سەنىمدى سەرىكتەستىك

سەرىك جۇمانعارين شۇاا دەلەگاتسياسىن جىلى قارسى الىپ, شىڭجاڭ قازاقستاننىڭ ءىرى ساۋدا سەرىكتەستەرىنىڭ ءبىرى ەكەنىن اتاپ ءوتتى.

«سەرپىندى ءوسۋ ءۇردىسى ءبىزدىڭ ساۋدا قارىم-قاتىناسىمىزدىڭ الەۋەتىن تولىق اشقان جوق دەپ سانايمىن. ءبىز تاۋار اينالىمىن ارتاراپتاندىرۋعا جانە جەتكىزىلەتىن ءونىم نومەنكلاتۋراسىن كەڭەيتۋگە باعىت الىپ وتىرمىز. بۇل ءۇشىن ءبىز قىتاي تاراپىنىڭ 2024 جىلعى 26 ماۋسىمدا ۇرىمجىدە ءىىى وڭىرارالىق ىنتىماقتاستىق فورۋمىن وتكىزۋ تۋرالى ۇسىنىسىن قولدايمىز. ءبىز سونداي-اق «قىتاي-ەۋرازيا» ەكسپو حالىقارالىق كورمەسىنە قاتىسۋعا دايىندالىپ جاتىرمىز, ونىڭ اياسىندا فورۋم وتەدى. قازاقستان وعان ءداستۇرلى تۇردە قاتىسادى. بۇل جولى الاڭدى ۇلعايتىپ, كوبىرەك كاسىپكەرلەر شاقىرامىز, ۇسىنىلاتىن ءونىم ءتۇرىن كوبەيتەمىز», دەدى قازاقستان ۆيتسە-پرەمەرى قىتاي تاراپىنا.

ءوز كەزەگىندە ەركين تۋنياز ەكى مەملەكەت باسشىلارى اراسىنداعى كەلىسىمدەردى جۇزەگە اسىرۋ ناتيجەلەرىنە ەرەكشە توقتالىپ, بۇل قارىم-قاتىناستارعا 2023 جىلعى قازاقستان پرەزيدەنتى قاسىم-جومارت توقاەۆتىڭ ۇرىمجىگە ساپارى مەن شۇاا پارتيا كوميتەتىنىڭ حاتشىسى ما ءسينجۋيدىڭ قازاقستانعا جاساعان ساپارى ەرەكشە سەرپىن بەرگەنىن اتاپ ءوتتى.

«بۇگىندە قازاقستانمەن ساۋدا شۇاا سىرتقى تاۋار اينالىمىنىڭ 40%-ىن قۇرايدى. 2023 جىلدىڭ قورىتىندىسى بويىنشا ءبىزدىڭ تاۋار اينالىمىمىز $20 ملرد-قا جەتىپ, 70%-دان استام ءوستى. 2024 جىلدىڭ 2 ايىندا – $3,6 ملرد-تى قۇرادى, بۇل 2023 جىلدىڭ سايكەس كەزەڭىمەن سالىستىرعاندا 89,5%-عا جوعارى. وتكەن جىلدىڭ قورىتىندىسىنا سايكەس, شۇاا ىشكى جالپى ءونىمنىڭ ءوسىمى بويىنشا قحر-دا 4-ورىنعا, ال سىرتقى تاۋار اينالىمىنىڭ ءوسىمى بويىنشا ەكىنشى ورىنعا يە. قازىر ءبىز ىنتىماقتاستىعىمىزدىڭ نەگىزگى باعىتتارى بويىنشا بىرلەسىپ جۇمىس ىستەۋگە دايىنبىز», دەپ مالىمدەدى قحر شۇاا حالىق ۇكىمەتىنىڭ توراعاسى.

كەزدەسۋدە تاراپتار ساۋدا, اۋىل شارۋاشىلىعى, كولىك جانە لوگيستيكا, سۋ ۇنەمدەۋ تەحنولوگيالارى, قۇندى قاعازدار, «قورعاس» شىحو-نى دامىتۋ, مەديتسينا سالاسىندا بىرلەسكەن كاسىپورىندار قۇرۋ جانە اشۋ, جەردى قاشىقتىقتان زوندتاۋ, ءبىلىم بەرۋ, تۋريزم ماسەلەلەرى بويىنشا ەكىجاقتى ىن­تى­ماقتاستىقتىڭ كەڭ اۋقىمدى ماسە­لەلەرىن تالقىلادى.