وسىعان بايلانىستى وبلىس اكىمى سەرىك شاپكەنوۆ سۋ تاسقىنىنا قارسى جۇمىستاردى كۇشەيتۋ ءۇشىن ءىرى مۇناي كومپانيالارى وكىلدەرىمەن جيىن وتكىزدى. جيىندا ء«اتموز», «تەڭىزشەۆرويل» جشس, «NCOC N.V» كومپانياسىنا, «ەمبىمۇنايگاز», «قازترانسويل» اق جانە «كاسپي قۇبىر كونسورتسيۋمىنا» تەحنيكالاردى جۇمىلدىرۋ تاپسىرىلدى.
وبلىس اكىمىنىڭ ورىنباسارى قايرات نۇرتاەۆ قىزىلقوعا اۋدانىنا بارىپ, تاسقىن سۋعا قارسى جۇمىستارعا باسشىلىق ەتۋدى قولعا الدى. ويتكەنى مۇندا ويىل وزەنىنىڭ جاعالاۋىنان اسقان سۋ قونىستانۋ, تايسويعان, قاراباۋ اۋىلدارىنا جەتكەن. سول سەبەپتەن قونىستانۋ اۋلىنا بوگەتتى نىعايتۋ ءۇشىن 50 قۇتقارۋشى, 20 ەرىكتى, 1,5 مىڭ قاپ پەن قاجەتتى قۇرال-جابدىقتار جەتكىزىلدى. تايسويعان جانە قاراباۋ اۋىلدارىنا 60 قۇتقارۋشى باردى.
قىزىلقوعا اۋدانى اكىمىنىڭ ورىنباسارى جاراس ەسەنعاليەۆتىڭ مالىمەتىنە سۇيەنسەك, ميالى, جانگەلدين, ويىل, كوزدىعارا, تاسشاعىل, قاراكول, قىزىلقوعا, تايسويعان اۋىلدىق وكرۋگتەرىنە تاسقىن سۋدان تونەتىن قاۋىپ ءالى دە بايقالادى.
«قىزىلقوعا اۋدانىندا 31 ناۋرىزدا توتەنشە جاعداي جاريالاندى. سول كۇنى ميالى اۋلىنان 654 تۇرعىن 3 ەۆاكۋاتسيالىق پۋنكتكە كوشىرىلدى. بۇل اۋىلعا تونگەن قاۋىپ سەيىلىپ, تۇرعىندار ۇيىنە ورالدى. ال تايسويعان اۋىلدىق وكرۋگىنىڭ 139 تۇرعىنى اتىراۋ قالاسى مەن ميالى اۋلىنداعى تۋىستارىنىڭ ۇيىنە جەتكىزىلدى. كوزدىعارا اۋىلدىق وكرۋگىنىڭ تۇرعىندارى جاڭاشارۋا ورتا مەكتەبىنە ورنالاستىرىلدى», دەپ مالىمدەدى ج.ەسەنعاليەۆ.
ونىڭ ايتۋىنشا, 2 ساۋىردە كوزدىعارا وكرۋگىندەگى قونىستانۋ اۋلىندا سايدا ورنالاسقان 4 تۇرعىن ءۇيدى سۋ باستى. ءۇيدىڭ ءبىرى بوس تۇرعان. ەكى ۇيدەن 8 تۇرعىن مەن قوراداعى مال قاۋىپسىز ايماققا كوشىرىلىپتى. بۇل اۋىلدىق وكرۋگتە 1 744 تۇرعىن بار. وكرۋگكە قاراستى قوسقۇلاق جانە بۇيرەك ەلدى مەكەنىنىڭ 215 تۇرعىنى, 1 266 ءمۇيىزدى ءىرى قارا, 551 جىلقى, 66 تۇيە, 422 قوي-ەشكى قىر باسىنا شىعارىلدى.
ال تايسويعان اۋلىندا 30 قۇتقارۋشى, اتىراۋ قالاسىنان كەلگەن 10 ەرىكتى, اۋىلدىڭ 60-عا جۋىق تۇرعىنى اپاتتىڭ الدىن الۋ ءۇشىن جۇمىلا ىسكە كىرىستى. بۇل اۋىلدا بۇرىننان 2 شاقىرىم بوگەت بار. ەندى بۇعان قوسا 600 مەترگە جۋىق بوگەت تۇرعىزىلدى. سونداي-اق 2,5 شاقىرىمدىق كانال قازىلدى.
