سوڭعى مالىمەت بويىنشا وبلىس اۋماعىندا قاۋىپتى جەرلەردەن 4525 ادام ەۆاكۋاتسيالاندى, ونىڭ 1771-ءى – بالا. قاۋىپسىز ورىندارعا 1425-تەن استام ءىرى قارا, 2004 باس ۇساق مال جانە 33 باس جىلقى ايدالعان.
بارلىعى 764 مىڭ مەتردەن استام ەرىگەن سۋ سورىلىپ, 161 مىڭنان استام قاپ توسەلدى.
«قازىر وبلىس بويىنشا 1 مىڭنان استام ادام تاسقىنعا قارسى كۇرەسىپ ءجۇر, 300-دەن اسا تەحنيكا جانە 100-دەن اسا موتوسورعى جۇمىلدىرىلعان», دەپ حابارلادى توتەنشەلىكتەردىڭ ءباسپاسوز قىزمەتى. ولار كۇشەيتىلگەن رەجىمدە جۇمىس جۇرگىزىپ جاتىر.
شىڭعىرلاۋ, جاقسىباي, ولەڭتى, بۇلدىرتى وزەندەرىندەگى سۋ دەڭگەيى كوتەرىلۋى ناتيجەسىندە 4 اۋداننىڭ 9 اۋىلىنداعى تۇرعىن ۇيلەردى سۋ باسقان. بارلىعى 515 تۇرعىن ءۇي سۋ استىندا قالدى. بۇل سان ءالى ناقتىلانىپ, تەكسەرۋدەن كەيىن جەرگىلىكتى اتقارۋشى ورگاندار كوميسسياسى زالالدى باعالايدى. ونىڭ ناتيجەسى بويىنشا سۋ باسقان ۇيلەردىڭ ناقتى سانى ايقىندالادى.
ءبورلى اۋدانىندا 2 ساۋىردە ساعات 07:00 شاماسىندا بوگەتتىڭ ەكى جەرىنەن سۋ تولعانى انىقتالىپ, دەرەۋ شارالار جاسالدى. سوڭعى مالىمەت بويىنشا, وبلىستا 25 جەردە اۆتوجولداردىڭ ۇستىنەن سۋ ءوتىپ كەتسە, 32 تۇستا سۋ شايىپ, جولدى بۇلدىرگەنى انىقتالدى.
تاۋلىك بويى قىزمەت ەتىپ تۇرعان بقو تجد جەدەل شتابىنا 2 مىڭنان اسا, «قاۋىرت جەلى» تەلەفونىنا 296 قوڭىراۋ ءتۇستى. قازىرگى ۋاقىتتا جاعداي تۇراقتى كۇردەلى بولعانىمەن, ءتيىستى مەكەمەلەر باقىلاپ وتىر.
«قازگيدرومەت» فيليالى بۇگىننەن باستاپ كۇن جىلىناتىنىن, اۋا تەمپەراتۋراسى كوتەرىلەتىنىن حابارلادى. وسىعان وراي سۋ تاسقىنى قاۋپى ساقتالادى. قازىر ءتيىستى ماماندار جاعدايعا مونيتورينگ جۇرگىزىپ, سۋ باسۋ قاۋپى بولعان جاعدايدا ەۆاكۋاتسيالىق شارالارعا كىرىسۋگە دايارلىق جاساپ جاتىر.
