فوتو: halyq-uni.kz
دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, ەلىمىزدە كورۋ قابىلەتى ناشارلاعان 160 مىڭ ادام بار. سول ازاماتتارعا ارنايى ازىرلەنگەن قوسىمشا ەكرانداعى حابارلاردى دىبىستاپ وقىپ بەرەدى. اتالعان قۇرىلعىنىڭ كومەگىمەن پايدالانۋشىلار ۆەب-بەتتەردى, ەلەكتروندى حاتتاردى, قۇجاتتاردى وڭاي شولىپ, قازاق تىلىندەگى جاڭالىقتارعا قول جەتكىزە الادى.
– «ەكراندىق ديكتور» قوسىمشاسى «اقپاراتقا قول جەتكىزۋ تۋرالى» زاڭعا سايكەس ءتىل ساياساتى كوميتەتىنىڭ تاپسىرماسى بويىنشا ازىرلەندى. بارلىق ازاماتقا مەملەكەتتىك تىلدە اقپارات الۋعا مۇمكىندىك جاسالۋى كەرەك. ەندى كورۋ قابىلەتى ناشار جاندار كەز كەلگەن اقپاراتتى قازاق تىلىندە اۋديو ارقىلى تىڭداي الادى. العاش رەت انا تىلىمىزدە قىزمەت كورسەتەتىن باعدارلاما بولعاندىقتان دايىنداۋعا از ۋاقىت كەتكەن جوق. جوبانى ازىرلەۋ بارىسىندا جاساندى ينتەللەكتى مۇمكىندىكتەرىن پايدالاندىق, دەدى ء«تىل-قازىنا» ۇلتتىق عىلىمي-پراكتيكالىق ورتالىعىنىڭ باس ديرەكتورى ماقپال جۇماباي.
ەكران ديكتورىنىڭ كوپتەگەن قىزمەتى بار. ماسەلەن, تەك سمارتفوندارعا عانا ەمەس, دەربەس كومپيۋتەر, پلانشەت سەكىلدى تەحنيكالىق قۇرالدارعا دا ورناتىلادى. پايدالانۋشىلارعا pdf, txt, doc فورماتىنداعى قۇجاتتاردى وقۋعا مۇمكىندىك بەرەدى. سونىمەن قاتار قولدانۋشى ءوزى باسقارا الاتىن پەرنەتاقتا پارمەندەرىنىڭ كەڭ جيىنتىعىن جاساي الادى. باستىسى, ينتەرنەتتىڭ كومەگىنسىز-اق قاجەتتى باپتاۋلاردى ورناتىپ, وفلاين رەجىمدە جۇمىس ىستەيدى. قوسىمشانى الدىن الا مۇمكىندىگى شەكتەۋلى جاندار اراسىندا تەستىلەۋدەن وتكىزگەن.
– بۇل قۇرالدىڭ انا تىلىمىزدە شىققانى قۋانتادى. شەتەلدەردە ەكران ديكتورى بۇرىننان بار. بۇعان دەيىن ورىس تىلىندەگى قوسىمشانى پايدالانىپ ءجۇر ەدىم. ەندى انا تىلىمىزدە قولدانا الاتىنىما قۋانىپ وتىرمىن. سمارتفونداعى ارەكەتتەردى قازاق تىلىندە دىبىستاپ تۇرادى. شيكىلىكتەر بار, ارينە. الايدا «كوش جۇرە تۇزەلەدى» دەگەندەي, ۇيىمداستىرۋشىلار الداعى ۋاقىتتا ءالى دە تولىقتىرۋ بولاتىنىن ايتتى. قوسىمشانى جاساپ شىعارعان ماماندارعا العىسىمدى ايتامىن. قۋانىشتىسى, داۋىستىڭ جىلدامدىعىن جانە ىرعاعىن وزىمىزگە ىڭعايلى ەتىپ وزگەرتە الامىز, دەدى جوبانى تەستىلەۋشى زيات نۇرلان ۇلى.
الەمدىك ستاندارتتار نەگىزىندە جاسالعان ءموبيلدى قوسىمشا ازىرگە Android قۇرىلعىلارى ءۇشىن قولجەتىمدى. ءساۋىر ايىندا IOS قۇرىلعىلارىنا ارناپ شىعارماق. ۆەب-قوسىمشادا 72 ساعاتتىق وڭدەلگەن ءماتىن وقىلادى. باعدارلاماعا كىرەردە ەر نەمەسە ايەلدىڭ داۋىسىن تاڭداۋ مۇمكىندىگى دە بار.
ەركەناز قورداباي,
ل.ن.گۋميلەۆ اتىنداعى
ەۇۋ ستۋدەنتى
