مەملەكەتتىك كەڭەسشى سۋ تاسقىنىنا قاتىستى قازىرگى احۋال تۋرالى اقپارات تاراتۋ ءۇشىن ورتالىق كوممۋنيكاتسيالار قىزمەتىندە رەسپۋبليكالىق اقپاراتتىق شتاب قۇرىلعانىن, شتابتىڭ باق وكىلدەرىن قۇزىرلى ورگانداردان تۇسكەن مالىمەتپەن تاۋلىك بويى قامتاماسىز ەتەتىنىن حابارلادى.
«6 ساۋىردەن باستاپ توتەنشە جاعدايلار, قورعانىس, ىشكى ىستەر مينيسترلىكتەرى, كازگيدرومەت جانە باسقا دا مەكەمە وكىلدەرىنىڭ قاتىسۋىمەن قوسىمشا ونلاين بريفينگتەر ۇيىمداستىرىلادى. توتەنشە جاعداي جاريالانعان 10 ايماقتان جەرگىلىكتى شتابتارمەن ونلاين بريفينگتەر جوسپارلانىپ وتىر. «24kz» تەلەارناسىنىڭ ەفيرلىك ۋاقىتى رەسپۋبليكالىق اقپاراتتىق شتابتىڭ جۇمىسىمەن ۇيلەستىرىلىپ, بريفينگتەردەن تىكەلەي حابار تاراتىلادى. بۇدان بولەك, تەلەارناداعى جاڭالىقتاردىڭ ەفيرگە شىعۋ جيىلىگى ارتىپ, سۋ تاسقىنىمەن كۇرەسۋ جانە ونىڭ سالدارىن جويۋ, قۇتقارۋ قىزمەتتەرىنىڭ, ۆولونتەرلىك ۇيىمداردىڭ جانە باسقا دا ازاماتتاردىڭ بىرلەسكەن جۇمىسى, زارداپ شەككەن ايماقتارعا گۋمانيتارلىق كومەك جيناپ جەتكىزۋ بارىسى تۋرالى تۇراقتى اقپارات بەرىلەتىن بولادى», دەيدى مەملەكەتتىك كەڭەسشى.
«سونداي-اق قوعام بەلسەندىلەرى, ۆولونتەرلەر جانە قاراپايىم ازاماتتار زارداپ شەككەن جانداردى قاۋىپسىز ايماققا كوشىرۋگە, گۋمانيتارلىق كومەكتى جيناۋعا جانە جەتكىزۋگە, تۇرعىندارعا اقپارات تاراتۋعا قاتىستى بىرلەسكەن جۇمىستا ماڭىزدى ءرول اتقارىپ وتىر. بۇگىندە سۋ تاسقىنىنا قارسى كۇرەسكە بارلىعى 20 مىڭنان استام ۆولونتەر جۇمىلدىرىلعان. ولاردىڭ باسىم كوپشىلىگى اقتوبە, قوستاناي, باتىس قازاقستان, اباي, اقمولا جانە وزگە دە وبلىستارداعى توتەنشە جاعدايلار دەپارتامەنتىنىڭ قىزمەتكەرلەرىنە بارىنشا جاردەمدەسىپ جاتىر.
قازاقستان حالقىنىڭ اسسامبلەياسى تاراپىنان دا ايتارلىقتاي كومەك كورسەتىلىپ وتىر. جالپى رەسپۋبليكا بويىنشا قيىن-قىستاۋ جاعدايعا تاپ بولعان جاندارعا قولداۋ كورسەتۋگە جانە قارعىن سۋ سالدارىن جويۋعا اسسامبلەيانىڭ 9 مىڭنان استام ۆولونتەرى اتسالىسىپ ءجۇر. بارلىق ايماقتاعى دوستىق ۇيىندە ەرىكتىلەر ورتالىعى جانە گۋمانيتارلىق كومەكتى قابىلداۋ ورىندارى ۇيىمداستىرىلدى. ەتنومادەني بىرلەستىكتەردىڭ وكىلدەرى زارداپ شەككەن ادامداردى ازىق-ت ۇلىكپەن, ىستىق تاماقپەن, كيىم-كەشەكپەن, قاجەتتى زاتتارمەن جانە تەحنيكامەن قامتاماسىز ەتىپ وتىر. قازىرگى تاڭدا اسسامبلەيا تاراپىنان بەرىلگەن قايىرىمدىلىق جانە گۋمانيتارلىق كومەكتىڭ كولەمى 110 ميلليون تەڭگەدەن استى. ەلىمىزدەگى ۆولونتەرلىك ۇيىمداردىڭ جۇمىسىن ۇيلەستىرۋ – ماڭىزدى مىندەتتىڭ ءبىرى. مۇنى «Amanat» پارتياسىنىڭ «جاستار رۋحى» جاستار قاناتى ءوز موينىنا الدى. اۋقىمدى فيليالدار جەلىسى جانە مەملەكەتتىك ورگاندارمەن جۇمىس ىستەۋ تاجىريبەسى بار «جاستار رۋحى» ەرىكتى قۇتقارۋشىلاردى جيناۋ, گۋمانيتارلىق كومەكتى سۇرىپتاۋ جانە جەتكىزۋ جۇمىسىن ءتيىمدى اتقارىپ وتىر. بۇگىن بىرقاتار ءىرى ۆولونتەرلىك بىرلەستىكتىڭ وكىلدەرىمەن كەزدەستىك. كۇندەلىكتى ۇيىمداستىرۋ ماسەلەلەرىن تالقىلاپ, بۇرىن-سوڭدى بولماعان سۋ تاسقىنىنىڭ سالدارىن جويۋ ءۇشىن بىرلەسە جۇمىس جۇرگىزە بەرۋگە ۋاعدالاستىق», دەپ جازدى ەرلان قارين.
