ول بىردە كوشەدە سەرۋەندەپ كەلە جاتىپ جول جيەگىندە جارالانعان يتكە كوزى تۇسەدى. كولىك قاعىپ كەتكەن ەكەن. بايعۇس يت قوزعالۋعا دارمەنسىز قالپى قىڭسىلاپ جاتىر. ەكى اياعى سىنىپ كەتكەن سياقتى. تۇسىنان زىمىراپ جاتقان كولىكتەر جارالى ءيتتى قايتادان قاعىپ كەتە مە دەپ, بالانىڭ زارەسى ۇشادى.
ول بۇل جولى دا جاقسىلىق جاساۋدىڭ ءساتى كەلگەنىن تۇسىنەدى. سودان كولىكتەردىڭ قوزعالىسىن توقتاتىپ, ءيتتى قاۋىپسىز جەرگە سۇيرەپ اكەلەدى. ءسويتىپ اياقكيىمىنىڭ باۋىمەن جاراسىنان اققان قاندى تاڭىپ, توقتاتپاقشى بولادى. اسقان ۇقىپتىلىقپەن قولىن سوزىپ جاتقانى سول ەدى, جارالى يت ونى قاۋىپ الادى. سول زاماتتا-اق بالانىڭ قولى ءىسىنىپ, اتا-اناسى ونى ەمحاناعا الىپ كەتەدى.
بالا ءيتتىڭ ارەكەتىن ۇزاق ويلانادى. «نەگە ول مەنى تىستەپ الدى؟ مەن وعان كومەكتەسكىم كەلدى عوي. مەن وعان زيان جاساعىم كەلمەپ ەدى», دەيدى ىشكى داۋسى.
بالانىڭ باستاپقى نيەتى ءيتتى ەمدەپ, ونى ۇيىنە الىپ كەلۋ ەدى. ارتىنان اينىماس دوسىنا اينالعىسى كەلدى. الايدا ونىڭ ومىرىندە مۇنداي جاعداي ءبىرىنشى رەت بولدى. ول جاقسىلىق جاساعىسى كەلگەندە, ونى كەرىسىنشە رەنجىتتى. سەبەبىن ۇقپادى. بىرەۋ وزىنە جامان قارايتىن ادامعا زيان جاساسا – تۇسىنىكتى. ال بىرەۋگە كومەكتەسكىسى كەلىپ, اقىسىنا زيان شەكسە – نە دەيمىز؟
ارادا ءبىراز جىل ءوتىپ, بالا ەسەيگەندە ءبارىن ءتۇسىندى. ونى تىستەگەن ءيتتىڭ ءوزى ەمەس, ونىڭ ىشىندەگى اۋرۋ مەن قورقىنىشى ەكەن. كەي كىسىلەردىڭ كوڭىلى جابىرقاپ, ءوزىن ناشار سەزىنىپ جاتقاندا الدەبىرەۋدىڭ ماحابباتى مەن قامقورلىعىنا وسىلاي «تىستەنىپ» جاۋاپ قايتاراتىنى سوندىقتان ەكەن عوي.
ادامنىڭ شادىمان حالىنەن بولەك, ناشار كۇيىن دە قابىلداي ءبىلۋ كەرەك. سەنى كىنالاعان, ۇرىسقان, بالاعاتتاعان جاننىڭ بارلىعى سەنى جەك كورگەننەن ىستەمەيدى. ولارمەن سەن سالعىلاسپا, جاي عانا تۇسىنۋگە تىرىس. بالكىم, ونىڭ دا جانى جارالى شىعار.
