حالىقارالىق ايەلدەر كۇنى مەرەكەسىنىڭ مارتەبەسىنە لايىقتى جان ىزدەگەندە ويىمىزعا اسەلدىڭ سوزدەرى ورالدى. «وتاعاسىدان ءبىر قادام ارتتا, ءبىر باسپالداق تومەندە بولسىن دەگەنمەن, ەردىڭ قارۋىن اسىنىپ, قالامىن ۇستاۋعا, جولىن باسىپ, ءىسىن جالعاستىرۋعا قازاقتا قىزعا تىيىم جوق قوي!» دەگەن ەدى ءبىر جولى. بۇگىندە قازجولعزي عىلىمي-زەرتتەۋ ورتالىعىنا باسشىلىق ەتىپ وتىرعان اسەل نۇعمانوۆا تەڭ قۇربىدان تاربيە مەن ءبىلىمى اسىپ, گيمنازيانى «التىن بەلگىگە» اياقتادى. تاۋ كوتەرەر تالاپپەن ءىلىم مەن ءبىلىمنىڭ سوڭىنا ءتۇسىپ, عىلىمنىڭ ءتۇپ تەرەڭىنە «قۇنىقتى». ءسويتىپ ءجۇرىپ عۇمىرلىق ءحوببيى دە عىلىم جولى ەكەنىنە كوزى جەتتى. بۇگىندە فيلوسوفيا عىلىمدارىنىڭ دوكتورى. اكادەميالىق دارەجەسى – PhD.
ۇلىبريتانياداعى ليۆەرپۋل ۋنيۆەرسيتەتىندە قۇرىلىس ينجەنەرياسىنىڭ قىر-سىرىنا قانىعىپ, 2014 جىلى ۇزدىك ءبىتىردى. ءبىر بۇل ەمەس, نازارباەۆ ۋنيۆەرسيتەتىندە ينجەنەريا سالاسىنداعى باسقارۋ مەنەدجمەنتى بويىنشا ماگيستر دارەجەسىن الدى. تۇماندى البيونداعى كۋين مەري ۋنيۆەرسيتەتى, ۇلىبريتانيانىڭ عىلىم جانە ينجەنەرلىك نەگىزگى كۋرستارىن ۇزدىك باعامەن ءتامامدادى. زاماناۋي جولدىڭ قۇرامى مەن ساپاسىن زەرتتەپ, زەردەلەيتىن تالاي زەرتحانادا ۋاقىتىن وتكىزىپ, ۇلتىنا قاجەت كوپ جاڭالىق تاپتى.
عۇمىر جاسى ەكىنشى مۇشەلىن تولتىرۋعا تاياعاندا ەل-جۇرتىنا قىزمەت قىلار كەزى كەلگەنىن سەزدى. بەلدى بەكەم بۋىنىپ, ۇلكەن تاۋەكەلمەن قازاق جول عىلىمي زەرتتەۋ ينستيتۋتىنا باردى. ماماندىعى بويىنشا قىزمەتكە تۇرىپ, 2018 جىلعا دەيىن اۆتوموبيل جولدارى مەن كوپىر قۇرىلىستارىن دياگنوستيكالاۋ ءبولىمىنىڭ جەتەكشى ينجەنەرى بولىپ قىزمەت ەتتى. سالاداعى ىزدەنىس پەن ساناداعى سىلكىنىس سول جىلى ونى بەرلين تەحنيكالىق ۋنيۆەرسيتەتىنە قىزمەتكە اكەلدى. ءسويتىپ, ەۋروپاداعى بەلدى ءبىلىم ورداسىندا جوبا مەنەدجەرى جانە زەرتتەۋشى رەتىندە ەڭبەك جولىن جالعاستىردى. ول جاقتا تەحنيكالىق جانە اكىمشىلىك قۇجاتتاما جۇرگىزدى, «ورتالىق ازيادا ەكولوگيالىق تۇراقتى ترانسپورت جۇيەسىن زەرتتەۋ» اتتى حالىقارالىق جوباعا قاتىستى, ەۋروپا ترانسپورت جۇيەسىن زەرتتەدى جانە ەلىمىزدەگى «تۇراقتى كولىك جۇيەسى» تۇجىرىمداماسىن ازىرلەپ شىقتى. ەلگە كەلىپ نازارباەۆ ۋنيۆەرسيتەتىندە جوبا باسقارۋشىسى, عىلىمي زەرتتەۋشى بولىپ جۇمىس ىستەگەننەن كەيىن, قىزمەتتىك جولى قازجولعزي-عا قايتا بۇرىلدى.
