سۋرەتتەردى تۇسىرگەن – ەرلان ومار, «EQ»
ۇلت مادەنيەتىنىڭ التىن ساۋلەسى ونىڭ زەرگەرلىك ونەرىنەن ايرىقشا كورىنەدى. اسقان شەبەرلىكتى تالاپ ەتەتىن زەرگەرلىك بۇيىمداردان حالىقتىڭ تاريحى مەن تانىمىن, ءداستۇرى مەن ءداۋىرىن باعامداي الامىز. ساق بابانىڭ ساۋىتى مەن ساۋساعىنداعى بۇيىمدار سوناۋ عاسىردان بۇگىنگە امان جەتىپ, جاڭارىپ, تۇرلەنىپ, حالقىمىزدىڭ سانىنە سالتانات قوسىپ كەلەدى. «تاققانىم قۇلاعىما كۇمىس سىرعا, كۇمبىرلەتىپ شىعامىن كۇندە قىرعا» دەگەن قارا ولەڭ شۋماقتارى جوعارىداعى ويىمىزدى قۋاتتاپ تۇر. كورمەنى ۇيىمداستىرۋشىلار زەرگەرلىك ونەر ارقىلى ەلىمىزدىڭ باي ءداستۇرى مەن تاريحىن تانىستىرىپ, اتالعان ونەردى كوپشىلىككە ناسيحاتتاۋدى ماقسات ەتكەن.
سالتاناتتى شارانىڭ العاشقى قۇتتىقتاۋ ءسوزىن مادەنيەت جانە اقپارات مينيسترلىگى مۋزەي قىزمەتى جانە ماتەريالدىق ەمەس مادەني مۇرا باسقارماسىنىڭ باسشىسى گۇلزەينەپ پازىلوۆا جەتكىزدى. « ۇلىستىڭ ۇلى كۇنى – ناۋرىزدىڭ ونكۇندىگى وسىنداي كەرەمەت كورمەنىڭ اشىلۋىمەن باستالىپ وتىر. مۇنداي كورمەلەر ارقىلى قازاقتىڭ بولمىسىن تانىتاتىن تۋىندىلاردان ءورىسىمىز كەڭەيىپ, تانىمىمىز تولىعا تۇسەرى انىق», دەدى ول.
سۋرەتشى, ەتنوگراف قاليوللا احمەتجان كورمەنىڭ رۋحاني ماڭىزدىلىعىنا توقتالىپ, زەرگەرلىك بۇيىمداردىڭ كوركەمونەر ۇلگىسى عانا ەمەس, حالقىمىزدىڭ دۇنيەتانىمى, نانىم-سەنىمى, ادەت-عۇرپى مەن تاريحى كورىنىس تاپقان قۇندىلىعى جوعارى مۇرا ەكەنىن اتاپ ءوتتى. سونىمەن قاتار ق.احمەتجان ۇلتتىق مۋزەي تاراپىنان قولونەر ۇلگىلەرىن كورسەتىپ قانا قويماي, ولاردى عىلىمي تۇرعىدا زەرتتەپ-زەردەلەپ جاتقانى – مەملەكەتىمىز جارقىن بولاشاعىنا باستاما ەكەنىن باسا ايتتى.
مۋزەيدەگى قوردى ەسەپكە الۋ ءبولىمىنىڭ جەتەكشىسى ءارى كورمەنىڭ كۋراتورى توعجان ادىلبەكوۆا بولسا, قازاق حالقىنىڭ قىز بالانى تاربيەلەۋ جانە ونى ءسان-سالتاناتىمەن ءوسىرۋ جايىندا وي ساباقتادى. قۇتتىقتاۋ سوزدەردەن كەيىن كورمە قوناقتارى نازارىنا ۇلتتىق اشەكەي بۇيىمدارىنان دەفيلە ۇسىنىلدى. دەفيلە بارىسىندا مويىن-ساماي اشەكەيلەرى, سىرعالار, بىلەزىكتەر, جۇزىكتەر, بۇرىم اشەكەيلەرى سياقتى بۇيىمدار كورسەتىلدى. ايەل زاتىنىڭ جاس ەرەكشەلىكتەرى, قوعامداعى مارتەبەسىنە ساي ءسان ۇلگىسى تانىستىرىلدى.
ي.تاسماعامبەتوۆتىڭ بۇل كوللەكتسياسى باس-اياعى 1382 بۇيىمنان تۇرادى. بۇدان بولەك مۋزەي قورىندا بولات سارىباەۆتىڭ جەكە كوللەكتسياسى ساقتالعان. وندا ءۇش جۇزدەن اسا مۋزىكالىق اسپاپ جيناقتالعان.
