فوتو: Almaty-akshamy.kz
ءسان سالتاناتى جاراسقان قاتىسۋشىلاردى اتاپ وتسەك, وتاۋ قۇرعاندارىنا 50 جىل تولعان «التىن توي» يەلەرى اقجار اۋىلىنىڭ تۇرعىندارى بەيسەنباي قاسەنوۆ پەن ءسابيرا اشىمۇحانبەتوۆا, قابانباي اۋىلىنىڭ تۇرعىندارى سەيىتحان يماجانوۆ پەن باقتىكامال ەلەۋسىزوۆالار كورەرمەن ىقىلاسىنا يە بولدى. شاڭىراق كوتەرگەندەرىنە 25 جىل تولعان «كۇمىس توي» يەلەرى ەرمەك يسكاكوۆ پەن بوتاكوز الداكەنوۆا, داۋرەن تولەۋباەۆ پەن ايناش كازرەتوۆا, جاڭالىق اۋىلىنىڭ تۇرعىندارى سارىمباەۆ سۇڭعات پەن كاجەنوۆا بالجان, سونداي-اق ۇيلەنگەندەرىنە 20 جىل تولعان «فارفور توي» يەلەرى باقىتجان ەگىنباەۆ پەن دينارا ەگىنباەۆالار دا بويدا بار قازاقى ونەرلەرىن ورتاعا سالدى.
اۋەلدە قاتىسۋشىلاردىڭ وتباسىنداعى جەتىستىكتەرى ۇلكەن ەكراننان بەينەبايان ارقىلى كورسەتىلدى. «التىن توي» يەلەرىنە 50 جىل بۇرىنعى وتكەن ومىرلەرىن ەسكە سالىپ, قىزىقتى سۇراقتار قويىلدى. ماسەلەن, ول كەزدە قىزدى ايتتىرىپ بارعاندا سىرعا سالۋ, ء«ماھر» سۇراۋ سەكىلدى داستۇرلەر بولدى ما دەگەن جۇرگىزۋشى سۇراعىنا توسىلىپ قالعاندار دا بولدى. مۇنداي سۇراق استارى قازاقىلىعىمىزدان اجىراماۋ, داستۇردەن اداسپاۋدى دا ماقسات ەتكەن. «التىن توي» يەلەرى جاستارعا باقىتتى بولۋدىڭ سىرىن ايتىپ, بىردە كۇلدىرسە, بىردە تەرەڭ ويعا باتىردى. اق باتالارىن, جۇرەكجاردى تىلەكتەرىن ايتتى. ۇلگىلى وتباسىلار بايقاۋدا جەڭىستەن بۇرىن تاربيەلىك ءمانى زور اڭگىمەلەر ايتۋعا تىرىستى.
– اتالارىڭمەن وتاسقانىمىزعا ەلۋ جىلدان استى. وتباسى بولعان سوڭ ءومىردىڭ ىستىعى مەن سۋىعىن بىرگە كورۋ كەرەك. ءيا, ىدىس-اياق سىلدىرلاماي تۇرمايدى. وندايدا كەشىرىمدى بولۋ كەرەك. تۇسىنىستىك تانىتۋ كەرەك. ونىڭ ءبارى – ۇساق-تۇيەك. ەڭ باستىسى, ۇرپاق اماندىعىن تىلەيمىز. ۇلتىن, ەلىن سۇيەتىن ۇرپاقتىڭ عۇمىر جاستارى ۇزاق بولسا دەيمىن. سانالى ۇرپاق, ساپالى ءبىلىم بولسا, ەل ەرتەڭى جارقىن – دەيدى ءسابيرا اشىمۇحانبەتوۆا.
ايتا كەتەيىك, بەيسەنباي اتا 29 جىل اباي اتىنداعى ورتا مەكتەبىندە ديرەكتوردىڭ شارۋاشىلىق جونىندەگى ورىنباسارى قىزمەتىندە بولىپ, قۇرمەتتى زەينەت دەمالىسىنا شىققان. سابيرا اجە اقجارداعى اۋىلشارۋاشىلىق كوللەدجىندە 30 جىلدان اسا ۋاقىت تاربيەشى قىزمەتىندە بولىپ, قۇرمەتتى دەمالىسقا شىققان. ەكەۋى ءۇش ۇل تاربيەلەپ ءوسىرىپ, ولاردان 6 نەمەرە ءسۇيىپ وتىرعان اتا مەن اجە. ەكەۋى 2020-2021 جىلدارى «اۋداننىڭ الەۋمەتتىك ەكونوميكاسىن دامىتۋعا قوسقان ۇلەسى ءۇشىن» توسبەلگىسىمەن ماراپاتتالعان. سونداي-اق وسىدان جەتى جىل بۇرىن قۇرىلعان تارباعاتاي ارداگەرلەر ءان-بي ءانسامبلىنىڭ نەگىزىن قالاۋشىلار دا – بەيسەنباي اتا مەن ءسابيرا اجە. ۇلدارى ايدىن – وسى انسامبلدىڭ كوركەمدىك جەتەكشىسى. سابيرا اشىمۇحانبەتوۆا كۇنى كەشە «مەن ايەلمىن, الەمنىڭ اناسىمىن» اتتى وبلىستىق بايقاۋعا قاتىسىپ, باس جۇلدەنى جەڭىپ الدى.
ءىس-شارا سوڭىندا احات ءبولىمىنىڭ باسشىسى ءارى وسى ءىس-شارانىڭ ۇيىمداستىرۋشىسى گۇلجان قالتاەۆا ماحابباتتارى جاراسىم تاپقان «التىن توي», «كۇمىس توي» يەلەرىنە سالتاناتتى تۇردە اۋداننىڭ قۇرمەت كىتابىنا قول قويدىرىپ, تىركەۋ ءراسىمىن جۇرگىزدى. بارلىعى مەرەيتوي يەلەرىن قۇتتىقتاپ, جىلى لەبىزدەرىن ءبىلدىردى.
شىعىس قازاقستان وبلىسى,
تارباعاتاي اۋدانى
