ق.بيشىمباەۆتىڭ ايتۋىنشا ايەلىنىڭ ولىمىنە دەيىن ەكەۋىنىڭ اراسىندا جاقسى قارىم-قاتىناس بولعان. جاقسى كوڭىل-كۇيدە ەكەۋى سالتاناتتىڭ قۇربىسىمەن بىرگە كونتسەرتكە دە بارعان.
«مەن ەشقاشان سالتاناتتى قاساقانا ولتىرەمىن دەپ ويلاماعام. ءبىز ءبىر-ءبىرىمىزدى جاقسى كوردىك. سول كۇنى ءبىز ۇيقىدان جاقسى كوڭىل-كۇيمەن وياندىق. سالتاناتتىڭ قۇربىسى ديما بيلاننىڭ كونتسەرتىنە شاقىردى. سالتانات مەنىڭ دە ولارمەن بىرگە بارعانىمدى قالادى. مەنىڭ ول كونتسەرتكە بارعىم كەلگەن جوق. بىراق سالتاناتتىڭ كوڭىلىن قالدىرعىم كەلمەدى. سولاي بىرگە باراتىن بولىپ شەشتىك. سالتانات كونتسەرتكە كيىپ باراتىن دۇرىس كيىمىم جوق دەپ بۇلدانا باستادى. ونىڭ زاتتارىنىڭ كوپ بولىگى پاۆلوداردا قالعان ەدى. سودان وعان كيىم الۋعا دۇكەنگە باردىق. ول بىرنەشە كيىم الدى. كەيىنىرەك قۇربىسىمەن كەزدەسۋگە كەتتى, ال مەن ءوز جۇمىستارىممەن كەتتىم», دەدى ق.بيشىمباەۆ.
بۇدان سوڭ سالتانات قۇربىسى ايدامەن مەيرامحانادا جولىققان. ولار قۋاندىققا شامپان الا كەلۋىن سۇراعان. قۋاندىق شامپان الىپ كەلەمىن دەپ كونتسەرتكە كەشىگىپ كەلگەن. ال بۇل سالتاناتقا ۇناماعان. كەيىنىرەك كونتسەرت زالىنا كەلگەندە قۋاندىق تانىس قۇربىسىن كورىپ امانداسقاندا سالتانات قىزعانىشىن بىلدىرگەن.
«مەن كونتسەرتتە ۇزاق وتىرا المادىم, سالتاناتقا قايتقىم كەلەتىنىن ايتتىم. بۇل ارەكەتىم دە سالتاناتقا ۇنامادى. كونتسەرتتەن شىعىپ, گاردەروب جانىندا ۇرىس شىعارا باستادى. قۇربىسىنىڭ الدىندا ۇياتقا قالدىردىڭ دەپ رەنجىدى. بۇرىنعى رەنىشتەرىن قايتا ايتىپ, ۇرىس ۋشىعىپ كەتتى. ەكەۋىمىز جاياۋ مەيرامحاناعا باردىق. ول جاقتا دا كەكىلجىڭ ۇزاققا سوزىلدى», دەدى ايىپتالۋشى.
