فوتو: akorda.kz
ءسوز باسىندا قاسىم-جومارت توقاەۆ قۇرىلتاي مۇشەلەرى مەن بارشا قازاق حالقىن كورىسۋ كۇنىمەن قۇتتىقتادى.
«ەڭ الدىمەن, مەن بارشاڭىزعا كورىسۋ كۇنى قۇتتى بولسىن دەگىم كەلەدى. قىستان امان-ەسەن شىققان تۋعان-تۋىس, اعايىن ءبىر-بىرىمەن قاۋىشىپ جاتىر. ەل اراسىندا كورىسۋ كۇنى ەلىمىزدىڭ باتىس ايماعىنا ءتان مەرەكە دەگەن تۇسىنىك بار. بىراق بۇل قازاقتىڭ كونەدەن كەلە جاتقان ءداستۇرى ەكەنىن ۇمىتپاۋىمىز كەرەك. سوندىقتان ءبىز تۇتاس ەل بولىپ, ناۋرىز مەيرامىن وسى كۇننەن, ياعني كورىسۋ كۇنىنەن باستاپ تويلاعانىمىز جاراسىمدى بولارى ءسوزسىز», دەدى پرەزيدەنت.
مەملەكەت باسشىسىنىڭ ايتۋىنشا, جىل سايىن وتەتىن ءداستۇرلى ۇلتتىق قۇرىلتاي بيىل رامازان ايى مەن ناۋرىز مەيرامىمەن تۇسپا-تۇس كەلىپ تۇر.
«بيىل ۇلىستىڭ ۇلى كۇنى قاسيەتتى ورازا ايىنىڭ العاشقى كۇندەرىمەن تۇسپا-تۇس كەلىپ وتىر. ۇلتتىق قۇرىلتاي دا ءاز ناۋرىز قارساڭىندا ءوتىپ جاتىر. ۇلىستىڭ ۇلى كۇنى تابيعات پەن تۇتاس تىرشىلىك جاڭارادى. ال قۇرىلتايدا قوعامدىق قۇندىلىقتاردى جاڭعىرتۋ ءۇشىن ماڭىزدى قادامدار جاسالادى. جاڭارۋ مەن جاڭعىرۋ جاقسىلىققا جول اشادى. سوندىقتان قۇرىلتاي مۇشەلەرىنىڭ جىلىنا ءبىر رەت القالى جيىندا باس قوسۋى يگى داستۇرگە اينالدى.
العاشقى وتىرىس ۇلت ۇياسى ۇلىتاۋ جەرىندە وتسە, بىلتىر كيەلى تۇركىستاندا جينالدىق. بۇگىن تاعى ءبىر تاريحي ولكە – اتىراۋ وبلىسىنا كەلىپ وتىرمىز. ءۇشىنشى وتىرىستىڭ جايىق جاعاسىندا ءوتىپ جاتقانى تەگىن ەمەس. ايگىلى سارايشىق قالاسى وسى جەرگە ءتيىپ تۇر. بۇل شاھار ۇلىق ۇلىستىڭ, كەيىن قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعانى تاريحتان بەلگىلى»», دەدى قاسىم-جومارت توقاەۆ.
