فوتو: اقوردا ءباسپاسوز قىزمەتى
اڭگىمەلەسۋ بارىسىندا پرەزيدەنت جيىنعا شاقىرعانى جانە شارانى جوعارى دەڭگەيدە ۇيىمداستىرعانى ءۇشىن قىتاي حالىق رەسپۋبليكاسىنىڭ باسشىلىعى مەن بواو ازيا فورۋمىنىڭ حاتشىلىعىنا العىس ايتتى.
«بواو فورۋمىنا قاتىسقانىما قۋانىشتىمىن. بۇل وتە ماڭىزدى ءارى قولداۋعا لايىقتى شارا دەپ سانايمىن. سوندىقتان مەن ارنايى كەلىپ, فورۋمدا ءسوز سويلەۋگە شەشىم قابىلدادىم. وسى مۇمكىندىكتى پايدالانا وتىرىپ, توراعا سي تسزينپينگە جىلى لەبىزىمدى جولداعىم كەلەدى. ونىڭ شىلدە ايىنىڭ باسىندا قازاقستانعا جاسايتىن مەملەكەتتىك ساپارىن اسىعا كۇتەمىز. توراعا سي ءتسزينپيننىڭ دانا باسشىلىعىمەن قولعا الىنعان ماڭىزدى باستامالاردىڭ ءبارى تولىقتاي جۇزەگە اساتىنىنا سەنىمدىمىز. سي تسزينپين مىرزانىڭ ەلدەرىمىز اراسىنداعى تاتۋ كورشىلىك, عاسىرلار بويى جالعاسىپ كەلە جاتقان دوستىق قاتىناستاردى جانە ماڭگىلىك ءارى جان-جاقتى ستراتەگيالىق سەرىكتەستىكتى نىعايتۋعا قوسقان جەكە ۇلەسىن جوعارى باعالايمىز. بىرلەسكەن كۇش-جىگەردىڭ ارقاسىندا بارلىق باعىت بويىنشا ءتيىمدى مەملەكەتارالىق ىقپالداستىقتى جولعا قويدىق. سي تسزينپين مىرزامەن بەيجىڭدەگى كەزدەسۋدى ەرەكشە ىقىلاسپەن ەسكە الامىن. مەنىڭ ويىمشا, قازاقستان مەن قىتاي اراسىنداعى ىنتىماقتاستىقتى تەرەڭدەتۋگە جانە ارتاراپتاندىرۋعا باعىتتالعان كۇش-جىگەرىمىز ءوز جەمىسىن بەرەدى», دەدى قاسىم-جومارت توقاەۆ.
مەملەكەت باسشىسى قازاق-قىتاي ىنتىماقتاستىعىن مۇلدە جاڭا دەڭگەيگە كوتەرۋگە تاراپتار بار كۇشىن جۇمسايتىنىن ايتتى.
«جالپى, قىتايمەن اراداعى دوستىق پەن ىنتىماقتاستىقتى نىعايتۋ ءبىز ءۇشىن نەگىزگى باسىمدىق سانالادى. جان-جاقتى ستراتەگيالىق سەرىكتەستىك قاتىناستاردى دامىتۋ ماقساتىندا ۇكىمەتتىڭ بارلىق ۆەدومستۆوسىن قحر-دىڭ ءتيىستى مەملەكەتتىك ۇيىمدارىمەن تىعىز قارىم-قاتىناستا جۇمىس ىستەۋگە باعىتتايمىز. بۇگىن فورۋمدا سويلەگەن سوزىمدە ەكى ەلدىڭ ىنتىماقتاستىعىنا, ساۋدا-ساتتىقتى وركەندەتۋگە, قازاقستان ەكونوميكاسىندا قىتاي ينۆەستيتسياسىنىڭ ارتىپ كەلە جاتقانىنا بايلانىستى ناقتى مىسالدار كەلتىردىم. ارينە, مۇنىڭ ءبارى ايرىقشا مانگە يە. وسى ورايلى ءساتتى پايدالانىپ, ءسىزدى بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ توراعاسى رەتىندە قازاقستانعا رەسمي ساپارمەن كەلۋگە شاقىرۋىمدى تاعى ءبىر مارتە راستاعىم كەلەدى», دەدى پرەزيدەنت.
ءوز كەزەگىندە چجاو لەتسزي قاسىم-جومارت توقاەۆقا ءىلتيپات ءبىلدىرىپ, قازاق-قىتاي قاتىناستارى قارقىندى دامىپ كەلە جاتقانىن اتاپ ءوتتى.
«قۇرمەتتى پرەزيدەنت توقاەۆ مىرزا, سىزبەن كەزەكتى رەت كەزدەسكەنىمە وتە قۋانىشتىمىن. ەڭ الدىمەن, سىزگە توراعا سي ءتسزينپيننىڭ شىنايى سالەمى مەن ىزگى لەبىزىن جەتكىزگىم كەلەدى. قىتايدا جىل سايىن وتەتىن بواو ازيا فورۋمىنا قوش كەلدىڭىز! ءسىزدىڭ وسى جيىنعا قاتىسۋىڭىز قىتاي-قازاق بايلانىستارىن دامىتۋعا ەرەكشە ءمان بەرەتىنىڭىزدى جانە فورۋم جۇمىسىنا زور قولداۋ كورسەتەتىنىڭىزدى بىلدىرەدى. جۋىردا ەلىڭىز كوكتەمنىڭ ءداستۇرلى مەيرامى – ناۋرىزدى تويلادى. ورايلى ءساتتى پايدالانا وتىرىپ, ءسىزدى جانە دوستاس قازاقستان حالقىن وسى مەرەكەمەن قۇتتىقتايمىن. بىلتىر توراعا سي تسزينپينمەن سياندا جانە بەيجىڭدە ەكى رەت كەزدەستىڭىز. ەكىجاقتى قارىم-قاتىناستى دامىتۋ جونىندەگى جاڭا ءارى اۋقىمدى جوسپار ايقىندالدى. قىتاي تاراپى مەملەكەتتەر باسشىلارى قول جەتكىزگەن ماڭىزدى ۋاعدالاستىقتاردى ىسكە اسىرۋ, ساياسي سەنىمدى نىعايتۋ جانە ستراتەگيالىق ماقساتتارعا قول جەتكىزۋ جولىنداعى ءوزارا ىنتىماقتاستىقتى تەرەڭدەتۋ ءۇشىن قازاقستاندىق ارىپتەستەرىمەن بىرلەسىپ جۇمىس ىستەۋگە دايىن», دەدى چجاو لەتسزي.
كەلىسسوز بارىسىندا ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى ودان ءارى نىعايتۋ پەرسپەكتيۆالارى جان-جاقتى تالقىلاندى, سونداي-اق كولىك, ونەركاسىپ, تۋريزم جانە باسقا دا سالالارداعى بىرلەسكەن جوبالاردىڭ ىسكە اسىرىلۋ بارىسى قاراستىرىلدى.
