فوتو: جوعارعى سوتتىڭ ءباسپاسوز قىزمەتى
جوعارعى سوتتىڭ كوممۋنيكاتسيالار ءبولىمىنىڭ باسشىسى پەريزات سادۋاقاستىڭ ايتۋىنشا, استانا قالاسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قۋاندىق بيشىمباەۆتىڭ ءىسى بويىنشا القابيگە كانديداتتاردى ىرىكتەۋ ءجۇرىپ جاتقان جابىق وتىرىس باستالدى. جينالىستا 12 ادامنان (10 نەگىزگى جانە 2 رەزەرۆتىك) تۇراتىن القابيلەر قۇرامى قۇرىلادى.
«وزدەرىڭىزگە ءمالىم, بيشىمباەۆقا قاتىستى سوت تالقىلاۋىنا قوعامنىڭ قىزىعۋشىلىعىنىڭ ارتقانىن ەسكەرە وتىرىپ, وسى ءىس بويىنشا اشىق سوت وتىرىستارىنان اشىق ونلاين-ترانسلياتسيا ۇيىمداستىرۋ تۋرالى شەشىم قابىلداندى. وسىلايشا, ونلاين-ترانسلياتسيا ارقىلى كەز كەلگەن ادام, سونىڭ ىشىندە باق وكىلدەرى بۇل سوت پروتسەسىنىڭ بارىسىن باقىلاي الادى. بۇل شەشىم سوت تالقىلاۋىنىڭ اشىق ءارى جاريالى بولعانىن جانە جالعاساتىنىن بىلدىرەدى.
ەستەرىڭىزگە سالا كەتەيىن, ءىستىڭ الدىن الا تىڭداۋى دا اشىقتىق قاعيداتى ساقتالا وتىرىپ ءوتتى. پروتسەسكە قاتىسۋشىلاردىڭ جانە قاتىسۋعا نيەت بىلدىرۋشىلەردىڭ كوپتىگىن ەسكەرە وتىرىپ, وتىرىستان ونلاين-ترانسلياتسيا جۇرگىزىلەتىن قوسىمشا ەكى زال ۇيىمداستىرىلدى», دەپ جازدى ول.
ايتا كەتەيىك, ناۋرىز ايىنىڭ باسىندا ايەلى سالتانات نۇكەنوۆانى ءولتىردى جانە ازاپتادى دەپ ايىپتالعان قۋاندىق بيشىمباەۆتىڭ ءىسىن القابيلەر القاسى قارايتىنى بەلگىلى بولدى.
