ماسەلەن, وسى جىلدىڭ باسىنان بەرى ەلدى مەكەندەردەن 3,7 مىڭ تەكشە مەتر قار شىعارىلعان. سونداي-اق 244 شاقىرىمدى قۇرايتىن ارىق جەلىلەرى, 108 شاقىرىم ارنالار مەن اۆتوجولداردىڭ استىنداعى 139 بىرلىك جانە تەمىرجولداردىڭ استىنداعى 7 بىرلىك سۋ وتكىزۋ قۇبىرلارى, 65,7 شاقىرىم سۋ بۇرۋ كانالدارىنىڭ قۇرىلىسى تازارتىلعان. سۋ تاسقىنى ورىن العان جاعدايدا جالپى سانى 1 326 ادام, 471 بىرلىك تەحنيكا, 126 موتوپومپالار, 29 بىرلىك ءجۇزۋ قۇرالدارى مەن 35 460 قاپشىق قاراستىرىلعان, وبلىستىڭ ازاماتتىق قورعاۋ قىزمەتتەرىنىڭ كۇشتەرى مەن قۇرالدارىنىڭ توپتاماسى قۇرىلىپ, كومەك قولىن سوزۋعا ساقاداي ساي.
دەسە دە, اپات ايتىپ كەلمەيدى. كۇنى بۇرىن قوناەۆ قالاسىنا قاراستى قوسقۇدىق اۋلىندا اۋا تەمپەراتۋراسىنىڭ جوعارىلاۋىنا بايلانىستى توتەنشە جاعداي ورىن الىپ, 5 تۇرعىن ءۇيدىڭ اۋلاسىن سۋ باسقان. اۋىلدىڭ سولتۇستىك-باتىس بولىگىن ەگىستىك پەن جازىق جەرلەردە ەرىگەن قار سۋى باسقانى تۋرالى حابارلاما العان وبلىستىق توتەنشە جاعدايلار دەپارتامەنتىنىڭ قىزمەتكەرلەرى دەرەۋ ىسكە كىرىسىپ, قارعىن سۋدىڭ ودان ءارى جايىلماۋىنا توسقاۋىل بولدى.
«قوسقۇدىق اۋلىنداعى تۇركسىب كوشەسىندە بەس تۇرعىن ءۇيدىڭ اۋلاسىنا سۋ كىرگەن. وسى كوشەدە 30 اۋلا بار. توتەنشە جاعدايلار دەپارتامەنتى مەن جەرگىلىكتى اتقارۋشى ورگانداردىڭ كۇشتەرى بىرلەسە ينجەنەرلىك تەحنيكانىڭ كومەگىمەن ارىق قازىلىپ, ەرىگەن سۋدى بۇرۋ جۇمىستارى جۇرگىزىلدى. قاۋىپتى سەيىلتۋ جۇمىستارىنا تجد-نىڭ 30 قىزمەتكەرى, بەس تەحنيكاسى مەن ءۇش موتوپومپاسى, جەرگىلىكتى اتقارۋشى ورگانداردان ءتورت ادام جانە تەحنيكا جۇمىلدىرىلدى. زارداپ شەككەندەر جوق. وسى ۋاقىتتا تۇرعىن ۇيلەردى سۋ باسۋ قاۋپى جويىلدى», دەيدى قوناەۆ قالالىق توتەنشە جاعدايلار باسقارماسىنىڭ باستىعى, پولكوۆنيك مۇرات سىدىقوۆ.
الماتى وبلىسى
