ءوزىنىڭ ايتۋىنا قاراعاندا, بەس جاسىنان فۋتبولعا قىزىعا باستاعان. ۇلدارمەن بىرگە دوپ قۋالاعان. ال ءتورت جىل بۇرىن «RealSportAcademy» فۋتبول كلۋبىنىڭ قۇرامىنا الىنعان.
«اركىمنىڭ قىزىعۋشىلىعى بولادى. مەنىڭ اڭسارىم فۋتبولعا اۋدى. ماقساتىم – بۇقارالىق سپورتتى, ونىڭ ىشىندە فۋتبولدىڭ قىزدارعا جات ەمەسىن ناسيحاتتاۋ. ارينە, جەتىستىككە جەتۋدى كوزدەدىم. بۇل ويىما اكەم-شەشەم قولداۋ ءبىلدىردى», دەيدى ديلناز بارساەۆا.
ول قاقپاشى بولۋدىڭ وڭاي ەمەسىن بىلەدى. ويتكەنى كوماندانىڭ جەڭىسى قاقپاشىنىڭ ابجىلدىگىمەن, شەبەرلىگىمەن بايلانىستى عوي. سول سەبەپتەن, قاقپانى قورعاۋدىڭ قىر-سىرىن ۇيرەنۋمەن كەلەدى.
«جاتتىعۋ كەزىندە دوپتى ۇستاۋ تەحنيكاسىنا ءمان بەرەمىن. ءتىپتى قاقپاعا تەبىلگەن دوپتىڭ تراەكتورياسىن ءبىلۋ كەرەك. قۇلاۋدى ۇيرەنىپ الدىم. ەڭ باستىسى, جىلدامدىق پەن قىراعىلىق تانىتۋدا قاتەلەسپەگەن ءجون», دەيدى قاقپاشى قىز.
«RealSportAcademy» فۋتبول كلۋبىنىڭ جەتەكشىسى بەرىك مۇراتالى ۇلىنىڭ ايتۋىنشا, قازاقستان فۋتبول فەدەراتسياسىنىڭ باستاماسىمەن 2021 جىلى جەكە كلۋبتاردىڭ رەسپۋبليكالىق ليگاسى قۇرىلعان. كلۋبتىڭ قاقپاشىسى ديلناز بارساەۆا بىلتىر اتالعان ليگادا ۇزدىك قاقپاشى اتانعان.
«فۋتبول كلۋبىنىڭ Instagram پاراقشاسىنا «قىزداردى قابىلدايسىزدار ما؟» دەگەن پىكىر جازىلدى. ونى ديلناز دەگەن قىز جازىپتى. العاشىندا تاڭدانعانىم راس, كەيىن كلۋبقا شاقىردىم. اكەسىمەن بىرگە كەلىپ, قاقپاشى بولعىسى كەلەتىنىن ايتتى. پىسىق ەكەن, كاراتەدەن ءبىراز جەتىستىگى بار. ول – شاپشاڭ قيمىلدايتىن, قايسارلىعى باسىم قىز. الداعى جىلى شەتەلدە وتەتىن جارىسقا جىبەرۋدى جوسپارلاپ وتىرمىز», دەيدى بەرىك مۇراتالى ۇلى.
قازىر قاقپاشى قىز نازارباەۆ زياتكەرلىك مەكتەبىنىڭ 8-سىنىبىندا وقىپ ءجۇر. حيميا مەن ينفورماتيكا پاندەرىن ۇناتادى. بىراق بولاشاعىن فۋتبولمەن بايلانىستىرۋدى كوزدەيدى.
ء«ار سپورتتىڭ تالابى بار عوي. ۇلدار وينايتىن كوماندادا ۇدايى بولۋعا مۇمكىندىك جوق. سول سەبەپتەن, قىزدار كومانداسىنا اۋىسقىم كەلەدى. شەبەرلىگىمدى جەتىلدىرىپ, ەلىمىزدىڭ, بالكىم, ەۋروپانىڭ كلۋبتارىندا وينايتىن شىعارمىن. بۇل – مەنىڭ ارمانىم», دەيدى ول.
اتىراۋ وبلىسى
