كوپتەن كۇتكەن نارەستە دۇنيەگە كەلگەندە, اتا-اناسىنىڭ قۋانىشىندا شەك بولمادى. تەك ءبىر ەرەكشەلىگى عانا اكە-شەشەسىن قاتتى الاڭداتادى. ول – ءسابيدىڭ مۇلدەم جىلامايتىنى. ادەتتە اتا-انالار جاس ءسابيىن جۇباتا الماي الەككە ءتۇسۋشى ەدى. ال حانۋمانىڭ جىلامايتىنى كەرىسىنشە اتا-اناسىن ۋايىمداتا باستادى. بىراق دارىگەرلەر نارەستەنىڭ دامۋىندا ەشقانداي اۋىتقۋ جوق ەكەنىن ايتىپ, ولاردىڭ كوڭىلىن تىنىشتاندىرادى. جىلدار وتەدى. قىز تىلالعىش, ءتارتىپتى بولىپ ءوسىپ, اناسىنا قولعابىس جاسايتىن جاسقا جەتەدى. ءبىر كۇنى كۇتپەگەن جەردەن (بار قىزىقتىڭ وسىلاي كۇتپەگەن جەردەن باستالاتىن ادەتى عوي) حانۋما پياز ارشىپ وتىرعاندا كوزىنەن قاتتى تۇيىرشىكتەر تامىپ تۇسەدى. ءيا, بۇل – جاس ەدى. ەندى تاڭقالارلىعى دا سول – ونىڭ كوز جاسى كريستالدى اسىل تاس بولىپ شىقتى. بۇل ەرەكشە كريستالداردىڭ قۇرامى ءالى كۇنگە دەيىن بەلگىسىز. عالىمدار وسى قۇبىلىستى تۇسىندىرە الماي كەلەدى. ەڭ ءبىر قۋاناتىن ءارى تاڭعالاتىن نارسە حانۋماعا بۇل قاتتى كوز جاسى ەشقانداي كەدەرگى جاساپ, زيانىن تيگىزبەيدى. «حانشايىمنىڭ مەرۋەرت كوز جاسى» دەگەندى ەرتەگىلەردە عانا بولاتىن عاجايىپ دەپ ويلاۋشى ەدىك. ەندى, مىنە, ەرتەگىنىڭ شىنعا اينالعانىنا انىق كوزىمىز جەتىپ وتىر.
پەرىشتەسى قاققان بالا
تاريحتى اقتارساڭىز ادام سەنگىسىز تالاي-تالاي تاڭعاجايىپقا تاپ بولاسىز. ءبىرىن بىلسەك, ءبىرىن بىلە بەرمەيمىز. ال بۇل 1937 جىلى اقش-تا بولعان وقيعا ەدى.
ءبىر كۇنى اۋلا سىپىرۋشى دجوزەف فيگلوك ەسىمدى دەترويت قالاسىنىڭ تۇرعىنى كوپقاباتتى ءۇيدىڭ جانىنان ءوتىپ بارا جاتادى. كەنەت توبەدەن... دجوزەفتىڭ باسىنا ءتورتىنشى قاباتتان ءبىر جاسار بالا قۇلاپ تۇسەدى. باعىنا وراي بالدىرعان دا امان قالادى, دجوزەفتىڭ دە جاراقاتى جەڭىل بولادى. سويتسە, ءسابيدىڭ اناسى تەرەزەنى جابۋدى ۇمىتىپ كەتىپتى. بالدىرعان بىلسەم ەكەن, كورسەم ەكەن دەگەن قۇمارلىقپەن تەرەزەنىڭ جاقتاۋىنا شىعىپ, تومەن قاراي قۇلديلاعان. قايتا اۋلا سىپىرۋشىنىڭ باسىنا ءتۇسىپ امان قالادى. عاجايىپ مۇنىمەن اياقتالعان جوق. تۋرا ءبىر جىل وتكەننەن كەيىن تاعى ءبىر تاڭعالارلىق وقيعا بولادى. ياعني 1938 جىلى دجوزەف فيگلوك سول كوشەنىڭ بويىمەن, الگى ءۇيدىڭ جانىنان ءوتىپ بارا جاتقان ساتتە, باياعى بالا تاعى دا ونىڭ باسىنا قۇلاپ ءتۇسىپ, امان قالادى. تاپ سول ساتتە نە كۇلەرىن, نە جىلارىن بىلمەي قالعان اۋلا سىپىرۋشىسىنىڭ ەسىمى وسىلايشا تاريحتا قالعان ەكەن.
