اسىرەسە ءبىز قامشىبەك قوڭقاباەۆتىڭ جەڭىلگەنىنە قىنجىلدىق. اسا اۋىر سالماقتا كۇش سىناسقان قانداسىمىز تۇساۋكەسەر كەزدەسۋىندە ەسىمى كوپشىلىككە بەيمالىم رامازان كارنۋكاەۆقا جول بەردى. ينگۋشەتيانىڭ تۋماسى 2021 جىلى جاستار اراسىندا رەسەي چەمپيونى اتانىپ, 2022 جىلى بۇكىلرەسەيلىك سپارتاكيادادا قولا مەدالدى يەلەندى. بار بەلەسى – سول عانا. مىنە, قازاقتىڭ بەتكەۇستار بوكسشىسى سوعان ەسە جىبەردى. وسى جەكپە-جەككە بايلانىستى جانكۇيەرلەر ءتۇرلى پىكىر ايتىپ جاتىر. كەيبىرەۋلەر «وليمپيا ويىندارىنىڭ جولداماسىن كۇنى بۇرىن ولجالاعان قوڭقاباەۆ قازىر بابىندا ەمەس, ول مۇلدەم بوساڭسىپ كەتكەن» دەسە, بازبىرەۋلەر «كەلەسى كەزەڭدە ءوزىنىڭ سىرالعى قارسىلاسى باحودير جالولوۆپەن جولىقپاۋ ءۇشىن قامشىبەك وسىنداي قادامعا باردى» دەپ توپشىلادى. بۇل رەتتە قوس تاراپپەن دە كەلىسۋگە بولادى. ءبىزدىڭ ويىمىزشا, قامشىبەك وزبەكتىڭ وعلانىنان قايمىققان سەكىلدى. باسقا ايتار ءۋاجىمىز جوق.
ازەربايجاننىڭ استاناسىنداعى جارىس الەم جانە ازيا چەمپيوناتتارىنىڭ كۇمىس جۇلدەگەرى سەرىك تەمىرجانوۆ ءۇشىن دە ءساتسىز اياقتالدى. 63,5 كگ سالماقتا سىنعا تۇسكەن ول رينگ قوجايىنى رۋسلان رۋستاموۆتان ۇتىلدى. سول سەكىلدى دامير ابدىقادىر (51 كگ) يراندىق مەحدي پارۆيزيگە, تيمۋر نۇرسەيىتوۆ (75 كگ) وزبەكستاندىق الىشەر ايۋپوۆتان ايلاسىن اسىرا المادى.
فينالدا بەس جەرلەسىمىز جۇدىرىقتاستى. شەشۋشى تۇستا تالعات سىرىمبەتوۆ (60 كگ) ازەربايجاندىق ازراك بابىروۆتى, دارحان دۇيسەباي (71 كگ) وزبەكستاندىق بەكزود حاميدوۆتى, ال ساعىندىق توعامباي (92 كگ) الفونسو دومينگەستى ۇتتى. بۇل رەتتە توعامبايعا ەرەكشە توقتالا كەتكەن ءجون. اقتىق سىندا ول تىم ازۋلى قارسىلاسقا تاپ بولدى. ازەربايجاننىڭ تۋى استىندا ونەر كورسەتىپ جۇرگەن كۋبالىق قابىلاننىڭ توكيو وليمپياداسىنىڭ قولا جۇلدەگەرى, ەۋروپا ويىندارىنىڭ جەڭىمپازى, 2021 جىلعى الەم چەمپيونى جانە 2022 جىلعى سول جارىستىڭ ءفيناليسى دەگەن اتاعى بار. بىراق قازاقتىڭ ۇلى ودان قايمىققان جوق. باسەكەنىڭ باسىنان اياعىنا دەيىن قارقىنىن ەش باسەڭدەتپەگەن ساعىندىقتىڭ جەڭىسىنە ەشكىمنىڭ كۇمانى بولعان جوق.
اقتىق سايىستا ازەربايجاندىق حاسان مالىكوۆتەن ۇتىلعان تەمىرتاس ءجۇسىپوۆ (48 كگ) كۇمىس مەدالدى ەنشىلەدى. جارتىلاي فينالدا ەۋروپا چەمپيونى, رەسەيلىك ماكسيم كۋزنەتسوۆتى قاپى قالدىرعان تيمۋر قابدەشوۆ (54 كگ) فينالدا وزبەكستاندىق حۋجانازار نورتوجيەۆپەن كۇش سىناستى. ەكىنشى راۋندتا ول قارسىلاسىن نوكداۋنعا جىبەردى. بىراق كەيىنگى كەزەڭدە قانداسىمىزدىڭ قاباعى جارىلدى. سونىڭ سالدارىنان جەكپە-جەك مەرزىمىنەن بۇرىن توقتاتىلىپ, تيمۋر كۇمىس مەدالدى قاناعات تۇتتى. ال جارتىلاي فينالدا سۇرىنگەن بەكزات تاڭاتار (86 كەلى) قولاعا قول سوزدى.
ناتيجەسىندە, 3 التىن, 2 كۇمىس جانە 1 قولا جۇلدەنى ولجالاعان قازاقستاننىڭ بوكسشىلارى جالپى ەسەپتە ءۇشىنشى ورىندى يەلەندى. الدىمىزدا – وزبەكستان (5+6+5) مەن ازەربايجان (3+3+0) قۇرامالارى.
