جوعارىداعى اڭگىمەنىڭ 57 كگ سالماق دارەجەسىندە ونەر كورسەتىپ جۇرگەن بۇرىمدىلارعا ەش قاتىسى جوق. ويتكەنى بۇل سالماقتىڭ ۇزدىگى الدەقاشان انىقتالىپ قويعان. تارقاتىپ ايتساق, بىلتىر قىتايدىڭ حانچجوۋ قالاسىندا الاۋى تۇتانعان جازعى ازيا ويىندارىندا كارينا يبراگيموۆا كۇمىس مەدالدى موينىنا ءىلىپ, پاريج وليمپياداسىنىڭ جولداماسىن يەلەندى. بيىل ناۋرىز ايىنىڭ باسىندا يتاليانىڭ بۋستو-ارسيتسيو قالاسىنداعى ىرىكتەۋ سىنىندا بەس بوكسشى باق سىناعان ەدى. وكىنىشكە قاراي, جەرلەستەرىمىزدىڭ بارلىعى دا اتالعان جارىستا جەڭىلىستىڭ كەرمەك ءدامىن تاتىپ, ەلگە قۇرالاقان ورالدى.
جالپى, ەلىمىزدىڭ ايەلدەر بوكسى جونىندە جاعىمسىز اڭگىمەلەر بۇعان دەيىن دە ءجيى ايتىلىپ جۇرگەن. اپەننين تۇبەگىندەگى ساتسىزدىكتەن كەيىن الىپ-قاشپا سوزدەر, تىپتەن ءورشي ءتۇستى. بۇل اڭگىمەنىڭ بارلىعى دا «تورەشىلەر بۇرا تارتۋدان ارلانبايدى. جەڭىپ تۇرساڭ دا, جەڭىستى بەرمەيدى», «ۇلتتىق قۇراما باپكەرلەرى ماڭىزدى باسەكەلەرگە وزدەرىنىڭ ءتول شاكىرتتەرى مەن كوڭىلى تۇسكەن بىلعارى قولعاپ شەبەرلەرىن عانا اپارادى, باسقالارىمىز تاسادا قالىپ قويامىز», «ادىلدىك تالاپ ەتسەڭ, باسىڭ پالەگە قالادى. ونداي جاعدايدا نە جارىستان شەتتەتەدى, نە كوماندادان قۋىلاسىڭ» دەگەنگە سايادى. ال ول از دەسەڭىزدەر, تانىمال بوكسشى انگەلينا لۋكاس «قۇراما ساپىنداعى كەيبىر قىزدار مۇلدەم رەجىم ساقتامايدى. وقۋ-جاتتىعۋ جيىنى كەزىندە ولار تىعىلىپ قورقور شەگەدى, ىشىمدىك ىشەدى», دەپ ايدى اسپانعا ءبىر-اق شىعاردى. شىنى كەرەك, ءبىز بۇل اڭگىمەلەردىڭ قايسىسى راس, قايسىسى وتىرىك ەكەنىن بىلمەيمىز. بىراق ءبىر بىلەتىنىمىز, بۇگىندە ەلىمىزدىڭ ايەلدەر بوكسى قاتتى قۇلدىراعان. الىسقا بارماي-اق, بىلتىرعى ازيا ويىندارى مەن تاياۋدا عانا وتكەن ليتسەنزيالىق ءتۋرنيردىڭ ناتيجەسىنە زەر سالساق, كوپ نارسەگە كوز جەتكىزەمىز.
