فوتو: قورعانىس مينيسترلىگى
قۇزىرلى ورگان تۇرعىندارعا جاعدايدى بۇرمالاپ, جالعان اقپارات تاراتپاۋدى سۇرادى.
«قارۋلى كۇشتەردىڭ جاۋىنگەرلىك دايىندىق باعدارلاماسى شەڭبەرىندە 13 ناۋرىز كۇنى اقمولا گارنيزونى اسكەري بولىمدەرىنىڭ اسكەري قىزمەتشىلەرى استانا قالاسىنىڭ ماڭىنداعى بەلگىلەنگەن اۋداندارعا جاۋىنگەرلىك تەحنيكامەن مارش جاسايدى. ءىس-شارا گارنيزون اسكەري بولىمشەلەرى كۇشتەرى مەن قۇرالدارىنىڭ جاۋىنگەرلىك ازىرلىگىن كەشەندى تەكسەرۋدىڭ كەزەكتى كەزەڭىنە باعىتتالعان», دەپ مالىمدەدى مينيسترلىك.
جاۋىنگەرلىك دايىندىق جۇرگىزۋ كەزىندە ەلوردا ماڭىندا, قاراعاندى تراسساسىندا اسكەري تەحنيكا لەگى ءوتىپ بارا جاتقان كەزدە جولدا اۆتوكولىك قوزعالىسىنا ۋاقىتشا شەكتەۋ ەنگىزىلۋى مۇمكىن.
«وسىعان بايلانىستى ازاماتتاردان ءوتىپ جاتقان ىس-شارالارعا تۇسىنىستىكپەن قاراۋدى جانە تىنىشتىقتى ساقتاۋدى سۇرايمىز. سونىمەن قاتار الەۋمەتتىك جەلىلەردى پايدالانۋشىلاردان اسكەري تەحنيكانىڭ قوزعالىسى تۋرالى جالعان حابارلامالار مەن بەينەماتەريالدار تاراتپاۋدى جانە تەك رەسمي اقپارات كوزدەرىنە سەنۋدى سۇرايمىز», دەلىنگەن حابارلامادا.
