كۇنى كەشە عانا اتالعان باسەكەدە جاپونيانىڭ ايەلدەر قۇراماسىنىڭ نامىسىن قورعايتىن ويىنشىلاردىڭ دا ەسىمدەرى بەلگىلى بولدى. سولاردىڭ اراسىنداعى ەڭ مىقتىسى – ناو حيبينو. 29 جاستاعى ايتي پرەفەكتۋراسىنىڭ تۋماسى «ۇلكەن دۋلىعا» ساناتىنداعى تۋرنيرلەردە ەكىنشى كەزەڭنەن اسا الماعانىمەن, باسقا جارىستاردا ەلەۋلى تابىسقا قول جەتكىزىپ ءجۇر. كۇنشىعىس ەلىنىڭ ءبىرىنشى راكەتكاسى بۇل كۇندەرى WTA رەيتينگىندە 76-ورىندا تۇر. قازىرگى كەزدە ونەر كورسەتىپ جۇرگەن جاپوندىق تەننيسشىلەر اراسىندا بۇل – ازىرگە ەڭ ۇزدىك كورسەتكىش.
دەسەك تە ساراپشىلار اتالعان جارىستاعى جاپونيانىڭ «باستى قارۋى» رەتىندە ناو حيبينونىڭ ەمەس, اتاقتى ناومي وساكانىڭ ەسىمىن اتاپ جاتىر. بۇعان قارسى ءۋاج ايتا المايمىز. 26 جاستاعى تەننيسشى بۇگىنگى تاڭدا WTA تىزىمىندە نەبارى 229-ورىندى ەنشىلەگەنىمەن, كەزىندە وساكانىڭ كورتتا قالاي ەركىن ويقاستاپ, كەرەمەت ويىن ورنەگىن كورسەتكەنىن سپورتسۇيەر قاۋىم جاقسى بىلەدى. 2018-2021 جىلدار ارالىعىندا ول اقش پەن اۋستراليانىڭ اشىق بىرىنشىلىكتەرىن ەكى رەتتەن ۇتىپ, WTA جارىستارىندا جەتى مارتە توپ جاردى. تاسى ورگە دومالاپ تۇرعان تۇستا ناومي الەمنىڭ ءبىرىنشى راكەتكاسى اتاندى. سونىڭ ارقاسىندا 2019 (37 ملن دوللار) بەن 2021 جىلداردىڭ قورىتىندىسى بويىنشا (57 ملن دوللار) ەڭ كوپ تابىس تاپقان باقۋاتتى سپورتشىلاردىڭ تىزىمىندە جەكە-دارا كوش باستادى.
2022 جىلدىڭ اياعىندا ناومي دەكرەتتىك دەمالىسقا شىقتى. بىلتىر جازدا نارەستەلى بولدى. سودان كورتقا بيىل عانا ورالىپ, بريسبەندەگى تۋرنير مەن اۋستراليانىڭ اشىق بىرىنشىلىگىندە باق سىنادى. ءبىر جارىم جىلداي ۋاقىتقا سوزىلعان ۇزىلىستەن كەيىن وساكاعا بابىنا ەنۋ وڭاي بولعان جوق. بريسبەندە ول ەكىنشى كەزەڭدە سۇرىنسە, مەلبۋرندە تۇساۋكەسەر كەزدەسۋىندە جەڭىلىس تاپتى. بىراق سوعان قاراماستان ونىڭ الەۋەتى ءالى دە اسا جوعارى باعالانىپ تۇر.
جوعارىدا ەسىمدەرى اتالعان اتاقتى تەننيسشىلەردەن بولەك, قازاقستانعا قارسى كەزدەسۋدە ماي حونتاما, ەنا سيباحارا جانە سيۋكو اوياما كورتقا شىعادى. ۇزدىكتەر تىزىمىندە 108-ورىندى ەنشىلەگەن حونتاما جەكەلەگەن سايىستا ەل نامىسىن قورعايدى. ال قالعان ەكەۋى جۇپتىق جارىستاردا وتە جاقسى ويناپ ءجۇر. ماسەلەن, سيباحارا مەن اوياما بىلتىر اۋستراليانىڭ اشىق بىرىنشىلىگىنىڭ اقتىق سىنىنا دەيىن القىنباي جەتسە, 2021 جىلى ۋيمبلدوننىڭ جارتىلاي فينالىندا وينادى. 2020 جىلى ولار رولان گارروستىڭ شيرەك فينالىنا شىقتى. سونىمەن قاتار سيۋكو اوياما ازيا چەمپيوناتىندا ءتورت رەت (1 التىن, 1 كۇمىس, 2 قولا) جەڭىس تۇعىرىنا كوتەرىلىپ, ازيا ويىندارىندا قولا مەدالدى موينىنا ءىلدى.
ەستەرىڭىزگە سالا كەتەيىك, ەلىمىزدىڭ ەڭ ۇزدىك تەننيسشىسى ەلەنا رىباكينا قازىرگى كەزدە پاريج وليمپياداسىنا دايىندالىپ جاتقاندىقتان جاپونياداعى جارىستان بوساتىلدى. كۇنشىعىس ەلىندە يۋليا پۋتينتسەۆا, زارينا دياس, اننا دانيلينا, جىبەك قۇلامباەۆا جانە ارۋجان ساعىندىقوۆاعا سەنىم ارتىلىپ وتىر. قازىرگى كەزدە ۇلتتىق قۇراما كوماندالاردىڭ رەيتينگىندە جەرلەستەرىمىز 9-ورىندا تۇرسا, جاپوندار 20-ساتىعا تۇراقتادى. سوندىقتان دا وتانداستارىمىز الداعى سىناقتان سۇرىنبەي وتەدى دەگەن ويدامىز.
