- بۇل سوزىمىزگە ەلدىڭ ىشكى ىستەر سالاسىندا «التىن القا» يەگەرى اتانعان پوليتسيا قىزمەتكەرلەرىنىڭ بولۋى دالەل. سولاردىڭ ءبىرى – قوعام تىنىشتىعىن ساقتاۋعا وزىندىك ۇلەسىن قوسىپ جۇرگەن نازىك جان گۇلجان قۇرالبەكوۆا. ول ىشكى ىستەر سالاسىنداعى العاشقى قىزمەت جولىن يۋۆەنالدى پوليتسيا توبىنىڭ كامەلەتكە تولماعاندار ىستەرى جونىندەگى ينسپەكتورى بولىپ باستاعان.
جۇمىسىنا جاۋاپتى پوليتسەي 2004 جىلى تۇركىستان وبلىستىق پوليتسيا دەپارتامەنتىنە قاراستى كوشى-قون پوليتسياسىنىڭ ينسپەكتور لاۋازىمىنا تاعايىندالادى. سودان بەرى كوشى-قون قىزمەتىنىڭ تۇراقتى دامۋىنا اتسالىسىپ جۇرگەن بىلىكتى قىزمەتكەر. دەگەنمەن ونىڭ ەڭ باستى جەتىستىگى – ەل دەموگرافياسىنىڭ جاقسارۋىنا قوسقان زور ۇلەسى.
گۇلجان قۇرالبەكوۆا – يىعىنا مايور شەنىن, ال موينىنا «التىن القا» تاققان 8 پەرزەنتتىڭ اناسى. ونىڭ 2-ەۋى ۇل, 6-اۋى قىز بالا. «ايەلدىڭ قىرىق جانى بار» دەگەن بابالار سوزىمەن تولىقتاي كەلىسەمىن. ايەلدەر قاۋىمى بار قيىندىققا شىدايدى, ولاردىڭ قولىنان ءبارى كەلەدى. انا ادامدى ومىرگە اكەلەدى دە, ونى ءوسىرىپ, دۇرىس تاربيە بەرىپ جەتىلدىرەدى جانە ەل تۇتقاسىن ۇستار ازامات بولۋىنا دا ۇلەسىن ايامايدى. وتباسى مەن قىزمەتتى قاتار الىپ ءجۇرۋ ايەلدىڭ قىرىق جاندى ەكەنىن كورسەتسە كەرەك. مەنىڭ دە قىزمەتىمە قولداۋ ءبىلدىرىپ جۇرگەن ەكىنشى انامداي بولعان ەنەمە جانە اسىل جارىما العىسىم شەكسىز», دەيدى كەيىپكەرىمىز.
جالپى, ەلدىڭ وڭتۇستىك ءوڭىرى باياعىدان كوپبالالى انالاردىڭ وتانى دەسەك, ارتىق ايتقاندىق ەمەس. قازىرگى ستاتيستيكا كورسەتكىشتەرى دە سونى راستايدى. ەلىمىزدىڭ تۇركىستان جانە ماڭعىستاۋ وبلىستارىندا تۋ كورسەتكىشى ەڭ جوعارى. ىشكى ىستەر سالاسىندا قىزمەت ەتەتىن نازىك جاندار اراسىندا دا ءبىر قولىمەن الەمدى, ەكىنشى قولىمەن بەسىكتى ءجيى تەربەتەتىن ايەلدەر قاتارى از ەمەس. ءبىزدىڭ كەلەسى كەيىپكەرىمىز دە وسى وڭىردەگى ورداباسى اۋدانىندا پوليتسيا قىزمەتكەرى بولىپ ىستەيدى.
- اۋداندىق پوليتسيا باسقارماسىنىڭ كريميناليست مامانى ىڭكار راشيدقىزى 7 بالانى ومىرگە اكەلگەن. ونىڭ ىشىندە ەكى رەت ەگىزدى دۇنيەگە اكەلگەن. ول دا – يىعىنا «مايور» شەنىمەن قاتار موينىنا «التىن القا» تاققان باتىر انا. جۇمىستا كريميناليستىك مىندەتىمەن قوسا, وتباسىندا اتا مەن ەنە الدىنداعى كەلىندىك قىزمەتىن قالتقىسىز اتقارىپ ءجۇر. ءبىر سوزبەن ايتقاندا, «قازاق ايەلى» دەيتىن مارتەبەلى اتقا لايىق, كوپكە ۇلگى رەتىندە كورسەتۋگە بولاتىن جان.
قوعامنىڭ قاۋىپسىزدىگىن قامتاماسىز ەتىپ, ازاماتتاردىڭ تىنىشتىعىن كۇزەتۋدىڭ ماڭىزىن تەرەڭ ۇعىنىپ, ءوز قىزمەتىن جاۋاپكەرشىلىكپەن اتقارىپ جۇرگەن ىڭكار راشيدقىزى ايەلدەر قانداي قيىندىقتى بولسا دا كوتەرەتىنىن, وتباسى قامى مەن جۇمىس بابىن قاتار الىپ ءجۇرۋ وزىنە اۋىرتپالىق اكەلمەيتىنىن ايتادى.
