سەرىكتەستىك اۋەلى قاراپايىم ورىندىق جاساۋدى قولعا العان. بىرنەشە ءتۇرىن. جەپ-جەڭىل, ءاپ-ادەمى. كەيىن كوزتارتارلىق ەتىپ سان الۋان ويۋ-ورنەكپەن اشەكەيلەگەن. تسەحتاعى مامانداردىڭ ايتۋىنا قاراعاندا, اعاشقا جان ءبىتىرۋ ۇلكەن قاجىر-قايراتتى, شىدامدىلىقتى تالاپ ەتەدى. ورىندىقتان باستالعان وڭدى ءىس بىرتە-بىرتە ارناسىن كەڭەيتە باستاعان. وعان سەبەپ بولعان جايت – تۇتىنۋشىلاردىڭ تىلەگى. زەرەندى اۋىلىندا وسىنداي كاسىپورىننىڭ بار ەكەنىن ەستىپ, ءونىمىنىڭ ءوڭىن كورگەننەن كەيىن ىقىلاستارى اۋسا كەرەك. ءاسۇي جيھازدارىن جاساۋعا تاپسىرىس بەرە باستاعان. قازىر ايىنا شامامەن قىرىق تەكشە مەتر وڭدەلگەن اعاشتان مىڭعا جۋىق ورىندىق پەن 500-گە تارتا ۇستەلدى نارىققا شىعارادى.
ءبىر ايتا كەتەرلىگى, اعاش تسەحىنداعى جۇمىستىڭ 80 پايىزدان استامى اۆتوماتتاندىرىلعان. قول ەڭبەگىن مەيلىنشە ازايتقاننان كەيىن جۇمىس تا ءونىمدى. شيكىزاتتى جونىپ, قىرلاپ, قالىپقا كەلتىرەتىن وسى زامانعى ارنايى قۇرىلعىلار الىس-جاقىن شەتەلدەردەن جەتكىزىلگەن. جالعىز قۇرىلعىمەن 16 بۇيىمدى ءبىر ۋاقىتتىڭ ىشىندە ويۋ-ورنەكپەن بەزەندىرۋگە بولادى ەكەن. ىلكىمدىلىگىنە قاراپ ريزا بولاسىڭ. ال بۇيىمدى كوركەم ەتىپ, جۇتىندىرىپ شىعارۋ ءۇشىن ءبىر تاۋلىكتەن اسا ۋاقىت جۇمسالادى.
– مىنانداي ستانوكپەن كەز كەلگەن بۇيىمدى جاساۋعا بولادى, – دەيدى اعاش شەبەرى اناتولي ليتۆينوۆ. – بىزدەگى ستانوكتاردىڭ بارلىعى سۋ جاڭا ءارى وسى زامانداعى اعاش وڭدەۋ سالاسىنداعى وزىق نۇسقالار. قازىر مەن قازاقتىڭ ءار ورنەگىنە مول ماعىنا سىيعىزىپ, ۇلتتىق ۇعىمنىڭ ۇشقىنىن بەينەلەيتىن ويۋ-ورنەك قوندىرىلعان جينالمالى ۇستەلدەردى جاساپ جاتىرمىن. ابدەن كەۋىپ, كەمەلىنە كەلگەن اعاش كوبەلەكتەي جەپ-جەڭىل, ىقشام ءارى مىق شەگەدەي مىقتى بولادى. مىنانداي دوڭگەلەك ۇستەلگە جاعالاي وتىرسا, ون ادام ەركىن سىيىپ كەتەدى. قوناقجاي حالىقتىڭ داستارقانى جينالمايتىن جاقسى ادەتى بار عوي. دوڭگەلەك ۇستەلدىڭ ءبىر جاقسى جەرى كوپ ورىن المايدى. مەيمانىڭدى كۇتىپ بولعان سوڭ ىقشامداپ جيناپ, ءبىر قالتارىسقا قويا سالاسىڭ. ال جەرگىلىكتى جۇرت ۇستەلدىڭ ۇستىندەگى ويۋ-ورنەكتى كورگەن كەزدە ىقىلاسى اۋىپ تۇرادى. ۇستەلدەردىڭ كولەمى ءارتۇرلى. ونى پاتشا كوڭىل تۇتىنۋشىنىڭ تىلەگى بىلەدى. ءتورت ادامدىعىن دا, سەگىز ادامدىعىن دا جاسايمىز. تاپسىرىس بەرگەننەن كەيىن ءارى كەتسە ءۇش كۇننىڭ ىشىندە ويماقتاي ەتىپ قولدارىنا ۇستاتامىز.
