى ەلىمىزدەگى سۋ تاسقىنىنان زارداپ شەككەندەرگە 5 ملرد تەڭگە بولەدى. بۇل قاراجات ءۇي سالۋعا جۇمسالادى.
