تابيعاتپەن ەتەنە ءومىر ءسۇرىپ, ونىڭ تىنىس-تىرشىلىگىنە تيتتەي دە قيانات جاساماي ءومىر سۇرە بىلگەن اتا-بابامىزدىڭ ۇستانىمىنا ساي تۇتاس تىرشىلىكتىڭ جاڭارۋى قارساڭىندا قازاق قوعامىنىڭ جاڭا قۇندىلىقتارىن بەكىتكەن قۇرىلتاي تۇجىرىمدامالارى ۇلتىمىزعا جاڭا سەرپىلىس بەرىپ, رۋحاني دامۋىمىزعا اسەر ەتەرى ءسوزسىز دەپ ويلايمىن. قۇرىلتايدىڭ ءوتۋ ورنى دا قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعان تاريحي ولكە – اتىراۋ وبلىسىندا بولۋى - تاريحقا تاعزىم, بولاشاققا باعدار بولار ستراتەگيا ەكەنى دە قۋانتادى.
قۇرىلتايدا كوتەرىلگەن وزەكتى ماسەلە - حالىقتىڭ بەرەكە-بىرلىگىن ساقتاۋعا جانە ورتاق ماقساتقا ۇمتىلۋعا تىرەك بولۋعا نەگىزدەلگەن ۇلتتىڭ جاڭا كەلبەتىن ايقىندايتىن نەگىزگى قوعام قۇندىلىقتارى بولدى. پرەزيدەنتىمىز: ء«بىز بولاشاققا سەنىممەن قادام باسۋ ءۇشىن ءتول تاريحىمىزدىڭ اۋقىمى كەڭ ەكەنىن تولىق سەزىنىپ, مادەني مۇرامىزدى ساقتاپ, ونى دارىپتەۋىمىز قاجەت», دەپ اتاپ كورسەتتى. مۇندا ەل اعالارى مەن زيالى قاۋىمعا كوپ كۇش تۇسەتىنى بەلگىلى. مەملەكەت باسشىسىنىڭ التاۋ الا بولسا, اۋىزداعى كەتەدى, سوندىقتان اۋزى دۋالى اعالار ۇلتتى ۇيىستىرۋعا اتسالىسۋى كەرەك دەگەنى, نەگىزگى فيلوسوفياسى ۇلكەندى سىيلاۋ مەن ادامگەرشىلىكتەن تۇراتىن قازاق قوعامى ءۇشىن وتە ماڭىزدى دەپ ويلايمىن.
وسى ورايدا قازاق حالقىنىڭ تاريحي جولىن ۋاقىت تەزىنە سالىپ, ءادىل باعاسىن بەرۋ دە, وتكەننەن ساباق الىپ, ەلىمىزدى العا سۇيرەۋدىڭ العى شارتى ەكەنى انىق. پرەزيدەنتىمىزدىڭ ەلىمىزدىڭ ءبىرتۇتاس يدەولوگيالىق كەڭىستىگى مەن ۇرپاق تاربيەسىنە زيانىن تيگىزەتىن قازاقتىڭ ءبىر-ءبىرىن ءبولىپ-جارۋى, ءوز شەجىرەسىن عانا ۇلىقتاۋى جانە ونى ساياساتپەن ارالاستىرۋدى قاتاڭ سىناۋى, سونىمەن قاتار جەكە مۇددەسىن ەمەس, ەل مۇددەسىن بارىنەن بيىك قوياتىن ازاماتتاردىڭ ۇرپاققا ۇلگى بولۋى قاجەت ەكەندىگى وتە ورىندى پىكىر. ءبىر جاعادان باس, ءبىر جەڭنەن قول شىعارۋ ءپرينتسيپى عانا تۇتاستىققا, ال تۇتاستىق دامۋعا اكەلەتىندىگى, بۇگىن اشىلىپ وتىرعان زاڭدىلىق ەمەس, اعايىن.
ۇلتتى ۇلت ەتىپ, ونىڭ ءدىلىن, رۋحاني قۇندىلىعىن ايقىندايتىن نەگىزگى تىرەك -ءتىل ەكەندىگى بارىمىزگە ايان. پرەزيدەنتىمىز «قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ, عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق», دەپ بولاشاق تىزگىنى قازاق تىلىندە ەكەندىگىن باسا ايتۋى دا, بالام ءوز ءتىلى مەن ءدىلىن ۇمىتىپ, دۇباراعا اينالا ما, دەپ ۋايىمدايتىن, قوڭىر تىرشىلىك كەشكەن قارا قازاق كوكەيىنە ءۇمىت وتىن ۇيالاتقاندىعى قۋانتتى. «تىلىمىزگە قامقورلىق تانىتقان جاندارعا ەرەكشە ريزاشىلىعىمدى بىلدىرەمىن» دەگەن پرەزيدەنت ءسوزى تىلگە بايلانىستى قوردالانعان ءبىراز ماسەلەنى شەشەرى ءسوزسىز.
