فوتو: primeminister.kz
قازىرگى ۋاقىتتا «Kazakh Invest» جالپى قۇنى 27,3 ملرد دوللاردى قۇرايتىن 200 جوباعا قولداۋ كورسەتىپ وتىر. اتالعان ءىس-شارالار اياسىندا 68,8 مىڭ جۇمىس ورنىن قۇرۋ كوزدەلگەن. بيىل شەتەلدىكتەردىڭ قاتىسۋىمەن 40-تان استام جوبا ىسكە قوسىلادى دەپ كۇتىلەدى.
ولاردىڭ ىشىندە ەڭ ماڭىزدىلارىنىڭ ءبىرى – استانا قالاسىندا ورنالاسقان امەريكالىق «GE Healthcare» كومپانياسىنىڭ مەديتسينالىق قۇرال-جابدىقتارىن شىعاراتىن كاسىپورنى. جوبا شەڭبەرىندە ۋدز جانە كت اپپاراتتارىنىڭ ءوندىرىسى لوكاليزاتسيالانادى. بۇل وتاندىق اۋرۋحانالاردى قامتاماسىز ەتىپ قانا قويماي, بولاشاقتا باسقا ەلدەرگە ەكسپورتتى جولعا قويۋعا مۇمكىندىك بەرەدى. سونىمەن قاتار كومپانيا رەسپۋبليكانىڭ دەنساۋلىق ساقتاۋ جۇيەسىندەگى كادرلاردىڭ بىلىكتىلىگىن ارتتىرۋعا ءبىلىم باعدارلامالارىن ۇيىمداستىرۋدى جوسپارلاپ وتىر.
سونداي-اق شۆەيتساريالىق «Roche» كومپانياسى الداعى ۋاقىتتا ەكسپورتقا شىعۋ پەرسپەكتيۆاسىمەن الماتىدا ىسىككە قارسى پرەپاراتتار ءوندىرىسىن ىسكە قوسادى.
اۋستريالىق «Lasselsberger» كومپانياسى استانادا كەراميكالىق پليتكالار, قۇرعاق قۇرىلىس قوسپالارى مەن قۇرىلىس جەلىمدەرى ءوندىرىسىن لوكاليزاتسيالاپ جاتىر. جاڭا زاۋىتتىڭ اشىلۋى 200-دەن استام جۇمىس ورنىن قۇرۋعا مۇمكىندىك بەرەدى جانە قازاقستان نارىعىنىڭ وسى ونىمدەردەگى يمپورتقا تاۋەلدىلىگىن تومەندەتەدى.
پرەمەر-ءمينيستردىڭ تاپسىرماسى بويىنشا «Kazakh Invest» الداعى جۇمىسىندا استىقتى تەرەڭ وڭدەۋ, پلاستماسسانىڭ سۇرانىسقا يە تۇرلەرىن ءوندىرۋ, مۇناي-گاز جابدىقتارىن جانە يمپورت كولەمى جوعارى باسقا دا تاۋارلاردى وقشاۋلاۋ بويىنشا كەلەشەكتەگى جوبالارعا ينۆەستورلار تارتۋعا باسىمدىق بەرەتىن بولادى.
«مەملەكەت باسشىسى 2029 جىلعا قاراي ەكونوميكا كولەمىن 450 ملرد دوللارعا دەيىن ۇلعايتۋ مىندەتىن قويدى. سوندىقتان ءىرى ينۆەستورلاردى ىزدەۋ جانە ولاردى ەلىمىزگە تارتۋ بويىنشا جۇمىستى كۇشەيتۋ كەرەك. بۇل ورايدا باتىل ءارى جاڭاشىل شەشىمدەر قاجەت», دەپ اتاپ ءوتتى پرەمەر-مينيستر.
