كەشە كەشكى ساعات 20:30-دا قاراتومار سۋ قويماسىنان سەكۋندىنا 3300 تەكشە مەتر سۋ جىبەرىلە باستاعان. سالدارىنان توبىل وزەنى تۇنىمەن تاسىپ شىقتى. سۋدىڭ قارقىنى ءالى باسەڭدەگەن جوق. قالا اكىمى جاعدايدىڭ قيىن ەكەنىن, بىراق ەڭ باستىسى ادام شىعىنى جوق ەكەنىن ايتتى.
- «موحيتو» دەمالىس ورنى, «اپەلسين» سو, تەننيس ورتالىعى سۋدا قالدى. سونداي-اق قوستانايدىڭ شەتىندەگى «كولەسنىە ريادى» ەلدى مەكەنىندە 80 ءۇيدى سۋ باستى. سۋ باسقان ۇيلەردىڭ سانى ارتۋى نەمەسە وسىمەن توقتاۋى مۇمكىن. ناقتى ايتا المايمىن. ول جەردەن 6-7 كوشەنىڭ تۇرعىندارى ەۆاكۋاتسيالاندى. ءۇي جانۋارلارى دا قاۋىپسىز جەرگە شىعارىلدى. ءۇش بىردەي باۋ-باقشا بىرلەستىگى سۋدا قالدى. ەڭ باستىسى, ادام شىعىنى جوق. بىراق كەيبىر ادامدار قاۋىپتى تولىق سەزىنبەي, ءۇي-جايلارىنا ورالىپ جاتىر ەكەن. ولاي تاۋەكەل ەتۋگە بولمايدى. قاۋىپسىز ورىنداردا بولىڭىزدار, - دەدى اكىم.
م.جۇندىباەۆتىڭ ايتۋىنشا, قوستانايدا 754 ادام ەۆاكۋاتسيالانعان. ونىڭ 31-ءى ەۆاكۋاتسيالىق پۋنكتتەرگە جايعاسسا, قالعاندارى تۋىس-تۋعاندارىنا قونىستانعان.
«تاۋەلسىزدىك كوشەسىندەگى ورتالىق كوپىردە جۇك كولىكتەرىنىڭ جۇرۋىنە شەكتەۋ قويىلدى. تەك جەڭىل كولىكتەر جۇرە الادى. الايدا كولىك اعىنى تىم كوپ. سول سەبەپتى ءبىز قالا تۇرعىندارىنان ماڭىزدى جۇمىس بولماسا, قاتىناستى بارىنشا ازايتۋدى سۇرايمىز. ەندى ءبىز ينجەنەرلىك جەلىلەردى قالىپقا كەلتىرۋگە جانە ادامداردى ەۆاكۋاتسيالاۋعا كۇش جۇمىلدىرامىز. قوسىمشا قوستاناي اۋدانىنا دا كومەكتەسىپ جاتىرمىز», دەدى مارات جۇندىباەۆ.
قوستاناي وبلىسى
