ماڭعىستاۋ ءوڭىرىن دامىتۋ جوسپارى

قۇجاتتىڭ ەداۋىر بولىگىن ءوڭىر حالقىنىڭ 16,8%-ى جۇمىسپەن قامتىلىپ وتىرعان ونەركاسىپ سالاسى قۇرايدى, بۇل – جالپى وڭىرلىك ءونىمنىڭ 52,8%-ى. جوسپاردىڭ ءۇش جىلىنىڭ قورىتىندىسى بويىنشا ماڭعىستاۋ وبلىسىنىڭ ءجوو 1,3 ەسەگە, ونەركاسىپ كولەمى 1,1 ەسەگە ءوستى, 14,7 مىڭ وقۋشى ورنى اشىلىپ, نورماتيۆتىك جاعدايداعى جولداردىڭ ۇلەسى 94%-دان 97%-عا دەيىن ۇلعايدى.

جوسپارعا ماڭعىستاۋ جاستارىنا ۇزدىك وتاندىق جانە شەتەلدىك جوعارى وقۋ ورىندارىندا, مەكتەپ وقۋشىلارىنا باسقا وڭىرلەردەگى مەكتەپ-ليتسەيلەردە گرانت بويىنشا ءبىلىم الۋعا مۇمكىندىك بەرەتىن «قوعامدىق دامۋ» جاڭا ءبولىمى قوسىلدى. 2025 جىلعا دەيىن جاڭا مەكتەپتەر, كوللەدجدەر, بالالار لاگەرلەرى, جاڭا سپورت مەكەمەلەرى جانە تاعى باسقالار سالىنىپ, جاڭارتىلادى.

2024-2025 جىلدارعا ارنالعان وزەكتى كەشەندى جوسپاردا ءوڭىردىڭ الەۋمەتتىك دامۋىنا باسا نازار اۋدارىلادى. بۇل – مەكتەپ جاسىنا دەيىنگى بالالاردى بالاباقشالارمەن 100% قامتۋ, 21 جاڭا مەكتەپ سالۋ, شاعىن قالا­لار مەن اۋىلداردا 103 مەكتەپ, بەينەۋ قالاسىندا جاتاقحاناسى بار 600 ورىن­دىق كوللەدجدى جاڭعىرتۋ, اقتاۋ مەن جاڭا­وزەندە وقۋشىلار سارايلارىن, ءتورت بالالار لاگەرىن جانە جاستار رەسۋرستىق ورتالىقتارىنىڭ ءۇش عيماراتىن سالۋ, اۋتيست بالالارعا ارنالعان وڭالتۋ ورتالىعىن, اقتاۋداعى «Yessenov Technopark»-ءتى اشۋ, راحات اۋىلىنداعى اۋلا كلۋبتارىنىڭ جەلىسىن كەڭەيتۋ, بۇقارالىق مادەني, سپورتتىق ءىس-شارالاردى ۇيىمداستىرۋ جانە ۇلتتىق سپورت تۇرلەرىن ناسيحاتتاۋ ءۇشىن قايىرىمدىلىق قورلارىن, ۇەۇ قۇرۋ. اداي جىلقىلارىنىڭ پوپۋلياتسياسىنىڭ گەنەتيكالىق قۇرىلىمىن انىقتاۋعا ەرەكشە نازار اۋدارىلىپ جاتىر.

وقۋشىلار ءۇشىن «جارقىن بولاشاق» باعدارلاماسى بويىنشا باسقا وڭىرلەردىڭ مەكتەپ-ليتسەيلەرىندە وقۋ ءۇشىن گرانتتار بولىنەدى. 2024-2025 جج. تۇلەكتەرى ءۇشىن ەلىمىزدىڭ جەتەكشى جوعارى وقۋ ورىندارىندا ءبىلىم الۋعا مۇمكىندىك بەرەتىن 2 مىڭ نىسانالى گرانت بولىنبەك.

ايتا كەتەيىك, بۇگىنگى تاڭدا «بولاشاق» باعدارلاماسى اياسىندا اۋىل جاستارىنا, ونىڭ ىشىندە ماڭعىستاۋ وبلىسىنىڭ جاس­تارىنا, ماگيستر دارەجەسىن الۋعا جەكە سانات قاراستىرىلعان. جوعارى ءبىلىم جانە عىلىم مينيسترلىگى «بولاشاق» باعدار­لاماسىمەن باكالاۆريات دەڭگەيىندە كادر­لار دايارلاۋ جانە باتىس وڭىرلەرىنىڭ وقىتۋشىلارىن تاعىلىمدامادان وتكىزۋ ماسەلەسىن پىسىقتالىپ جاتىر.

جالپى كەڭەستە ۇسىنىلعان ماڭعىستاۋ وبلىسىنىڭ 2025 جىلعا دەيىنگى كەشەندى دامۋ جوسپارىن وزەكتەندىرۋ الگوريتمى ماقۇل­داندى. سەرىك جۇمانعارين ونى ماڭ­عىستاۋ ءوڭىرى جاستارىنىڭ ساپالى ءبىلىم الۋى مەن تولىققاندى تۇلعا رەتىندە دامۋىن قام­تا­ماسىز ەتۋ ءۇشىن قاجەتتى ءىس-شارالارمەن, سون­داي-اق سولتۇستىك-وڭتۇستىك كولىك ءدالىزىن دا­مى­تۋ شارالارىمەن تولىقتىرۋدى تاپسىردى.