ۆيتسە-پرەمەر اقتوبە وبلىسىمەن شەكارا اۋماعىن تىكۇشاقپەن اينالىپ ءوتتى. جەم وزەنىندەگى زاقىمدالعان بوگەتتىڭ جاعدايىنا باعا بەردى. كەشە ونىڭ بۇزىلۋى سالدارىنان قۇلسارى قالاسىنىڭ ەكىنشى جانە ءۇشىنشى ۋچاسكەلەرى, سونداي-اق «جادىراسىن-2», «بولاشاق», «ۆاحتالىق كەنت» شاعىن اۋداندارى, «قاراعاي» ەلدى مەكەنى سۋ استىندا قالدى.
6 ساۋىردەگى جاعداي بويىنشا اتىراۋ وبلىسىنىڭ ءۇش اۋدانىندا كۇردەلى سۋ تاسقىنى جاعدايى ساقتالۋدا, 2 ەلدى مەكەنگە كولىكپەن قاتىناۋ مۇمكىن ەمەس.
قۇلسارى قالاسىندا 2,6 مىڭ جەكە تۇرعىن ءۇي مەن اكىمشىلىك عيمارات سۋ استىندا قالىپ, 5 ساۋىردەن باستاپ قاۋىپتى ايماقتان 15 632 ادام شىعارىلدى. حالىقتى ەۆاكۋاتسيالاۋ جالعاسىپ جاتىر.
قازىرگى ۋاقىتتا جاعالاۋدى نىعايتۋ جۇمىستارى قارقىندى جالعاسۋدا, توپىراق تولتىرىلعان 45,9 مىڭ قاپشىق, 174,3 مىڭ توننا ينەرتتى ماتەريال توسەلدى. 5 ساۋىردە كاسپي تەڭىزىنە قاراي سۋ وتكىزۋ قابىلەتىن ارتتىرۋ ءۇشىن جەم وزەنىندە مۇز جارۋ جۇمىستارى جۇرگىزىلدى, تاعى ءبىر رەت مۇز جارۋ جوسپارلانعان.
اكىمدىك پەن كۇشتىك قۇرىلىمداردىڭ 600-گە جۋىق قىزمەتكەرى, 148 تەحنيكا, 2 ءجۇزۋ قۇرالى جانە 500 ەرىكتى جۇمىلدىرىلدى.
5 ەلدى مەكەندە – ميالى, جانگەلدين, كوزدىقارا اۋىلدىق وكرۋگتەرى, اققورا, جاسقايرات اۋىلدارىندا قاۋىپ-قاتەر سەيىلدى.
قانات بوزىمباەۆ جىلىوي اۋدانى قۇلسارى قالاسىنداعى جاعدايدىڭ كۇردەلى ەكەنىن ايتىپ ءوتتى. الايدا دۇربەلەڭ مەن ۋايىمداۋعا سەبەپ جوق. وڭىردە سۋ تاسقىنىمەن كۇرەسۋگە ارنالعان بارلىق رەسۋرس بار.
«جاعدايدى تۇراقتاندىرۋ ءۇشىن جەرگىلىكتى اتقارۋشى ورگاندارعا ورتا ەسەپپەن 3-4 كۇن قاجەت. ناقتى ءىس-قيمىل جوسپارىن قۇرۋ, قاجەتتى اقشا سوماسىن ءبولۋ, قاجەتتى تەحنيكانى, سونداي-اق ادامي رەسۋرستاردى تارتۋ قاجەت», دەدى ق. بوزىمباەۆ.
ۆيتسە-پرەمەر ءوڭىر باسشىلىعىنا سۋ تاسقىنىنا قارسى كۇرەس بويىنشا بىرقاتار ناقتى تاپسىرما بەردى. اتاپ ايتقاندا, اتىراۋ وبلىسىندا تج رەجىمىن ەنگىزۋ تۋرالى تاپسىرما بەرىلدى.
«مەن قتج باسشىلىعىن شاقىردىم, ويتكەنى كەيبىر جەرلەردە ۇلكەن سۋ كولەمىن وتكىزۋ ءۇشىن تەمىرجولدارعا دەمونتاج جاساۋ قاجەت. قازىرگى تاڭدا يريكلين سۋ قويماسىنان سۋ اعىزۋ سەكۋندىنا 2,5 مىڭ تەكشە مەتردى قۇرايدى, الداعى ۋاقىتتا ول 4,5 مىڭعا جەتۋى مۇمكىن. سوندىقتان بىزدە سۋ تاسقىنىنا دايىندىققا 20 كۇن بار. تج رەجىمىن حالىقتى دۇربەلەڭگە شاقىرۋ ءۇشىن ەمەس, سۋ تاسقىنىنا قارسى ناقتى ءىس-قيمىل ءۇشىن جاريالايمىز», دەدى ق.بوزىمباەۆ.
وڭىردە سۋدى اتىراۋعا قاراي جىبەرىپ الماي, كاسپي تەڭىزىنە قاراي اپاراتىن وزەندەر مەن كولدەرگە جىبەرۋ ءۇشىن بۇرۋ ارنالارىن قازۋ قاجەت.
ء«بىز ءۇشىن ەڭ باستى مىندەت – اتىراۋدى بارلىق جاعىنان نىعايتۋ», دەپ تۇيىندەدى ۆيتسە-پرەمەر.
