انشەيىندە ورتاسى ويسىراي, جارتىلاي جۇدەپ تۇراتىن مادەنيەت سارايىندا بۇل كۇنى ينە شانشار جەر بولمادى. وسىعان قاراپ-اق, ءان ۇشىپ, ولەڭ قونعان وڭىردەگى ءداستۇرلى انشىگە دەگەن ءدۇيىم جۇرتتىڭ قۇرمەتىن, ۇلتتىق ونەرگە دەگەن ىقىلاسىن اڭعارۋعا بولار ەدى. جارتى عاسىر كيەلى ساحنا تورىندە ادەمى قوڭىر داۋسىمەن تىڭدارمان قاۋىمنىڭ تالعامىنان شىعىپ كەلە جاتقان ءانشى قازاقستان كومپوزيتورلارىنىڭ شىعارمالارى مەن ەستە جوق ەسكى كەزەڭدەگى ساف التىنداي جارقىراعان حالىق اندەرىن ۇزبەي ناسيحاتتاۋدا. بالكىم شىعارماشىلىق قورىنىڭ مولدىعى ونەردى سۇيگەندىگىنەن شىعار. جالعىز كوكشە جۇرتشىلىعى عانا ەمەس, الدەنەشە شەتەلدىڭ كىرپياز كوڭىل تىڭدارمانى دا بيسارانىڭ ونەرىنە ءتانتى بولعان. 2001 جىلى قازاقستان رەسپۋبليكاسى تاۋەلسىزدىگىنىڭ 10 جىلدىعىندا بيسارا ماكەنوۆانىڭ قايتالانباس عاجاپ داۋسى الاشتىڭ ءان ونەرىنىڭ سۇڭعىلا ساڭلاقتارى عاريفوللا قۇرمانعاليەۆ, كەنەن ازىرباەۆ, بايعابىل جىلقىباەۆتارمەن قاتار قويىلىپ, «عاسىرلار سازى», «قازاقستان حالىقتىق مۋزىكالىق انتولوگياسى» اتتى التىن ديسكى جازىلدى. «كوكشەتاۋىم – ءان تۋىم!» جەكە ءان جيناعى جارىق كوردى.
شىعارماشىلىق كەشتە اسەم ءان شىرقالىپ, كۇمبىرلەگەن كۇي تارتىلدى. كوكشە تورىندەگى كورىكتى كەشكە ارنايى كەلگەن قازاقستان رەسپۋبليكاسىنىڭ ەڭبەك سىڭىرگەن ءارتىسى مايرا ءىلياسوۆا مەن قازاقستاننىڭ مادەنيەت قايراتكەرى ارايلىم راحىمقىزى ءماندى شارانىڭ مازمۇنىن ۇستەي ءتۇستى. كەش بارىسىندا قازاقستاننىڭ حالىق ارتىستەرى قايرات بايبوسىنوۆ, روزا رىمباەۆا, رامازان ستامعازيەۆ بەينەبايان ارقىلى جىلى لەبىزدەرىن جەتكىزدى.
قارت سەمەيدە تۋىپ, بار شىعارماشىلىق عۇمىرى ءان بەسىگى – كوكشەدە ءوتىپ كەلە جاتقان بيسارا ماكەنوۆا ەلگە دەگەن ريزاشىلىعىن جەتكىزگەن كەزدە تەبىرەنبەگەن ادام قالعان جوق. كەشتىڭ تاقىرىبى دا تاۋىپ قويىلعان ەكەن دەستى. شىنىندا دا كورىكتى كوكشە اسىلىن ارداقتاي بىلەتىن, بار مەيىرىن توگەتىن, مارتەبەسىن اسىراتىن جەر عوي. سونداي ىقىلاستى كورىپ كەلە جاتقان انشىگە ءان كوگىندە قالىقتار شالقار شابىت سىيلاعان دا ەلدىڭ انگە, انشىگە دەگەن ءمولدىر ماحابباتى. ال ءانشى بولسا «اينالايىن كوكشەدەن, ەركەلەتكەن» دەپ ءدوپ باسىپ ايتىپ وتىر.
كوكشەتاۋ