نەگىزى جيھاز جاساۋعا قاراعاي قولدانىلادى ەكەن. سەرىكتەستىك ديرەكتورى اقمارال وماروۆانىڭ ايتۋىنا قاراعاندا, ءبىر كەزدە قۇرىلىس ماتەريالدارىن رەسەيدەن جەتكىزگەن. ءسىبىر قاراعايلارى ادامنىڭ قولى جەتپەيتىندەي جۋان بولعانىمەن, ناعىز جيھاز جاساۋعا جارامسىزداۋ بولىپ شىقتى. ءىشى كەۋىك, بورپىلداق. ال كوكشە قاراعايلارى شاقپاق تاستاي مىقتى, بەرىك.
– قازىر ەڭ باستى قيىندىق شيكىزاتتا, – دەيدى اقمارال وماروۆا. – باعاسى قىمباتتاعاننان كەيىن ءونىمنىڭ وزىندىك قۇنى دا ءوسىپ كەتەدى. ال ءبىز تۇراقتى تۇتىنۋشىلارىمىزدىڭ كوڭىلىن جىققىمىز كەلمەيدى. جولىمىزدا كەسە-كولدەنەڭ جاتقان بار ماسەلە وسىعان كەلىپ تىرەلەدى. ايتپەسە, سەرىكتەستىك شەبەرلەرىنىڭ قولىنان شىققان جيھازدار ءبىر شەتى اقتوبە مەن قاراعاندى, استاناعا دەيىن بەلگىلى بولىپ قالدى. بالكىم, ءبىزدىڭ الدىمەن ساپاعا كوڭىل اۋدارۋىمىز سەپتىگىن تيگىزىپ تۇرعان شىعار.
ءسال عانا تاراتىپ ايتاتىن بولساق, جۇمىسىن جولعا قويىپ, تاسى ورگە دومالاي باستاعان كاسىپورىن بىرنەشە جۇمىستى بىرىكتىرىپ وتىر. قاجەتتى شيكىزاتتى وڭدەۋدەن باستاپ دايىن ءونىمدى نارىققا شىعارعانعا دەيىنگى بارلىق جۇمىس اتاۋلى وسى تسەحتا ورىندالادى. جەرگىلىكتى جەردىڭ جيھازىمەن شاڭىراعىنا شىراي كىرگىزگەن تۇتىنۋشىلاردىڭ بەرگەن باعاسى, ايتقان لەبىزىنە قاراعاندا, ساپاسى شەتەلدىك ونىمدەردەن سىنىقسۇيەم جوعارى بولماسا, ەش كەم ەمەس.
ارالاپ كوردىك. جۇمىسى كوڭىل توعايتار كاسىپورىن بەس تسەحتان تۇرادى ەكەن. وڭ قاناتتاعى بىرەۋىندە شيكىزات وڭدەلىپ, ءبىرشاما پىشىندەلىپ, قالىپقا كەلتىرىلسە, ەكىنشىسىندە كوز جاۋىن الاتىن كورىكتى ويۋ-ورنەكپەن ارلەنەدى. كەلەسى تسەحتا دايىن بۇيىم سۇرگىلەنىپ, ارنايى ساپالى بوياۋمەن سىرلانادى. ازىرگە مۇندا وننان استام ادام جۇمىس ىستەپ, تۇراقتى تابىس تاۋىپ وتىر. كاسىپورىننىڭ ەلگە جاققان تۇسى دا وسى.
اقمولا وبلىسى,
زەرەندى اۋدانى