سونىمەن قاتار پرەزيدەنتىمىزدىڭ كوتەرگەن اقپاراتتىق تەحنولوگيانىڭ پايدالى جاعىن الىپ, زياندى جاعىنان ساق بولۋ, ۇلتىمىزدى جاپپاي كىتاپ وقيتىن ۇلتقا اينالدىرۋ, مادەني مۇرامىزدى ساقتاپ, ونى دارىپتەۋ, التىن وردا برەندىن جان-جاقتى جانە كەڭىنەن پايدالانۋ, جوشى ۇلىسىن زەرتتەيتىن عىلىمي ينستيتۋت قۇرۋ, قازاقستاننىڭ جەتى تومدىق جاڭا اكادەميالىق تاريحىن جازۋ, ەرەكشە تاريحي نىسانداردى يۋنەسكو مۇرالارى تىزىمىنە قوسۋ, باي تاريحي-مادەني مۇرالاردى ساقتاۋ ءۇشىن ارحەولوگيا سالاسىندا ءتارتىپ ورناتۋ, ارحەولوگيا سالاسىنا قاتىستى زاڭداردى جەتىلدىرۋ, ليتسەنزيا بەرۋ ءىسىن رەتتەۋ جانە ارحەولوگيالىق قازبا جۇمىستارىن زاڭسىز جۇرگىزگەنى ءۇشىن جازانى كۇشەيتۋ, ءاز ناۋرىزدىڭ مارتەبەسىن كوتەرىپ, مازمۇنىن بايىتۋ, ۇلتتىق كيىم كۇنىن اتاپ ءوتۋ, ءىرى كومپانيالار مەن وقۋ ورىندارىندا ۇلتتىق ناقىشتا كيىنۋ ءۇردىسىن ەنگىزۋدى قولداۋ, قوجا احمەت ياسساۋي مۇرالارىن تەرەڭ زەردەلەپ, دارىپتەۋگە دە ايرىقشا نازار اۋدارۋ, ءداستۇرلى وتباسى قۇندىلىقتارىن تاباندى تۇردە ورنىقتىرۋ ماسەلەلەرى قوعامدا قازاق ۇلتىنا ءتان قۇندىلىقتى دامىتۋعا بىردەن-ءبىر سەپ بولارىنا كۇمان جوق. ءبىر قاراعاندا ۇساق-تۇيەك كورىنەتىن ماسەلە ارتىندا ۇلت تۇلعاسىن قالىپتاستىرار ۇلكەن فاكتورلار جيىنتىعى جاتاتىندىعى بەلگىلى. وسى كۇردەلى ماسەلە مەملەكەت باسشىسىنىنىڭ نازارىنان تىس قالماعان ەكەن. بۇل قۋانتارلىق جايت.
ەلىمىزدەگى مارتەبەلى وردەننىڭ ءتۇرلى دارەجەلەرىن ساعادات نۇرماعامبەتوۆ, باۋىرجان مومىش ۇلى جانە راقىمجان قوشقارباەۆتىڭ ەسىمدەرىمەن اتاۋ وسكەلەڭ ۇرپاق بويىنا پاتريوتتىق سەزىم ۇيالاتىپ, قازاق ۇلتىنا دەگەن ماقتانىشىن ارتتىرارى ءسوزسىز.
اسىرەسەسە ۇلتتىڭ جاڭا ساپاسىن قالىپتاستىرۋعا كەدەرگى جاسايتىن 5 جاڭا كەسەلدەر اتالىپ, ونىمەن كۇرەسۋدىڭ جولدارىن ۇسىنۋ - دەنى ساۋ, زيالى دا, كوركەم مىنەزدى جاڭا ساپالى ۇرپاق ءوسىرۋ ءۇشىن ەڭ ءبىر قاجەتتى شارا دەپ ەسەپتەيمىن.
توقسان اۋىز ءسوزدىڭ توبىقتاي ءتۇيىنى - جاڭارۋعا بەت العان تىرشىلىكپەن استاسقان قۇرىلتايدا جالپىۇلتتىق قۇندىلىقتار جۇيەسى بەكىتىلىپ, قازاق ەلىن جاڭا ساپاعا اكەلەر رۋحاني جول ايرىعى ايقىندالدى. قوعامنىڭ رۋحاني قۇندىلىعىن دامىتۋ رۋحتى ۇلت قالىپتاستىرادى.
سانا قاناتبەكقىزى,
تەحنيكا عىلىمدارىنىڭ كانديداتى, قاۋىمداستىرىلعان پروفەسسور - ينجەنەرلىك بەيىندى زەرتحاناسىنىڭ جەتەكشى عىلىمي قىزمەتكەرى
