مامانداردىڭ پىكىرىنشە, افريكالىق جايىن سۋىققا ءتوزىمسىز. شاباقتاردى +22-28 گرادۋس ارالىعىنداعى تەمپەراتۋرادا ۇستاعان دۇرىس. ودان دا كوكتەم مەن جاز سوڭىنا دەيىن ارنايى توعاندا باعىپ, سىرت ەلدەرگە ەكسپورتتاۋعا ابدەن بولادى.
ۆەتەريناريا عىلىمدارىنىڭ دوكتورى قۋانىش سىزدىقوۆتىڭ ايتۋىنشا, ورتالىقتاعى زەرتتەۋ جۇمىستارى ەلدەگى بالىق ىسىمەن اينالىساتىن كاسىپكەرلەرگە دە كوپ كەڭەس بەرە الادى.
جيىنعا س.سەيفۋللين اتىنداعى قازاتزۋ رەكتورى قانات تىرەۋوۆ, چەحيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى پاۆول شەپەلياك جانە اۋىل شارۋاشىلىعى مينيسترلىگىنىڭ وكىلدەرى قاتىستى. قازاتزۋ مەن وڭتۇستىك بوگەميا (چەح بۋدەەۆيتسە) ۋنيۆەرسيتەتى اراسىنداعى حالىقارالىق ىنتىماقتاستىق اياسىندا وسىنداي يگى باستاما ىسكە اسىپ وتىر.
– ءبىزدىڭ ۋنيۆەرسيتەت ءۇشىن دامۋ باسىمدىقتارىنىڭ ءبىرى – ءبىلىم بەرۋ باعدارلامالارىن ينتەرناتسيونالداندىرۋ, بىرلەسكەن عىلىمي جوبالار مەن ورتالىقتاردى دامىتۋ ماسەلەسىنە ۇلكەن كوڭىل ءبولۋ. ۋنيۆەرسيتەتتىڭ ستراتەگيالىق دامۋىنىڭ باستى ماقساتى – تۇلەكتەرىمىزدىڭ ىشكى جانە حالىقارالىق ەڭبەك نارىعىندا باسەكەگە قابىلەتتىلىگى مەن سۇرانىسىن ارتتىرۋ. بۇگىندە ءبىلىم جانە عىلىم سالاسىنداعى حالىقارالىق باعدارلامالار مەن جوبالارعا قاتىسا وتىرىپ, الەمنىڭ 40-تان اسا ەلىندەگى سەرىكتەستەرمەن حالىقارالىق ىنتىماقتاستىق ورناتتىق. بۇگىندە چەحيانىڭ 3 ۋنيۆەرسيتەتىمەن بىرلەسە جۇمىس ىستەپ جاتىرمىز, – دەيدى قانات تىرەۋوۆ.
ورتالىقتىڭ ماڭىزدى باعىتى – عىلىمي-زەرتتەۋ جۇمىستارى مەن ماقالالاردى بىرلەسىپ جاريالاۋ, سونداي-اق حالىقارالىق كونفەرەنتسيالارعا, دوڭگەلەك ۇستەلدەرگە قاتىسۋ.
– قازاقستان-چەح حالىقارالىق اكۆاوسىرۋ عىلىمي ورتالىعى – عىلىم مەن تەحنيكا دامۋىنىڭ تاريحي ماڭىزدى نىسانى ءارى حالىقارالىق عىلىمي ىنتىماقتاستىقتىڭ تاماشا ۇلگىسى. بۇعان دەيىن وسى ماسەلە ەكى ەل اراسىندا تالىقالاۋدان ءوتتى. راسىمەن, جوبانىڭ قاعازدا بەتىندە قالماي, ىسكە اسقانى ۇلكەن قۋانىش. جالپى, ەكى مەملەكەت اراسىنداعى ىنتىماقتاستىقتىق نەگىزىندە ورتالىق جۇمىسى بالىق ءوسىرۋ جانە اۋلاۋ ءىسىن جانداندىرۋعا كۇش بەرەدى دەپ سەنەمىن. چەحيادا بالىق ءوندىرىسى ىشكى تۇتىنۋدا دا, ەكسپورتتاۋ جاعىنان دا جاقسى دامىعان. چەح بالىق وسىرۋشىلەرىنىڭ عاسىرلار بويى جيناقتاعان تاجىريبەسى جانە زاماناۋي عىلىمي جەتىستىكتەرى قازاقستاندىق ارىپتەستەرگە ۇلكەن مۇمكىندىك تۋدىرىپ وتىر. وسى سالادا عىلىمي زەرتتەۋ جۇرگىزىلەتىن وڭتۇستىك چەحيا ۋنيۆەرسيتەتىنىڭ بالىق شارۋاشىلىعى جانە سۋدى قورعاۋ فاكۋلتەتى وقۋ جانە پراكتيكالىق قىزمەتتى بىرىكتىرىپ, جاڭا اكۆاوسىرۋ نىساندارىن ەنگىزۋمەن, جاڭا بالىق ازىقتارىن تاجىريبەدەن وتكىزۋ جانە باسقا زەرتتەۋلەرمەن اينالىسىپ كەلەدى, – دەدى ەلشى پاۆول شەپەلياك.
ەلشىنىڭ سوزىنشە, 2022 جىلى كوكتەمدە چەحيانىڭ اۋىل شارۋاشىلىعى مينيسترلىگى استاناداعى چەحيا ەلشىلىگىنىڭ قولداۋىمەن وزدەرىندەگى بالىق ءوسىرۋشى ۇيىمداردىڭ عىلىمي باعىتتاعى قىزمەتىمەن تانىستىرۋ ءۇشىن قازاقستاندىق بالىق وسىرۋشىلەرگە ارنايى ساپار ۇيىمداستىرعان. ال بىلتىر كۇزدە چەحيانىڭ اۋىل شارۋاشىلىعى ءمينيسترى مارەك ۆىبورنىيدىڭ قازاقستانعا ساپارىندا عىلىمي ىنتىماقتاستىق تاقىرىبىندا ءسوز قوزعالىپ, ورتالىقتىڭ اشىلۋىنا قولداۋ كورسەتىلگەن.
ايتا كەتەيىك, ۇكىمەت بالىق شارۋاشىلىعىن دامىتۋدىڭ 2020-2030 جىلدارعا ارنالعان ارنايى باعدارلاماسىن قابىلداعانى بەلگىلى. ىلە-شالا پرەمەر-ءمينيستردىڭ تاپسىرماسىمەن بارلىق وڭىردە وسى جىلدارعا قاتىستى وڭىرلىك باعدارلاما ازىرلەنىپ, ارنايى قاۋلىمەن بەكىتىلدى. جوعارىدا ايتىلعانداي, بالىق شارۋاشىلىعىنداعى ۇلكەندى-كىشىلى جوبالارعا اتالعان ورتالىقتىڭ كومەگى كوپ بولادى دەگەن سەنىم بار.