اۋدان اكىمى ورىنباسارىنىڭ ايتۋىنا قاراعاندا, ويىل اۋىلدىق وكرۋگىنە قاراستى بالابەيىت قىستاعى تاسقىن سۋدىڭ قورشاۋىندا قالعان. قۇتقارۋ جاساعى 2 قايىقپەن قىستاقتاعى 11 ادام مەن 173 مالدى قاۋىپسىز اۋماققا شىعارعان.
«ميالى اۋلىنان ساعىزعا باراتىن جولدىڭ 4-شاقىرىمى تۇسىن سۋ شايىپ, كولىك قوزعالىسى توقتادى. اۋدان ورتالىعىنان قاراباۋ باعىتىنداعى جول دا ءب ۇلىندى. جاسقايرات اۋلىنان 2 شاقىرىم قاشىقتىقتاعى جولدىڭ 130 مەترگە جۋىعى ب ۇلىنگەندىكتەن, اۆتوكولىك قوزعالىسى شەكتەلدى. تاسقىن سۋ جىرعان جول بولىكتەرى جەرگىلىكتى بيۋدجەت ەسەبىنەن قالپىنا كەلتىرىلەدى», دەيدى ج.ەسەنعاليەۆ.
وبلىس اكىمىنىڭ تاعى ءبىر ورىنباسارى مارات مۋرزيەۆ جىلىوي اۋدانىنداعى جەم وزەنىنىڭ جاعالاۋىن بەكىتۋ جۇمىسىنا باسشىلىق جاساپ ءجۇر. ويتكەنى 2 ساۋىردە اۋدانداعى جەم – اقكيىزتوعاي گيدروبەكەتىندەگى سۋ دەڭگەيى كۇندىزگى ساعات 8.00-دەن 20.00-گە دەيىن 55 سم-گە كوتەرىلگەن. كەشكى مەزگىلدەگى سۋ دەڭگەيى – 3,25 مەتر.
جەمنىڭ سۋى اقكيىزتوعاي اۋلىنا قاۋىپ ءتوندىردى. جىلىوي اۋدانى اكىمىنىڭ ورىنباسارى گۇلنافيس ايشۋاقوۆانىڭ مالىمەتىنشە, اتالعان اۋىلعا تونگەن قاۋىپتى سەيىلتۋ ءۇشىن بوگەت تۇرعىزۋعا 100-گە جۋىق ادام, 11 تەحنيكا تارتىلعان.
وبلىس اكىمىنىڭ ورىنباسارى جاسۇلان بيسەمبيەۆتىڭ ايتۋىنا قاراعاندا, جايىق وزەنىندەگى سۋ دەڭگەيى باقىلاۋعا الىنىپ وتىر. ويتكەنى بۇل وزەننىڭ جاعالاۋىندا يندەر جانە ماحامبەت اۋداندارىنىڭ, اتىراۋ قالاسىنىڭ 30-دان اسا ەلدى مەكەنى ورنالاسقان.
«جايىق وزەنىنە رەسەيدىڭ ورىنبور وبلىسىنداعى يريكلين سۋقويماسىنان جىبەرىلگەن سۋ قۇيادى. 1 ساۋىردە كورشى ەلدەگى سۋ قويماسىنان كەلەتىن سۋدىڭ كولەمى سەكۋندىنا 90-نان 390 تەكشە مەترگە دەيىن ارتقان. وسىعان بايلانىستى جايىق وزەنىنىڭ اتىراۋ وبلىسىنداعى جاعالاۋىنا زەردەلەۋ جۇرگىزىلدى. وبلىس اكىمى سەرىك شاپكەنوۆ جايىق وزەنىنىڭ يندەر, ماحامبەت اۋداندارى مەن اتىراۋ قالاسىنداعى جاعالاۋىنىڭ وسال تۇستارىنا ينەرتتى ماتەريالداردى توسەپ, قۇم تولتىرىلعان قاپپەن بەكىتۋدى تاپسىردى», دەدى ج.بيسەمبيەۆ.
اتىراۋ وبلىسى
