تالقىلاۋعا جاڭارتىلاتىن ەنەرگيا كوزدەرىن پايدالانۋدى قولداۋ, ەلەكتر ەنەرگەتيكاسى جانە تابيعي مونوپوليالار ماسەلەلەرى تۋرالى زاڭ جوباسىن ءبىرىنشى وقىلىمدا قاراۋ ۇسىنىلادى. پارلامەنت دەپۋتاتتارىنىڭ باستاماسىمەن ازىرلەنگەن زاڭ جوباسى ەنەرگەتيكا سالاسىن رەتتەۋگە, ونىڭ ىشىندە جاڭارتىلاتىن ەنەرگيا كوزدەرىن پايدالانۋ جونىندەگى شاعىن اۋقىمدى وبەكتىلەردى دامىتۋعا جانە وسى سالاعا ينۆەستيتسيالار تارتۋ ءۇشىن قولايلى جاعدايلار جاساۋعا باعىتتالعان. وسىعان بايلانىستى كاسىپكەرلىك كودەكسىنە, «قازاقستان رەسپۋبليكاسىنداعى كەدەندىك رەتتەۋ تۋرالى» كودەكسىنە جانە «ەلەكتر ەنەرگەتيكاسى تۋرالى», «جاڭارتىلاتىن ەنەرگيا كوزدەرىن پايدالانۋدى قولداۋ تۋرالى» زاڭدارعا تۇزەتۋلەر ۇسىنىلادى.
ءبىرىنشى وقىلىمدا دەپۋتاتتار قىلمىستىق, قىلمىستىق-پروتسەستىك جانە قىلمىستىق-اتقارۋ كودەكستەرىن وڭتايلاندىرۋ ماسەلەلەرى بويىنشا زاڭ جوباسىن قارايتىن بولادى. قۇجات مەملەكەت باسشىسىنىڭ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» قازاقستان حالقىنا جولداۋىندا قىلمىستىق جانە قىلمىستىق-پروتسەستىك كودەكستەرگە مۇقيات سارالاۋ جۇرگىزۋ تۋرالى بەرگەن تاپسىرماسىن ورىنداۋ ماقساتىمەن ازىرلەندى. زاڭ جوباسىن قابىلداۋ ازاماتتاردىڭ كونستيتۋتسيالىق قۇقىقتارىن قورعاۋدى كۇشەيتۋگە, قىلمىستىق سوت ءىسىن جۇرگىزۋگە قاتىسۋشىلاردىڭ وزدەرىنىڭ ءىس جۇرگىزۋ قۇقىقتارى مەن مىندەتتەرىن ءتيىمدى ىسكە اسىرۋىن قامتاماسىز ەتۋگە, پەنيتەنتسيارلىق جۇيەدە ادام قۇقىقتارىنىڭ ساقتالۋىن ارتتىرۋعا مۇمكىندىك بەرەدى.
سونىمەن قاتار اكىمشىلىك ادىلەت سالاسىن جەتىلدىرۋ جانە قولدانۋ اياسىن كەڭەيتۋ ماسەلەلەرى بويىنشا ۇكىمەتتىڭ تۇزەتۋلەرى قارالادى. ازاماتتىق-قۇقىقتىق داۋلاردىڭ جەكەلەگەن ساناتتارىن ازاماتتىق ءىس جۇرگىزۋ كودەكسىنەن اكىمشىلىك ادىلەت دەڭگەيىنە اۋىستىرۋ تۋرالى زاڭ جوباسى ءبىرىنشى وقىلىمدا تالقىلانادى.
ءماجىلىس وزبەكستان ۇكىمەتىمەن ەكولوگيا جانە قورشاعان ورتانى قورعاۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى زاڭ جوباسىن جۇمىسقا الۋدى جوسپارلاپ وتىر.
