ءوزىنىڭ ماماندىعى – دارىگەر. قازىر قالا اۋماعىندا ۆەلوسيپەدپەن قاتىناپ ءجۇر. جەرگىلىكتى ستۋدەنتتەرگە اعىلشىن ءتىلىن تەگىن ۇيرەتەدى. شەتەلدىك ايەل قازاقستانعا كەلىسىمەن قازاقتىڭ ۇلتتىق سالت-ءداستۇرىن, ادەت-عۇرپىن, تاريحى مەن ادەبيەتىن, مادەنيەتىن زەرتتەۋگە دەن قويىپتى. جەرگىلىكتى تەاتر مەن فيلارمونيادا وتەتىن مادەني ءىس-شاراعا ءجيى بارادى.
«قازاقتىڭ ۇلتتىق اسپابى دومبىرادان توگىلگەن كۇيدىڭ سازى ەرەكشە اسەر ەتتى. سودان كەيىن دومبىرا شەرتۋدى ۇيرەنۋگە بەل بۋدىم. الايدا دومبىرا ۇيرەنۋ وڭاي بولمادى. مۇنىڭ ءبىر عانا سەبەبى بار. قيىندىق تىلگە قاتىستى تۋىندادى. ويتكەنى دومبىرا سىنىبىنىڭ مۇعالىمى ەرلان ساقتانوۆ اعىلشىنشا, ال مەن قازاقشا بىلمەدىم. بىراق ءبىز ءبىر-ءبىرىمىزدىڭ ءتىلىمىزدى جەتىك بىلمەسەك تە, بايلانىسىمىزدى ۇزبەدىك. قازاق جىگىتى شىدامدى ەكەن. ءتورت جىلدان بەرى ماعان دومبىرامەن كۇي شەرتۋدى ۇيرەتىپ كەلەدى. كوروناۆيرۋس ينفەكتسياسى ورشىگەن تۇستا ونلاين ءدارىس بەردى», دەپ اعىنان جارىلدى شەتەلدىك.
ول دومبىرانى جانىنداي جاقسى كورەدى. دومبىرا ساباعىنا كۇنىنەن ءتورت ساعاتىن بولەدى. ءۇش دومبىرا ساتىپ العان. دومبىرانىڭ ەكەۋى انگلياداعى ۇيىندە ساقتاۋلى.
قازىر ول قازاقتىڭ بىرنەشە كومپوزيتورىنىڭ كۇيىن ورىنداۋدى مەڭگەرىپ العان. اسىرەسە كۇي ونەرىنىڭ اتاسى قۇرمانعازى, داۋلەتكەرەي مەن دينا, ءازيدوللا ەسقاليەۆ پەن قارشىعا احمەدياروۆ سەكىلدى قازاق كۇيشىلەرىنىڭ 50-گە جۋىق كۇيىن ناقىشىنا كەلتىرە ورىندايدى. ەكى رەت كۇي سايىسىنا قاتىسىپ, ارنايى جۇلدەگە يە بولدى.
«دومبىرانىڭ قوس ىشەگىنەن كۇمبىرلەي شىققان كۇيدىڭ قۇدىرەتىنە تاڭعالامىن. ماعان, اسىرەسە, «اداي», «بالبىراۋىن», «قوس القا», «مەرەكە», «قىزىل قايىڭ», «اقساق كيىك» كۇيلەرى ۇنايدى. ال قۇرمانعازىنىڭ كۇيلەرى – تۇنىپ تۇرعان تاريح. ونىڭ شىعارمالارىندا ادىلەتسىزدىككە قارسى كۇرەسكەن قازاقتىڭ ارمان-ماقساتى بار. سول سەبەپتەن قۇرمانعازى تۋرالى ديسسەرتاتسيالىق جۇمىسىمدى قوعا الىپ, قورعايتىن بولارمىن. ول ءۇشىن الماتىداعى جوعارى وقۋ ورىندارىنىڭ بىرىنەن قازاق ءتىلىن مەڭگەرۋدى جوسپارلاپ ءجۇرمىن. قازاق اۋىلدارىن ارالاپ, قۇرمانعازىنىڭ مۇراسىن تولىق زەرتتەگىم كەلەدى», دەپ الداعى جوسپارىمەن ءبولىستى ول.
شەتەلدىك قازاقتىڭ ونەرىن عانا ەمەس, ۇلتتىق تاعامىن دا ۇناتادى. ۇيىندە ەت اسادى. شۇبات پەن قازىنى ءجيى تۇتىنادى.
«قازاقتىڭ جومارت ءارى ءمارت مىنەزى ۇنايدى. قينالعان جانعا قول ۇشىن سوزاتىن مەيىرباندىعى, ەتەنە تانىس بولماسا دا, قوناقجايلىلىق تانىتاتىن قاراپايىمدىلىعى تاڭعالدىردى. قازىر قازاق دوستارىم كوبەيدى. ولارمەن ءجيى كەزدەسىپ, ءبىر-ءبىرىمىزدى قولداپ جۇرەمىز», دەيدى دومبىراعا «عاشىق» س.ماستەرس.
ونىڭ جۇبايى ۆيولونچەلدە, ءۇش قىزى گيتارادا, الت پەن فورتەپيانودا وينايدى. بارلىعى مۋزىكا مەكتەبىن بىتىرگەن. ۇلى عانا مۋزىكاعا دەن قويعان.
اتىراۋ وبلىسى
