«Polar Night Energy» كومپانياسى ورتالىقتاندىرىلعان جىلۋ جۇيەسىن ىسكە قوسپاقشى. كۇللى قالانى جىلىتۋعا شاماسى جەتەتىن «قۇمدى اككۋمۋلياتور» قارجى جاعىنان دا ءتيىمدى كورىنەدى. نەگىزىنەن, وندىرىلەتىن ەنەرگيانى ساقتاۋ قالپى – ءارتۇرلى. مىسالى: كادىمگى ليتي باتارەيالارى, گيدراۆليكالىق ەلەكتر ستانساسى, تۇز بالقىمالارىنداعى باتارەيالار, كومىرقىشقىلدى اككۋمۋلياتورلار, تاعى باسقالارى. الايدا, بۇلاردىڭ دەنى كوپ شىعىن اكەلەدى, يدەولوگيالىق تۇرعىدان دا – ءساتسىز شەشىم. سوندىقتان دا فيندىكتەر ەنەرگيانى ساقتاۋدىڭ جاڭا تاسىلدەرىن تابۋدى ماقسات تۇتقان. ازىرلەۋشىلەردىڭ ايتۋىنشا, ولاردىڭ جاڭا ءادىسى وتە جاقسى وقشاۋلانعان. ول جيناقتالعان ەنەرگيانى بىرنەشە اي بويى ساقتاي الادى. ال جىلۋ الۋدىڭ جاسامپاز جولىن ىسكە اسىرۋ ءۇشىن ماماندار قۇمدى ەكولوگيالىق تازا كوزدەردەن الادى.
ۇيرەنەتىن-اق ءادىس
تەحاس تۇرعىنى رەندي ۆاگنەر سۋ تاسقىنىنان قۇتىلۋ ءۇشىن ءۇيىنىڭ اينالاسىنا پلاستيكالىق توسقاۋىل قويىپ, ايلا تاپقان دەسەدى.
ول كوكتەم جاقىنداعاندا 120 مەترلىك پلاستيكالىق قۇبىردى اكەلىپ, ءۇيىن قورشايدى. ونى قۇم دوربالارىمەن نىعايتادى. بۇل قىلىعىن كورشىلەرى تۇسىنبەي, دابىرا دا قىلادى. بىراق قالانى سۋ باسقان كەزدە, رەندي تاسقىننان زارداپ شەكپەگەن جالعىز ادام بولادى. اپاتتان قالاداعى ءۇيدىڭ ءبارى زارداپ شەگىپ, ونىڭ ءۇيى عانا ءبۇتىن قالعاندا, اينالاسىنداعىلار قاتتى تاڭدانعان. پلاستيكالىق قۇبىرعا 8 300 دوللار جۇمساعان اقىلدى جىگىت – 150 000 مىڭ دوللار شىعىننان امان قالعان.
توسىننان كەلەتىن بالەدەن ءۇي يەسى وسىلاي قۇتىلىپتى. راس, ۇكىمەت وزەگىڭدى تالدىرمايدى. دەگەنمەنەن ءوزىمىز «بىردەڭە» قىلماساق, تاعى بولماس...
مەتەوريت دەنەسىنە تۇسكەن
تۇڭعىش بولعان كەرەمەت سەزىم شىعار. كولۋمب امەريكانى اشتى, پوپوۆ راديونى ويلاپ تاپتى, نيل ارمسترونگ ايعا اياق باستى...ال ەنن حودجەسكە مەتەوريت سوعىلدى.
30 قاراشا. 1954 جىل. اقش-تىڭ الاباما شتاتى تاللادەگا اۋماعى سۋلاكوگا قالاسى. 34 جاستاعى ەنن ۇيىندەگى ديۆاندا ۇيىقتاپ جاتىر. كەنەت سالماعى 3,86 كيلو بولاتىن مەتەوريت بولىگى حودجەس ءۇيىنىڭ توبەسىن تەسىپ ءوتىپ, ۇيقىداعى ارۋدىڭ جامباسىنا تۇسەدى. قۋانىشقا وراي, ەنن اۋىر جاراقات العان جوق. تەك دەنەسى كوگەرەدى. مەتەوريت قالانىڭ اتىمەن «سۋلاكوگ» دەپ اتالدى, ال بالاما اتاۋى «حودجەس» بولدى.
الدىمەن, ەرەجەگە سايكەس, نىساندى اۋە كۇشتەرى تەكسەرىپ, رەسمي قورىتىندى جاسالدى. سوسىن ەنن ءۇشىن كۇرەس باستالدى. ول «عارىشتىق ويىنشىققا» اينالا جازادى. ارتىنان ادامدار ءتۇسىپ, ومىرىنە قاۋىپ تونگەن. وسى تۇرعىدان كوپ قيىندىق كورگەن ول, ءتۇپتىڭ ءتۇبى مەتەوريتتى الاباما مۇراجايعا تابىستاپ, تىنىشتىق تاپتى. عالام قىزىق قوي.
