اكۆارەل بوياۋىمەن اق قاعازعا بەينەلەنگەن بۇل سۋرەتتىڭ كولەمى شاعىن عانا. ولشەمى 60ح60. سوعان قاراعاندا قازاقتىڭ قابىرعالى قىلقالام شەبەرى ءابىلحان قاستەەۆ بۇل كارتيناسىن تامىلجىعان تابيعات اياسىندا, ەسىك كولىنىڭ جاعاسىندا سالسا كەرەك. ايناداي كولدىڭ ءوزى – تيان-شان تاۋ سىلەمدەرىنىڭ اراسىندا جاتقان ەڭ ادەمى كولدەردىڭ ءبىرى.
سۇرعىلت جاقتاۋعا سالىنىپ, بەتى اينەكپەن جابىلعان كارتيناعا كوز سالساڭىز, ەسىكتىڭ سۇلۋلىعى وزىنە ەسسىز باۋراپ اكەتەدى. اسپاندى كۇڭگىرت بۇلت باسىپ تۇرعانىمەن, مەزگىلدىڭ قاي ۋاقىت ەكەنىنە دەيىن سەزدىرە وتىرىپ, سەزىممەن, جۇرەكپەن جازعانداي. اقباس شىڭنىڭ يىعىنان بوزارىپ, كۇن كوتەرىلگەن. تاڭ شۋاعى جاعاداعى بۇتالى ورماننىڭ باسىن شالا ءتۇسىپ, بوياۋىنا بوياۋ قوسقانداي اسەردە. اپپاق تاڭداعى التىن ۋاقىت جاقپار تاستاردىڭ قىرىنا دەيىن ايشىقتاپ تۇر. وسىنى ءدوپ باسىپ, قاعازعا ءتۇسىرىپ العان سۋرەتشىنىڭ تابيعاتقا دەگەن شىنايى سەزىمى اڭعارىلادى.
بەينەلەۋ ونەرىندەگى پەرسپەكتيۆا, ورتاڭعى پلان, بەرگى پلان دەگەن سەكىلدى اكادەميالىق ەرەجەلەرىنىڭ ءبارى-ءبارى ساقتالعان. بەرگى پلانعا قوڭىر تاستى شىعارسا, ەكىنشى پلانعا بوياۋى ويناقى توعايدى جازعان. ارعى پلانداعى ادىرلار الىستاعان سايىن مۇنارتا بەرگەن. ءتىپتى الا بۇلتتى اسپانعا دەيىن جان بىتىرگەندەي. قاراپ وتىرساڭىز, كومپوزيتسياسىنا دەيىن وتە ساۋاتتى ۇيلەستىرىلگەن. كارتينانىڭ كولوريتى دە ەرەكشە. تابيعاتتاعى بارلىق ءتۇستى تاڭداي وتىرىپ, قاعاز بەتىنە اسقان شەبەرلىكپەن تۇسىرگەن. سونىمەن قاتار رەڭدىك پەرسپەكتيۆانى دا تالعاممەن پايدالانعانىن بايقاۋعا بولادى. بوياۋدى پاليترادا ارالاستىرا تاڭداي وتىرىپ, تابيعاتتاعى كەڭىستىكتى قاعاز بەتىندە شىنايى ەتىپ كورسەتكەن. ماسەلەن, بەرگى پلانداعى تاس پەن اعاشتىڭ, كولدىڭ بوياۋى نەعۇرلىم قويۋ, قانىق بولسا, الىستاعان سايىن سۇرلانا بەرگەن. كارتينادا سۋىق جانە جىلى تۇستەردىڭ ۇيلەسىم تاپقانى وزىنە باۋراپ تۇرادى. كول مەن اعاش بۇتاعىنداعى جاپىراقتاردىڭ فاكتۋراسى دا كاسىبي دەڭگەيدە ورىندالعان. قايىق ۇستىندەگى توپ ادامداردى بەينەلەگەنىمەن, يت تۇمسىعى وتپەس قالىڭ جىنىستى جازعانىمەن, باتتاستىرماعان. ءار تۇسكەن بوياۋ ءوز ورنىندا. امبەسىندە, بەرگى پلانداعى بوياۋ ارعى پلاندا ەكىنشى قايتارا قايتالانبايدى. كەپەشتى تاۋلار مەن جاسىل شىرشا, توعاي بەينەسى كولگە شاعىلىسىپ تۇرسا داعى, بوياۋلارى ەكى ءتۇرلى. ءبىر بوياۋدى ءبىر-بىرىنە مىنگەستىرە بەرمەگەن.
مۋزەيدىڭ ورتاڭعى زالىنا ەنگەن كورەرمەننىڭ نازارى كوپ كارتينانىڭ اراسىندا بىردەن ەسىك كولىنىڭ سۇلۋلىعىنا اۋىپ تۇراتىنى انىق. ال كول ماڭايىنداعى تاۋ-تاس, ورمان-توعاي كوزدى كولگە بۇرۋعا كومەكتەسىپ تۇرعان سياقتى. ءۇزىلىپ ۇزاق قاراساڭىز, مولدىرەگەن ءمىنسىز كلاسسيكالىق كارتينا ەكەنىنە كوزىڭىز انىق جەتەدى. اكۆارەلمەن مۇنشالىقتى مۇنتازداي ەتىپ, شىنايى بەرۋ, ناعىز شەبەردىڭ قولىنان عانا كەلەر ەدى. ۇقىپپەن, مولشەرىمەن عانا مولدىرەتە جازىلعان قۇندى كارتينا كوپشىلىكتىڭ نازارىن ءالى تالاي وزىنە اۋدارادى.
ەسىك كولىنىڭ سۋرەتى بەينەلەۋ ونەرىندەگى زاڭدىلىقتار ەسكەرىلە وتىرىپ جازىلعان تۋىندى بولعانىمەن, ءابىلحان قاستەەۆ – قالا اكادەمياسىن ەمەس, دالا اكادەمياسىن تامامداعان شەبەر. كەيبىر دەرەكتەرگە سۇيەنىپ, ورىس سۋرەتشىسى ن.حلۋدوۆ ۇستازى بولعان دەيمىز. ورىس سۋرەتشىسىنەن ءتالىم العان, باعىت-باعدار العان دەيمىز. الايدا نيكولاي حلۋدوۆ سۋرەتتىڭ الىپپەسىن ۇيرەتپەگەن. الىپپەسى دەپ وتىرعانىمىز – جوعارىداي ايتىلعان كومپوزيتسياسى مەن سۋرەتتىڭ ەڭ نەگىزگى ەرەجەلەرى. ول تۋرالى ءابىلحان قاستەەۆ ءوزى دە «ونەردى تاۋدىڭ بۇلاعىنان, قويدىڭ قۇلاعىنان, اپامنىڭ كيىزىنەن, قوشقاردىڭ مۇيىزىنەن ۇيرەندىم», دەپ كەتكەن. ءوزى ايتقانداي, تابيعاتپەن تىلدەسكەن, ۇندەسكەن تۋما تالانت.
