فوتو: اقوردا
«بارشا مۇسىلمان قاۋىمى رامازان ايىن اسىعا كۇتەدى, وسى قاسيەتتى ايدا ەڭ اسىل تىلەكتەرىن تىلەپ, دۇعالارىن جاسايدى. جۇرتشىلىق يمانىن كۇشەيتىپ, رۋحاني تازارادى. ازاماتتارىمىز مۇقتاج جاندارعا كومەكتەسەدى, باسقا دا يگى امالدار جاسايدى. مۇنداي قادامدار, تۇپتەپ كەلگەندە, ءار ادامعا, ءار شاڭىراققا بەرەكە اكەلەدى. سول ارقىلى ەلىمىزدىڭ ىنتىماعى ارتا تۇسەدى», دەدى پرەزيدەنت.
قاسىم-جومارت توقاەۆ يسلام ءدىنىن ءتول مادەنيەتىمىزدىڭ اجىراماس بولىگى ەكەنىن ايتىپ, اتا ءدىنىمىزدىڭ ادامزاتتى مەيىرىمدى, ادال, ءبىلىمپاز جانە ەڭبەكقور بولۋعا ۇندەيتىنىن جەتكىزدى.
«وسى اسىل قاسيەتتەر حالقىمىزدىڭ سالت-داستۇرىنەن دە ايقىن كورىنەدى. وزدەرىڭىزگە ءمالىم, مەن ۇلتتىڭ جاڭا ساپاسىن قالىپتاستىرۋ تۋرالى ۇنەمى ايتىپ ءجۇرمىن. قۇرىلتاي كەزىندە دە ايتتىم. ەلىمىزدىڭ ءاربىر تۇرعىنى ناعىز «ادال ازامات» بولۋى كەرەك. ءبىز جاس ۇرپاقتىڭ بويىنا ۇدايى جاقسى قاسيەتتەردى سىڭىرە بەرۋىمىز قاجەت», دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, وزىق ەل بولۋ ءۇشىن ازاماتتارىمىزدىڭ مىنەز-قۇلقى, ءىس-ارەكەتى, ويى, نيەتى – ءبارى دە سوعان ساي بولۋى كەرەك. بۇل ورايدا جاستارعا ادال ەڭبەكپەن تابىسقا جەتۋ قاجەتتىگىن ءتۇسىندىرۋ, ەل اعالارىنىڭ ومىرلىك تاجىريبەسىن ۇيرەتۋ وتە ماڭىزدى.
پرەزيدەنت بۇگىنگى ۇلتتىق قۇرىلتاي جيىنىندا ءدىن مەن ءداستۇردىڭ بىرلىگىنە ارنايى توقتالعانىن اتاپ ءوتىپ, ۇلتتىق بولمىسىمىزدىڭ ارقاۋى سانالاتىن وسى ەكى قۇندىلىقتى ءبىر-بىرىنە قارسى قويىپ جۇرگەن تەرىس اعىمدار جونىندە الاڭداۋشىلىعىن ءبىلدىردى
«اشىعىن ايتساق, ءدىن ماسەلەسى بۇل – ۇلتتىق قاۋىپسىزدىك ماسەلەسى. ءبىز سىرتتان كەلگەن جات اعىمداردىڭ ۇرپاق ساناسىن ۋلاۋىنا جول بەرمەۋىمىز كەرەك. بۇعان سالت-ءداستۇرىمىزدى ساقتاۋ جانە سانالى ۇرپاق تاربيەلەۋ ارقىلى توتەپ بەرە الامىز. وسى ورايدا قازاقستان مۇسىلماندارى ءدىني باسقارماسى ايرىقشا ءرول اتقارۋعا ءتيىس. يمان جولىنا بەت بۇرعان جاستارعا دۇرىس باعىت سىلتەۋ – وتە ماڭىزدى مىندەت. ءمۇفتيات وسى ىسكە باسا ءمان بەرىپ, مۇقيات اينالىسقانى ءجون», دەدى قاسىم-جومارت توقاەۆ.
مەملەكەت باسشىسى ەلىمىزدىڭ جاڭاشىلدىق پەن جاسامپازدىق جولىنا تۇسكەنىنە نازار اۋداردى. بۇل – ناۋرىز مەرەكەسىمەن جانە يسلام قۇندىلىقتارىمەن تولىق ۇندەسەتىن سارا جول.
«بيىلدان باستاپ ەلىمىزدە ءاز-ناۋرىزدىڭ ونكۇندىگىن جاريالادىق, ياعني ءار كۇندى ەرەكشە اتاپ وتەتىن بولدىق. بۇگىن 15 ناۋرىز – «قايىرىمدىلىققا» ارنالعان. ۇلىستىڭ ۇلى كۇنى قارساڭىندا ەلىمىزدە كوپتەگەن يگى ىستەر جاسالۋدا. حالقىمىز جاناشىرلىق, تىلەۋلەستىك, باۋىرمالدىق سياقتى اسىل قاسيەتتەرىن ءىس جۇزىندە كورسەتىپ جاتىر. بۇل, شىن مانىندە, وزىق قوعامعا ءتان سيپات دەۋگە بولادى», دەدى مەملەكەت باسشىسى.
اۋىزاشاردا قازاقستاننىڭ ەڭبەك ەرى, كومپوزيتور يليا جاقانوۆ, «ۆايناح» قازاقستان شەشەندەرى مەن ينگۋشتارى قاۋىمداستىعىنىڭ تەڭ توراعاسى احمەت مۋرادوۆ, استانا مەملەكەتتىك قىزمەت حابىنىڭ باسقارۋشى كوميتەتىنىڭ توراعاسى ءاليحان بايمەنوۆ ءسوز سويلەدى.