شەگىنەرگە جول قالماعاننان سوڭ, ۇلتتىق كۇرامانىڭ باس باپكەرى ءشامىل سافيۋللين قبف باسشىلارىمەن اقىلداسا وتىرىپ, 8-10 ءساۋىر ارالىعىندا استانادا سپاررينگ وتكىزۋدى ءجون كوردى. وسى سىناققا شاقىرتۋ العاندار اراسىندا انگەلينا لۋكاس پەن بالاۋسا مۇزديمان دا بار. كەزىندە ولار ۇلتتىق قۇراما ساپىندا تابىستى ونەر كورسەتتى. بىراق ەسىمدەرى اتالعان بۇرىمدىلاردىڭ بايراقتى باسەكەلەرگە قاتىسقان كەزدەرى تىم سيرەك. ولار ۇنەمى تاسادا قالىپ ءجۇردى. ءتوزىمى تاۋسىلعاننان كەيىن قوس ارۋ كاسىپقوي رينگتە جۇدىرىقتاسۋدى قۇپ كوردى. ازىرگە ەكەۋىنىڭ دە «شابىسى» شيراق. لۋكاس پەن مۇزديمان ورەلى ونەرىمەن جانكۇيەرلەرىن قۋانتىپ ءجۇر. وسى جايتتىڭ بارلىعىن وي ەلەگىنەن وتكىزىپ, اقىل تارازىسىنا سالعاننان كەيىن باپكەرلەر ولارعا تاعى ءبىر مۇمكىندىك بەردى. ويتكەنى سەنىم ارتقان سپورتشىلار سىن ساعاتتا ءسۇرىنىپ ءجۇر. ولاردى الماستىراتىن جالىندى جاستار جوقتىڭ قاسى. ءسويتىپ, 54 كگ سالماقتاعىلاردىڭ سپاررينگىندە انگەلينا پەن بالاۋسادان بولەك, جاينا شەكەربەكوۆا, انەل ساقىش, ەلينا بازاروۆا, ۇلجان سارسەنبەك, سىمبات الياسقار سىندى سپورتشىلار باق سىنايدى.
50 كگ سالماقتا ەكى ۇمىتكەر بار. ولار – نازىم قىزايباي مەن الۋا بالقىبەكوۆا. ەكەۋى دە – تاجىريبەلەرى ابدەن تولىسقان, اتاقتارى الىسقا جايىلعان ساقا سپورتشىلار. اتاپ ايتساق, نازىم – الەمنىڭ ەكى دۇركىن چەمپيونى, قۇرلىق بىرىنشىلىگىنىڭ جەڭىمپازى. الۋا دا ازيادا الدىنا جان سالماي, دۇنيەجۇزىلىك دودادا ەكى رەت جۇلدەگەرلەر قاتارىنا قوسىلدى. 66 كگ سالماق دارەجەسىندە داريعا شاكىموۆا, ناتاليا بوگدانوۆا, لاۋرا ەسەنكەلدى, جاسمين قيزاتوۆا كۇش سىناسادى. 75 كگ سالماقتا گۇلسايا ەرجانوۆا, ۆالەنتينا حالزوۆا, جىبەك جاراسقىزى شەبەرلىك بايقاسادى. سولاردىڭ اراسىنان سۋىرىلىپ شىققاندارى بانگكوكتاعى ليتسەنزيالىق تۋرنيرگە قاتىسادى. ال تاي ەلىندە باعى جانعان بوكسشىلار پاريج وليمپياداسىندا ونەر كورسەتۋ مۇمكىندىگىنە يە بولادى.
وسى ورايدا استانادا كۇش سىناساتىندار تىزىمىندە 60 كگ سالماقتاعى بوكسشىلاردىڭ جوق ەكەنىن دە ايتا كەتۋگە ءتيىسپىز. سەبەبى يتالياداعى جارىستا جولداماعا قولسوزىم قالعاندا سۇرىنگەن ريمما ۆولوسەنكونىڭ جاراقاتى بار. قازىر ول سونىڭ الەگىمەن ءجۇر. ەلىشىلىك جارىستاردا وعان ۆيكتوريا گرافەەۆا عانا قارسىلىق كورسەتە الادى. بىراق باپكەرلەردىڭ پايىمداۋىنشا, ريممانىڭ شەبەرلىك دەڭگەيى ۆيكتوريادان ەداۋىر جوعارى. سول سەبەپتى بۇل سالماقتا سپاررينگ وتپەيدى. ال بانگكوكقا كىمنىڭ باراتىنى وقۋ-جاتتىعۋ جيىنى بارىسىندا انىقتالادى.
