مەملەكەت باسشىسى «Egemen Qazaqstan» گازەتىنە بەرگەن سۇحباتىندا: «ناۋرىز – جاڭارۋ مەن جاڭعىرۋدىڭ سيمۆولى. سوندىقتان ءتول مەرەكەمىزدىڭ مازمۇنىن بايىتىپ, ونى بارىنشا ەرەكشەلەپ, جاڭاشا اتاپ ءوتۋىمىز كەرەك. بۇل قادام قوعامدى ۇيىستىرىپ, ۇلتتىق بىرەگەيلىگىمىزدى ايشىقتاپ, ەل بىرلىگىن نىعايتا تۇسۋگە ىقپال ەتەدى دەپ سەنەمىن» دەپ باسا ايتقان ەدى. وسى ورايدا جوبا باستاماشىسى «Alatau Aqparat» مەدياحولدينگىنىڭ باس ديرەكتورى ەرجان قالىمباي ۇلى دا ۇلىس كۇنىن ەڭ اۋەلى بالالار كۇتەتىن مەرەكەگە اينالدىرۋدى ماقسات ەتىپ وتىرعانىن ايتادى.
مەيرامنىڭ باستى كەيىپكەرلەرى رەتىندە ۇيىمداستىرۋشىلار قىدىر اتانىڭ قاسىنا نەمەرەسى باق-بالانى قوسۋدى ءجون ساناعان. ايتۋىنشا, بۇل – قازاقتىڭ «باق قاراسىن, قىدىر دارىسىن» دەگەن باتاسىنان الىنىپ وتىرعان وي. راسىندا, قىدىر اتانىڭ نەمەرەسىمەن ءجۇرۋى – ۇرپاق ساباقتاستىعى مەن ۇلتتىق تاربيەسىن كورسەتەتىن كوركەم ءرامىز ىسپەتتى.
ۇيىمداستىرۋشىلار ناۋرىزدى مەرەكەلەۋدى الماتى وبلىستىق №1 بالالار ۇيىنەن باستادى. ءار تاربيەلەنۋشىگە كيىز ءۇي پىشىنىندە تىگىلگەن بالالارعا ارنالعان «تارتۋ» قورجىنى تابىستالدى. قورجىندا قازاقستاننىڭ ءار وڭىرىنەن جەتكەن ۇلتتىق دامدەر سالىنعان. ولاردىڭ سانى – جەتەۋ. سونداي-اق التايدىڭ بالى, الماتىنىڭ الماسى سەكىلدى ەلىمىزدىڭ برەندتەرى مەن بالالارعا ارنالعان كىتاپ تا قورجىنعا سالىنعان.
ناۋرىزدا جاستار ۇلكەندەرگە ارنايى سالەم بەرىپ, قۇرمەت كورسەتىپ, باتاسىن العان. ۇلتتىق جوبانى ۇيىمداستىرۋشىلار دا ءاسانالى ءاشىموۆ, اسىلى وسمان, تورەگەلدى شارمانوۆ سىندى ۇلت زيالىلارىنا, قوعام قايراتكەرلەرىنە, سونداي-اق ەڭبەك ادامدارىنا دا سالەم بەرە باردى. ولارعا «سىباعا» قورجىنى تارتۋ ەتىلىپ, يىقتارىنا شاپان جابىلدى. قورجىندا جەتى دامنەن بولەك, داستۇرگە ساي ەتتىڭ سۇبەلى بولىكتەرى قازى-قارتا, جال-جايا مەن جامباس سالىنعان.
ۇيىمداستىرۋشىلار « ۇلى دالا ءدامى» ۇلتتىق جوباسىن الداعى جىلدارى 14 ناۋرىزدان باستاپ ايدىڭ سوڭىنا دەيىن تۇتاس رەسپۋبليكا كولەمىندە وتكىزۋدى جوسپارلاپ وتىر.
