فوتو: 7-su.kz
شىنى كەرەك, اعايىننىڭ اتىن بىلگەنىمەن, تۋىستىق اتاۋىن بىلمەيتىن وقۋشىلاردىڭ قاتارى كوپ. تۋىسقاندى تانىس دەپ ويلايدى. «ارالاسپاساڭ, اعايىن جات» دەگەن وسى عوي.
ساۋالناما بارىسىندا وقۋشىلاردان قاراپايىم تۋىستىق اتاۋلاردىڭ ماعىناسىن سۇرادىق. ماسەلەن, «بولە دەگەن كىم؟», «باۋىرمالدىلىق تۋرالى قانداي شىعارمالاردى, قانداي ماقال-ماتەلدەردى بىلەسىڭ؟» دەگەن سىڭايداعى جەڭىل سۇراقتار. سويتسەك, ساۋالىمىز جەڭىل ەمەس ەكەن. وقۋشىلار توقسان سايىن تاپسىراتىن بجب, تجب-لارىندا تاپ بۇلاي قينالماعان شىعار. ەمتيحاننىڭ جاۋابىن ءوزى ايتىپ بەرگەن مۇعالىمدەي, ءبىز دە وقۋشىلارعا تۋىسقانعا قاتىستى اتاۋلاردىڭ ماعىناسىن بارىنشا ءتۇسىندىرىپ بەرگەندەي بولدىق.
«ەرتە وشكەن ءۇمىتىمدى قايتا جاقتىڭدار» دەگەندەي, سالت-داستۇردەن اجىراماعان وقۋشىلار دا بارشىلىق ەكەن. ولاردىڭ جاۋاپتارىن ەستىپ ريزا بولدىق. ەندەشە, نازارلارىڭىزعا سولاردىڭ جاۋابىن ۇسىنامىز:
بەيسەن ماعجان,
«زەردەلى» حالىقارالىق
مەكتەبىنىڭ 9-ا سىنىپ وقۋشىسى:
– اپالى-ءسىڭلى قىزداردىڭ بالالارى ءبىر-بىرىنە بولە بولىپ كەلەدى. ءسوز بارىسىندا «مىناۋ مەنىڭ انامنىڭ ءسىڭلىسىنىڭ بالاسى» دەپ تانىستىرۋدىڭ ەش قاجەتى جوق. بولە دەگەن اتاۋدىڭ ءوزى ونىڭ تۋىستىق جاقىندىعىن ايقىن اڭعارتىپ تۇر. حالقىمىزدا بولەلەردىڭ تاتۋلىعى جايىندا كوپ ايتىلادى.
سانجار مىرزاحمەتوۆ,
«زەردەلى» حالىقارالىق
مەكتەبىنىڭ 9-ا سىنىپ وقۋشىسى:
– ءبىز وسىعان دەيىن اتا-انانى قۇرمەتتەۋ, اعايىن-تۋىستى سىيلاۋ تۋرالى كوپتەگەن شىعارمانى وقىدىق. مىسالى, نۇرداۋلەت اقىشتىڭ «ناعىز اجە قايدا؟» اڭگىمەسىندە قازىرگى اجەلەرمەن بۇرىنعى اجەلەردى سالىستىرىپ, «قارتى بار ءۇيدىڭ قازىناسى بار» دەگەن ماقالدىڭ ءمانىن ۇقتىرادى. ال مارات قابانبايدىڭ «باۋىر» اتتى اڭگىمەسىندە جەتىمدەر تاعدىرىنا قايىرىمدىلىقپەن قاراۋعا تاربيەلەيدى, باۋىرعا دەگەن قامقورلىقتى وياتادى. سونىمەن قاتار ءبىز 8-سىنىپتا دۋلات يسابەكوۆتىڭ «اپكە» دراماسىمەن تانىستىق. وندا اتا-اناسىنان جاستاي ايىرىلعان قاماجاي ءوز ءومىرىن باۋىرلارىنا ارنايدى. ال ماعان وسى تاقىرىپتا ەرەكشە اسەر ەتكەن شىعارما – تولەن ابدىكتىڭ «قوناقتار» اڭگىمەسى. شىعارمادا ەرعابىل قاريانىڭ جالعىز ۇلى ساپابەككە كوڭلى تولمايدى. ويتكەنى بالاسى ايگىلى گەولوگ بولسا دا, اتا-اناسىنىڭ ۇيىنە جىلىنا ءبىر رەت قانا سوعادى. ال اكەسىنە ۇلىنىڭ قارا شاڭىراقتى قۇرمەتتەپ, اتا سالتتى ۇستانعانى, اتا-انانى سىيلاپ, قامقورلىق تانىتقانى قاجەت.
سايديرمان ايدار ۇلى,
«Qadam School» مەكتەبىنىڭ
4-سىنىپ وقۋشىسى:
– تۋىستىق اتاۋلارعا بايلانىستى حالقىمىزدا بىرنەشە ماقال-ماتەل بار. ماسەلەن, «اعاسى باردىڭ – جاعاسى بار, ءىنىسى باردىڭ – تىنىسى بار», «اعايىن تاتۋ بولسا, ات كوپ, ابىسىن تاتۋ بولسا, اس كوپ», «اپاما جەزدەم ساي», «اي كورمەسەڭ تۋىسىڭ جات, جىل كورمەسەڭ دوسىڭ جات». بۇل ماقالداردى كوبىنە ۇيدە اجەم ايتىپ وتىرادى ءارى ماعىناسىن دا اشىپ, ءتۇسىندىرىپ بەرەدى. سول ءۇشىن ويىمدا وسى ماقالدار جاتتالىپ قالعان.
حوش. سونىمەن تۋىستىق اتاۋلاردى بىلەتىن وقۋشىلاردىڭ قاتارى ءبىرسىپىرا ەكەن. بىلمەيتىندەر دە جەتەرلىك. بىراق قالاي بولعاندا دا بۇعان بالالاردى كىنالاي المايمىز. ويتكەنى «الما, اعاشىنان الىسقا تۇسپەيدى». سوندىقتان قۇرمەتتى اتا-انا, اعايىن-تۋعانمەن تويدا عانا كەزدەسىپ, جاقىن جاندارمەن جەلىدە عانا ەمەس, كۇندەلىكتى, شىنايى ومىردە دە ارالاسىپ, حال-جايىن ءبىلىپ تۇرعانىڭىز ابزال. بالالارعا تۋعان-تۋىستىڭ, جاقىن-جۋىقتىڭ سۇراسا كەلگەندە كىم بولىپ كەلەتىنىن ايتىپ وتىرعان دۇرىس.
بەكزات قۇلشار,
ل.ن.گۋميلەۆ اتىنداعى
ەۇۋ ستۋدەنتى
