- رەسەيدىڭ «ناشە دەلو» پروموۋتەرلىك كومپانياسى سانكت-پەتەربۋرگتە جەكپە-جەكتىڭ بىرنەشە تۇرىنەن ءدۇبىرلى دودا ۇيىمداستىردى. نەۆا جاعالاۋىنداعى جارىستىڭ باستى باسەكەسىندە ورىنبوردىڭ قازاعى دامير يسماعۇلوۆ پەن رەسەيدىڭ تۋى استىندا ونەر كورسەتىپ جۇرگەن ارميان سپورتشىسى ەدۋارد ۆارتانيان كۇش سىناستى. كيكبوكستىڭ ەرەجەسى بويىنشا وتكەن كەزدەسۋدە ەكەۋى دە ايانباي ايقاستى. بىراق تورەشىلەردىڭ بۇيرەگى ەدۋاردقا بۇردى. ءۇشىنشى راۋندتا ولار يسماعۇلوۆقا نوكداۋن بەلگىلەدى. دامير ءوز نارازىلىعىن ءبىلدىردى. بىراق قازىلار وعان قۇلاق اسپادى. اقىرى ۆارتانيان باسىم ءتۇستى. جەڭىستىڭ قىزۋى باسىلماي تۇرىپ رەسەي فايتەرى دامير يسماعۇلوۆتى مما ەرەجەسى بويىنشا كۇش سىناسۋعا شاقىردى. ەگەر رەتى كەلسە, بۇل جەكپە-جەكتىڭ قازاقستاندا ءوتۋى دە مۇمكىن ەكەنى ايتىلدى.
- فۋتبولدان قازاقستان چەمپيوناتىنىڭ ەكىنشى تۋر ويىندارى مىناداي ناتيجەلەرمەن اياقتالدى: «جەتىسۋ» – «استانا» 0:2, «قايسار» – «قىزىلجار» 0:3, «اتىراۋ» – «ورداباسى» 1:1, «توبىل» – «ەلىماي» 4:2, «جەڭىس» – «شاحتەر» 1:0, «تۇران» – «قايرات» 0:0. ەكى كەزدەسۋدەن كەيىن 100 پايىزدىق كورسەتكىشكە قول جەتكىزگەن «توبىل» مەن «استانا» جارىس كەستەسىندە كوش باستاپ كەلەدى. «ورداباسى» مەن «قايراتتىڭ» ولاردان ەكى ۇپايى كەم.
- تەننيستەن قازاقستان قۇراماسىنىڭ كاپيتانى ياروسلاۆا شۆەدوۆا ءوز قىزمەتىنەن كەتىپ, ونىڭ ورنىنا يۋري ششۋكين تاعايىندالدى. 44 جاستاعى مامان 2008-2014 جىلدار ارالىعىندا ۇلتتىق كوماندامىزدىڭ ساپىندا ونەر كورسەتتى. رولان گارروس پەن اۋستراليانىڭ اشىق بىرىنشىلىگىندە ويناپ, اتر رەيتينگىندە 119 ورىنعا دەيىن كوتەرىلدى. كەيىنگى كەزدەرى ششۋكين شۆەدوۆانىڭ كومەكشىسى بولدى.
- ساۋد ارابياسىنىڭ استاناسى – ەر-ريادتا كاسىپقوي بوكس كەشى ءوتتى. باستى باسەكەدە اسا اۋىر سالماقتا ايقاساتىن فرانتسيالىق فرانسيس نگاننۋ مەن ۇلىبريتانيالىق ەنتوني دجوشۋا جۇدىرىقتاستى. العاشقىسى – ارالاس جەكپە-جەكتىڭ حاس شەبەرى, UFC-ءدىڭ ەكس-چەمپيونى. ەكىنشىسى – بوكستان وليمپيادا چەمپيونى, كاسىپقوي بوكستان الەمنىڭ ەكس-چەمپيونى. بۇل ايقاستا دجوشۋا نگاننۋدى ەكىنشى راۋندتا نوكاۋتقا جىبەردى.
- فۋتبولدان قازاقستاننىڭ جاسوسپىرىمدەر قۇراماسىنىڭ (U-15) اعا جاتتىقتىرۋشىسى بولىپ 64 جاستاعى اعىلشىن مامانى ستيۋارت حالل تاعايىندالدى. ول ءار جىلدارى ءوز ەلىندە, ءۇندىستان, سەنت-ۆينسەنت پەن گرەنادين, زانزيبار, تانزانيا, رۋاندا, كەنيا, بانگلادەش, ەفيوپيا جانە فيليپپيندە ەڭبەك ەتتى. سونىمەن قاتار, حالل ەلىمىزدەگى بالالار مەن جاسوسپىرىمدەر فۋتبولىن دامىتۋعا باعىتتالعان «High Performance» باعدارلاماسىنا جەتەكشىلىك ەتەدى.
