ۇلتتىق ەكونوميكا مينيسترلىگىنىڭ مالىمەتىنشە, وڭىردە 2021 جىلى يندۋستريالدىق ايماق قۇرىلعاننان كەيىن وڭ ديناميكا بايقالدى. قالا بيۋدجەتىنە تۇسكەن سالىقتىق اۋدارىمدار 4,5 ەسەگە ارتتى. 2 مىڭنان استام جاڭا جۇمىس ورنى قۇرىلدى جانە كولىك قۇرالدارىن, اۆتوموبيل دوڭگەلەكتەرىن, پوليەتيلەن قۇبىرلارىن, تۇرمىستىق تەحنيكا شىعاراتىن بىرقاتار ءوندىرىس ورنى اشىلدى.
«ساران قالاسى ايتارلىقتاي تۇرلەندى. دامۋ كورسەتكىشتەرى جوعارىلادى», دەدى و.بەكتەنوۆ.
ۇلتتىق ەكونوميكا مينيسترلىگىنىڭ جوسپارىنا سايكەس, وسى باعىتتاعى جۇمىستى ءارى قاراي جالعاستىرۋ ءۇشىن ەلىمىزدىڭ بىرنەشە مونوقالاسىندا وڭىرلىك ماڭىزى بار يندۋستريالىق ايماقتاردى قۇرۋ كوزدەلگەن. سونداي-اق بۇگىندە اقتوبە, قاراعاندى جانە اتىراۋ وبلىستارىنىڭ اكىمدىكتەرى ءتيىستى جوبالاردى جۇزەگە اسىرىپ جاتىر.
