فوتو: qaz.ulysmedia.kz
تالاي رەت ۇيىندە قوناق بولىپ, ءمانسيا كەلىننىڭ قولىنان ءدام تاتىپ, وسىناۋ كەڭ جازيرا دالامىزدى قايتسەك ءتورت ت ۇلىك مالعا تولتىرامىز, جۇدەگەن اۋىلدى قايتسەك كوتەرەمىز, جىلى ورنىن سۋىتىپ قالا بەزىپ كەتكەن حالىقتى قايتىپ ورنىنا قوندىرا الامىز با ەكەن دەپ بىرگە تولعانىپ, بىرگە قايعىرۋشى ەدىك. مۇندايدا ومەكەڭنىڭ ءار سوزىنەن ۇلكەن كورەگەندىكتىڭ, ءتۇبى جوق تەرەڭ ءبىلىمنىڭ, اقىل-پاراساتتىڭ, ەلگە دەگەن شىن جاناشىرلىقتىڭ لەبى ەسىپ تۇراتىن ەدى. ەڭبەك جولىن مال شارۋاشىلىعى سالاسىندا باستاعاندىقتان با, ءدال ءوزىم سياقتى ايتەۋىر اۋىلعا شىن جانى اۋىراتىن. مەنى ومەكەڭدى كورۋگە, بولماسا ءبىر ءسات قوڭىراۋ شالىپ اماندىعىن بىلۋگە اسىقتىرىپ تۇراتىن – ونىڭ وسى قاسيەتى ەدى. ويلاپ وتىرسام, تۋعان ىنىمدەي بولىپ كەتكەن ومىربەكپەن بىرگە وتكىزگەن از ۋاقىتتىڭ ءوزى ۇزاق ءبىر عۇمىرعا تاتيتىن قىمبات شاقتار ەكەن عوي.
اياۋلى ازاماتىمىز, وتباسىمىزبەن ارالاس-قۇرالاس سىيلاسىپ جۇرگەن ارداقتى دوسىمىز ورتامىزدان كەتىپ جاتىر دەگەن سۋىق حاباردى ەستىپ, بايىز تاۋىپ وتىرا المادىم. اناۋ اسپاننىڭ استىندا, مىناۋ جەردىڭ ۇستىندە ەندى ومىربەك دوسىمنىڭ جوق ەكەنىن سەزىنىپ, كومەيىمە وكسىك تىرەلدى. وزەگىمدى ءورت قارىدى. باقۇل بول, اياۋلى ازامات, ابزال دوس! جانىڭ ءجاننات نۇرىنا بولەنسىن! اللا ورنىڭدى جۇماق باعىنان ەتىپ, رۋحىڭدى يمان نۇرىنا بولەسىن! الدىڭ پەيىش, ارتىڭ كەنىش بولسىن!
ومىربەك بايگەلدى ەلگە سىڭىرگەن ەڭبەگى ەرەن, تاۋ تۇلعالى, ۇلكەن جۇرەكتى, كەسەك مىنەزدى, اسا ءبىلىمدى نار قازاقتىڭ ءبىرى ەدى. ءمانسيا كەلىنگە, ومەكەڭنىڭ اۋلەتىنە, ۇرپاعىنا قايعىلارىنا ورتاقتاسىپ, كوڭىل ايتامىن. اللا الدىنان جارىلقاپ, ارتىنىڭ قايىرىن بەرسىن. كورنەكتى قايراتكەردىڭ, ابزال ازاماتتىڭ جاتقان جەرى جايلى, يمانى كوركەم بولسىن!
كاكىمجان كاربوزوۆ,
قوستاناي وبلىسىنىڭ قۇرمەتتى ازاماتى اۋىلشارۋاشىلىق سالاسىنىڭ قۇرمەتتى ارداگەرى
