ءۇش مىڭ جىل بۇرىن جازىلعان ليكيالىق ولەڭ بار. اۆتورى بەلگىسىز. ونى اقىن فايزۋللا ءتولتاي قازاق تىلىنە اۋدارعان. ىڭكارلىككە تولى ولەڭ «عاسىرىڭنان مەنى ىزدەپ تابا الماساڭ مۇڭايما, مەن قولدانعان زاتتاردى كوزىڭ شالار قالايدا» دەپ باستالادى. ارحەولوگ عالىمدار وسى ولەڭ سياقتى عاسىرلاردى ەڭسەرگەن عاشىقتىق حاتتارىن تاپقان. مىسالى, ون عاسىر بۇرىن قايىڭ قابىعىنا جازىلعان ماحاببات حاتتارىنىڭ وسى كۇنگە دەيىن مىڭنان استامى تابىلعان. سونىڭ بىرىندە «مەن ساعان ءۇش رەت حات جىبەردىم. ساعىنىشىمدى جازدىم. الىپ-ۇشىپ كەلەر دەدىم. تىلەۋىڭدى كىمنەن سۇرايىن؟» دەگەن ورنەك تۇر.
روكسولونانىڭ سۇلەيمەن سۇلتانعا جازعان نازىكتىككە تولى حاتىن قالاي ايتپاي كەتەمىز؟ ول كوزىنىڭ ىستىق جاسى تيگەن حاتىنا «مەن ءتاڭىردىڭ جاراتقان دۇنيەسىندە جوعالعان پەندەمىن. عۇمىرىمنىڭ كوكتەمىن اسىل تاستار قوبديشاسىنداعى مەرۋەرتتەي ءسىزدىڭ قورعاۋىڭىزدا ءسۇردىم. تەك ءسىزدىڭ قاسىڭىزدا عانا جان تىنىشتىعىن تاپتىم», دەپ جازعان.
ال پومپەي – ىستىق لاۆا مەن كۇل استىندا قالعان قالا رەتىندە تانىمال. جەرگىلىكتى تۇرعىندار قيراندى قابىرعالارىنا حات قاشاپ تۇسىرگەن. نەگىزگى تاقىرىپتار: ساياسات جانە ماحاببات. ەتنوگرافتار مىنا حات جاۋاپسىز قالعان دەيدى: ء«بىز باقىتىمىزدى كەشىكتىرىپ, ءۇمىتىمىزدى جەلگە ۇشىرىپ, نەگە ۇنەمى «ەرتەڭ» دەپ ايتامىز؟». ايتپاقشى, جوعارىدا جازعان ليكيالىق ولەڭنىڭ سوڭى وسى حاتقا جاۋاپ بولا الاتىن سەكىلدى: «مىڭجىلدىقتار قاقپاسىن بۇزىپ ءوتىپ, بىزدەگى – تىم بولماسا قاۋىشار قولىمىزدىڭ ىزدەرى».
ارحەولوگتەر تاپقان عاشىقتىق حاتتارى – وسىنداي. ال ءسىز ونى ءوز جۇرەگىڭىزدەن ىزدەڭىز.