- پوليتسيا قاتارىندا كوپبالالى انا اتانعان نازىك جانداردان بولەك, ءوزى قاراماعىنا العان ۋچاسكەدەگى ەسەپكە قويىلعان بارشا بالاعا ەكىنشى انا بولىپ جۇرگەن ءتارتىپ ساقشىلارى دا از ەمەس. بۇل جەردە اڭگىمە يۋۆەنالدى پوليتسيا جايىندا بولىپ وتىر. بۇل لاۋازىمداعى ءتارتىپ ساقشىسى وزىنە قاراستى ۋچاسكەدەگى بارلىق كامەلەتكە تولماعان بالانىڭ ءومىرى مەن قاۋىپسىزدىگىنە جاۋاپتى. سول اۋماقتاعى ءاربىر بالانى جاقسى تانيدى جانە ارقايسىسىنىڭ جاعدايىن جەتىك بىلەدى. قاراعاندى وبلىستىق پد جەرگىلىكتى پوليتسيا قىزمەتى باسقارماسىنىڭ ايرىقشا تاپسىرمالار جونىندەگى اعا ينسپەكتورى اسەل وماروۆا ءوز قىزمەتى جايىندا ايتىپ بەردى.
– قاراعاندى وبلىسىنىڭ يۋۆەنالدى پوليتسياسىندا 145 ينسپەكتور ەڭبەك ەتەدى. ولار وزىنە قاراستى ۋچاسكەنىڭ ەكىنشى اناسى سانالادى, ءتىپتى ەسەپتە تۇرعان كوپ بالا ءۇشىن انا ورنىنا انا بولىپ ءجۇر. قيىن جاعدايعا تاپ بولعان بالانىڭ ءاربىر ەموتسياسىن ءوز جۇرەگىنەن وتكىزەدى. ءجاسوسپىرىمنىڭ العاشقى ماحاببات سەزىمىن دە بىرگە باسىنان كەشەدى. ولاردىڭ جەتكەن جەتىستىكتەرىنە, العان جاقسى باعالارىنا بىرگە قۋانادى. ءبىزدىڭ ينسپەكتورلارىمىز بالا تاربيەسىن قولدان شىعارىپ العان انالارعا كەڭەسشى بولىپ كەلەدى. ءبىز ءۇشىن بوتەن بالا دەگەن جوق, ءبارى دە ءوز بالامىزداي قىمبات, – دەيدى پوليتسيا پودپولكوۆنيگى.
ونىڭ ايتۋىنشا, بۇگىندە وبلىستا 300 كامەلەتكە تولماعان بالا مەن 500-دەن استام اتا-انا ەسەپتە تۇر. ولاردىڭ تاعدىرى ارقيلى, ارقايسىسى ءومىردىڭ قيىن كەزەڭىن دە ارقالاي وتكىزىپ جاتىر. بىرەۋلەرى پوليتسيا قىزمەتكەرلەرىنىڭ كومەگىمەن قيىندىقتارىن جەڭىپ, اياعىنا نىق تۇرسا, باسقالارى سىناقتان ءسۇرىنىپ جاتادى. بىراق يۋۆەنالدى پوليتسيا ينسپەكتورلارى ولاردى ەشقاشان نازاردان تىس قالدىرماي, كومەگىن اياماي جۇرەدى.
– ەسەپكە الىنعان كونتينگەنتپەن پروفيلاكتيكالىق جۇمىس جۇرگىزۋمەن قاتار جىل باسىنان بەرى ءبىز 1000-نان اسا اكىمشىلىك قۇقىق بۇزۋشىلىقتى انىقتاپ, كامەلەتكە تولماعانداردى بەيىمدەۋ ورتالىعىنا 31 بالانى ورنالاستىردىق, – دەيدى ءا.وماروۆا.
يۋۆەنالدى پوليتسيا ينسپەكتورلارىنىڭ قىزمەتى شىنىمەن جان-جاقتى ءارى كۇردەلى. كەيدە ءجاسوسپىرىم ۇيىنە ۋاقتىلى ورالماي قالسا دا, وبلىستىڭ بۇكىل گارنيزونى اياعىنان تىك تۇرىپ, ەرىكتىلەر شاقىرىلادى, بارلىعىن قوسقاندا 3 مىڭداي ادام الگى بالانى ىزدەۋگە كىرىسەدى. اسەلدىڭ ايتۋىنشا, بىردە جاس بالا اتا-اناسىنا ەسكەرتپەي دوستارىنىڭ ۇيىندە ءبىراز ۋاقىت وتىرىپ قالعان, تەلەفونى وشكەن. اتا-اناسىنىڭ دابىل قاعۋىمەن پوليتسەيلەر ونى جوعالىپ كەتكەن دەپ ەسەپتەپ, ىزدەۋگە كىرىسكەن. ءبىر جىلدىڭ ىشىندە وبلىستا وسىنداي 19 وقيعا تىركەلىپتى.
مىنە, بىرەۋگە انا, بىرەۋگە جار, ەندى بىرەۋگە ارىپتەس بولىپ جۇرگەن ايەلدەر قاۋىمىنىڭ حالىقارالىق مەرەكەسى دە كەلىپ جەتتى. دەگەنمەن قانداي مەيرام بولسىن, ولار ۇيىندە قاراپ وتىرماي, ءاردايىم انتىنا ادالدىق تانىتىپ, قوعام تىنىشتىعىنا قۇلاعى تۇرىك جۇرەدى. پوليتسيا قىزمەتىنىڭ سىيلى دا قۇرمەتتى بولۋىنىڭ دا سەبەبى وسىندا بولسا كەرەك.