باسشىلىقتىڭ ۇسىنىسىمەن «جول-قۇرىلىس ماتەريالدارى جانە جاڭا تەحنولوگيالار» دەپارتامەنتىنىڭ جەتەكشى ينجەنەرى بولىپ ءجۇرىپ, قىسقا ۋاقىتتا ءىلىمى مەن ءبىلىمىنىڭ, بىلىگى مەن تاجىريبەسىنىڭ ناتيجەسىندە اتالعان ۆەدومستۆونىڭ ديرەكتورلىعىنا تاعايىندالدى.
ەڭبەگىڭ ەلەنىپ, شارشى توپتىڭ الدىندا ءسوز الىپ, ەل قۇرمەتىنە بولەنىپ ءجۇرۋ دە ءبىر عانيبەت. عىلىم مەن قىزمەتتىڭ تىزگىنىن تەڭ ۇستاعان اسەل قارىمدى قابىلەتىنىڭ ارقاسىندا ۇلىبريتانياداعى Teaching Excellence اكادەمياسىنان عىلىمي زەرتتەۋ داعدىلارى تۋرالى ارنايى بىلىكتىلىك سەرتيفيكاتىن العان. Harvard Project Asia (HPAIR) ستيپەندياتى. سونداي-اق نازارباەۆ ۋنيۆەرسيتەتى مەن پەنن ستەيت ۋنيۆەرسيتەتى بىرلەسىپ جۇرگىزگەن جاھاندانۋ جانە ينجەنەريا كۋرسىن ءبىتىرىپ العان سەرتيفيكاتى دا – مول ءبىلىم مەن قاجىرلى ەڭبەكتىڭ جەمىسى. ءوز ەڭبەگىنىڭ جەمىستى ناتيجەسىنەن موتيۆاتسيا الىپ, بيىككە ورلەپ بارا جاتقان اسەلدىڭ قىزمەتتىك جولى الاشتىڭ ءاربىر ارۋ قىزىنا انىق ۇلگى.
جەتىسۋ وڭىرىنە ەلەۋلى قىزمەتىمەن تانىلعان شەرنياز نۇعمانوۆ – اسەلدىڭ اتاسى. اقساقال وتكەن عاسىردىڭ 70-80 جىلدارى ايماقتاعى اتاقتى «كيروۆ» شارۋاشىلىعىندا پارتيا كوميتەتىنىڭ حاتشىسى بولدى. ودان كەيىن پانفيلوۆ اۋدانىنداعى «كراسنىي ۆوستوك» ۇجىمشارىنىڭ توراعاسى قىزمەتىن اتقاردى. قازىر اتالعان اۋداننىڭ «قۇرمەتتى ازاماتى». وعان قوسا سول كەزەڭدە اۋداندىق جانە وبلىستىق ءماسليحاتتا دەپۋتات تا بولدى. اتانىڭ ابىرويى بالاعا ءارى بەدەل, ءارى جاۋاپكەرشىلىك. اسەل ەكىنشى مىندەتتىڭ ۇدەسىنەن شىعا العانداي.
بۇگىندە ىزدەنىمپاز جاس باستاعان توپ جاڭا جول تەحنولوگيالارىن ەنگىزۋ بويىنشا زاڭ جوباسىن قايتا وڭدەپ, تىڭ تەحنولوگيالار رەەسترىن قۇرۋ جانە تەحنيكالىق كەڭەس ەرەجەلەرىن ازىرلەپ بولدى. سونىمەن قاتار كولىك سالاسىنىڭ تۇراقتى دامۋى تۋرالى جانە جول قۇرىلىسى ماتەريالدارى سالاسىنداعى عىلىمي زەرتتەۋلەردى ۇيىمداستىرىپ ءجۇر. ەكى بالدىرعانىن تاربيەلەپ, وتباسى قۇندىلىعىن دا قالىپتاستىرىپ كەلەدى.
«ايەل باقىتى» دەگەن ۇعىم ءار ايەل ءۇشىن ءارتۇرلى بولۋى مۇمكىن. ويتكەنى باقىت پەن قاناعاتتانۋ سەزىمى جەكە تاجىريبە مەن قۇندىلىقتارعا بايلانىستى. كەيبىر ايەلدەرگە باقىت وتباسىن قۇرىپ, بالا ءوسىرۋ بولسا, كەلەسى بىرەۋگە كاسىبي جەتىستىك نەمەسە شىعارماشىلىق تابىس قۋانىش سىيلايدى. ال باسقالارى ءۇشىن باقىت دەربەستىكتە, ءوزىن-ءوزى تانۋ پروتسەسىندە, ساياحاتتاۋ, قوعامدىق قىزمەتتە نەمەسە باسقا دا جەكە قىزىعۋشىلىقتار مەن قۇمارلىقتاردا بولۋى عاجاپ ەمەس. بىلە بىلگەنگە ابىرويى مەن ادامدىعى, ءبىلىمى مەن بىلىگى ۇيلەسىم تاپقان ءار قىز – ەلدىڭ قۇتى, ءار وشاقتىڭ وتى», دەدى اسەل.
