تاۋەلسىز قازاقستان پارلامەنتى سەناتىنىڭ تۇڭعىش توراعاسى بولعان ومىربەك بايگەلدى اعامىز بار عۇمىرىندا تۋعان ەلى مەن حالقىنا ادال قىزمەت ەتكەن ۇلتجاندى ازامات ەدى. ارعى-بەرگى تاريحىمىزدى تەرەڭ بىلەتىن, حالىقتىڭ وتكەنى مەن بۇگىنى تۋرالى جۇرگەن ورتاسىندا اعالىق وي-پىكىرى مەن جاناشىرلىق كوڭىلىن ءبىلدىرىپ وتىراتىن. ۇلتىمىزدىڭ تاريحىن تەرەڭنەن زەرتتەپ, شەت ەلدەردەن بابالارىمىز جايىندا قۇندى دەرەكتەر تاۋىپ, ءتول تاريحىمىزدى تۇگەندەۋگە دە اتسالىسقان تۇلعا بولاتىن.
ومىربەك بايگەلدى ۇلى قازاقستان رەسپۋبليكاسى پارلامەنتىنىڭ قالىپتاسۋىندا ءوزىنىڭ مول ءبىلىمى مەن بۇكىل قاجىر-قايراتىمەن ەڭبەك ەتتى. بار ءبىلىمى مەن تاجىريبەسىن ەلىمىزدى كوركەيتۋگە, نىعايتۋعا جۇمسادى. قاي قىزمەتتە جۇرسە دە, ادامگەرشىلىك قاسيەتتەرىمەن ارىپتەستەرىنىڭ اراسىندا ءاردايىم زور ابىروي مەن بەدەلگە يە بولدى. ەڭبەگى ەلەنىپ جوعارى مەملەكەتتىك ناگرادالارمەن ماراپاتتالدى.
تاۋەلسىزدىككە قول جەتكىزگەن جىلدارى ەلدىگىمىزدى ەڭسەلى ەتۋدىڭ باستاۋىندا تۇردى. ەل ەكونوميكاسى مەن الەۋەتىن وركەندەتۋ جولىندا ءوزىنىڭ ءبىلىمىن, مول تاجىريبەسىن جانە ىسكەرلىگى مەن بىلىكتىلىگىن كورسەتتى.
ەل مۇددەسىن, حالىقتىڭ بولاشاعىن ساتكە دە ەسىنەن شىعارعان ەمەس. مەملەكەتتىك قىزمەتتىڭ جوعارى ساتىسىندا جۇرگەندە ءوزىنىڭ ۇلكەن مادەنيەتتىگى مەن يماندى ىزەتتىلىگىمەن, حالىق ءداستۇرىن جاقسى بىلەتىن تاعىلىمى تەرەڭ, وي-ورەسى بيىك جان ەكەنىن تالاي مارتە تانىتتى.عيبراتتى عۇمىر يەسى ناعىز پاراساتتى تۇلعا, مۇراتى بيىك ازاماتتىڭ ءبىرى بولدى.
ومىربەك بايگەلدى ۇلى اعامىزدىڭ جارقىن بەينەسى ءاردايىم جادىمىزدا ساقتالادى!
باقتىقوجا ىزمۇحامبەتوۆ,
پارلامەنت ءماجىلىسىنىڭ دەپۋتاتى, «ارداگەرلەر ۇيىمى»
رقب ورتالىق كەڭەسىنىڭ توراعاسى, قازاقستاننىڭ ەڭبەك ەرى
