فوتو: gov.kz
بۇل شەشىم «اۋىل اماناتى» باعدارلاماسىنىڭ 2023 جىلعى جۇمىس قورىتىندىسىن تالداۋ جانە وڭىرلەردەن كەلىپ تۇسكەن وتىنىشتەر ناتيجەسى بويىنشا قابىلداندى. بىلتىر اۋىل تۇرعىندارىنا باعدارلاما بويىنشا بولىنگەن جالپى سوماسى 100 ملرد تەڭگە قولجەتىمدى شاعىن نەسيەنىڭ 82,4 ملرد تەڭگەسى يگەرىلگەن. ونىڭ 80%-ى – مال شارۋاشىلىعىنا, 5,2%-ى – تەحنيكا مەن جابدىققا, 4%-ى وسىمدىك شارۋاشىلىعىنا باعىتتالدى.
قەڭەسكە قاتىسۋشىلار «اۋىل اماناتى» باعدارلاماسى اۋىل شارۋاشىلىعى كووپەراتيۆتەرىنىڭ دامۋىنا سەرپىن بەرگەنىن اتاپ ءوتتى. بىلتىر باعدارلاما اياسىندا 407 اۋىل شارۋاشىلىعى كووپەراتيۆى قۇرىلدى. ولاردىڭ باسىم بولىگى تۇركىستان (75), اقتوبە (71), قاراعاندى (53), قىزىلوردا (51) وبلىستارىنا تيەسىلى. وڭىرلەردەگى شارۋالار ليزينگكە تەحنيكا ساتىپ الۋ ءۇشىن جۇمىس ىستەپ تۇرعان كووپەراتيۆتەرگە وسى باعدارلاما نەگىزىندە قولجەتىمدى قارىز قاراجاتىن الۋ مۇمكىندىگىن كوتەردى.
«سۋبسيديالاۋ ەرەجەسىنە تۇزەتۋلەر جوباسى اۋىل شارۋاشىلىعى كووپەراتيۆتەرى ءۇشىن 5 جىلعا دەيىنگى مەرزىمگە جىلدىق 2,5%-بەن اۋىل شارۋاشىلىعى تەحنيكاسىن ليزينگتەۋ مۇمكىندىگىن قاراستىرادى. قارجىلاندىرۋ رەسپۋبليكالىق جانە جەرگىلىكتى بيۋدجەت ەسەبىنەن جۇزەگە اسىرىلادى. باعدارلاما بويىنشا اۋىل شارۋاشىلىعى تەحنيكاسىن ساتىپ الۋ ءۇشىن قارجىلاندىرۋ ءنورماتيۆىن ارتتىرۋدامىز», – دەدى اۋىل شارۋاشىلىعى ۆيتسە-ءمينيسترى ازات سۇلتانوۆ.
ءوز تاراپىنان سەرىك جۇمانعارين وڭىرلەرگە جىل سايىن وبلىستىڭ ءار اۋدانىندا 1-2 اۋىل شارۋاشىلىعى كووپەراتيۆىن قۇرۋعا جاعداي جاساۋ مىندەتىن قويدى.
