- 19 ساۋىردە الماتىدا ارالاس جەكپە-جەكتەن OCTAGON 57 ءتۋرنيرى وتەدى. وعان ەلىمىزدىڭ جانە بىرقاتار شەت مەملەكەتتەن كەلگەن سپورتشىلار قاتىسادى. كەشتىڭ باستى باسەكەسىندە سۇندەت ايتقۇل (7-1) مەن حايتاو تي (14-5) كۇش سىناسادى. قانداسىمىز ءۇشىن بۇل ايقاستىڭ وڭايعا سوقپايتىنى انىق. ويتكەنى قىتاي فايتەرى وتە قارۋلى. ول ءوزىنىڭ 14 جەڭىسىنىڭ بارلىعىندا قارسىلاسىن ەسىنەن تاندىردى. سونداي-اق دامير تولەنوۆ پەن تسيۋ لۋننىڭ باسەكەسى كورەرمەندەر كوڭىلىنەن شىعادى دەگەن ويدامىز.
- 2024 جىلدىڭ 10-15 قىركۇيەك ارالىعىندا وتەتىن تەننيستەن دەۆيس كۋبوگىنىڭ توپتىق ءتۋرنيرىن قابىلدايتىن قالالار انىقتالدى. بۇل باسەكەلەردىڭ شىمىلدىعى يتاليانىڭ بولونيا, ۇلىبريتانيانىڭ مانچەستەر, يسپانيانىڭ ۆالەنسيا جانە قىتايدىڭ چجۋحاي شاھارلارىندا تۇرىلەدى. ال اتالعان جارىستىڭ جەرەبە تارتۋ ءراسىمى 19 ناۋرىزدا وتەدى.
- قازاقتىڭ تانىمال جەكپە-جەك شەبەرى ولجاس ەسقاراەۆ باحرەيننىڭ BRAVE CF پروموۋتەرلىك كومپانياسىمەن كەلىسىمشارتقا وتىردى. ازيا بويىنشا ۇزدىكتەردىڭ ءبىرى سانالاتىن ۇيىمدا ونەر كورسەتۋ ءۇشىن ءار سپورتشى ءۇشىن ۇلكەن مارتەبە. ماسەلەن, كەزىندە BRAVE CF-دا كۇش سىناسقان اسۋ الماباەۆ بۇل كۇندەرى UFC-دە تابىستى ونەر كورسەتۋدە.
- فۋتبولدان قازاقستان ۇلتتىق قۇراماسى مەن «بەشيكتاش» كلۋبىنىڭ جارتىلاي قورعاۋشىسى باقتيەر زاينۋتدينوۆ تۇركيا چەمپيوناتىندا ونەر كورسەتەتىن بۇرىنعى پوستكەڭەستىك ەلدەر اراسىنداعى ەڭ قۇندى ويىنشى بولىپ تانىلدى. Transfermarkt پورتالىنىڭ مالىمەتىنشە, جەرلەسىمىزدىڭ ترانسفەرلىك قۇنى 6 ميلليون ەۋرونى قۇرايدى. ەكىنشى جانە ءۇشىنشى ورىنداردا – «كايسەريسپوردىڭ» جارتىلاي قورعاۋشىسى, وزبەكستاندىق وتابەك شۇكىروۆ (2,5 ملن) پەن «حاتايسپوردىڭ» شابۋىلشىسى, ازەربايجاندىق رەنات داداشوۆ (2 ملن). ال تۇركيا سۋپەرليگاسىندا «ادانا دەميرسپوردىڭ» نامىسىن قورعاپ جۇرگەن قازاقستاننىڭ تاعى تانىمال ءبىر اياقدوپ شەبەرى ابات ايىمبەتوۆ 800 مىڭ ەۋروعا باعالاندى.
